អឺរ៉ុបគ្រោងចាត់បញ្ចូលថាមពលនុយក្លេអ៊ែរជាថាមពល “បៃតង”
សហភាពអឺរ៉ុបកំពុងពិចារណាលើគម្រោង ដាក់បញ្ចូលថាមពលនុយក្លេអ៊ែរ និងឧស្ម័នធម្មជាតិ ចូលទៅក្នុងចំណោមប្រភេទថាមពលបៃតង ហើយការវិនិយោគទៅលើវិស័យទាំងពីរនេះអាចត្រូវចាត់ទុកជាវិនិយោគលើថាមពលបៃតង។ ក៏ប៉ុន្តែ ប្រទេសជាសមាជិកនៅតែខ្វែងគំនិតគ្នាច្រើននៅឡើយ ដោយប្រទេសខ្លះមិនយល់ស្របថា នុយក្លេអ៊ែរគឺជាថាមពលបៃតង។
ចុះផ្សាយនៅថ្ងៃ៖
សំណើចាត់បញ្ចូលនុយក្លេអ៊ែរ និងឧស្ម័នធម្មជាតិ ទៅក្នុងចំណោមប្រភេទថាមពលបៃតង ដែលត្រូវបានបញ្ជូនទៅឲ្យប្រទេសសមាជិកទាំង ២៧ កាលពីយប់ថ្ងៃសុក្រ ៣១ធ្នូ ត្រូវបានធ្វើឡើង ក្នុងគោលដៅជំរុញឲ្យប្រទេសសមាជិកកាត់បន្ថយការប្រើថាមពល ដែលបញ្ចេញឧស្ម័នកាបូនិច និងដើម្បីឈានទៅសម្រេចគោលដៅហ្សេរ៉ូកាបូន នៅឆ្នាំ២០៥០ខាងមុខ។
ប្រសិនបើទទួលបានការគាំទ្រដោយសំឡេងភាគច្រើន ពីសំណាក់ប្រទេសជាសមាជិក និងឆ្លងកាត់ការអនុម័តនៅសភាអឺរ៉ុប សំណើនេះនឹងត្រូវក្លាយជាច្បាប់របស់សហភាពអឺរ៉ុប ដែលត្រូវចូលជាធរមាន ចាប់ពីឆ្នាំ២០២៣ខាងមុខ។
ក៏ប៉ុន្តែ មិនមែនគ្រប់ប្រទេសជាសមាជិកសហភាពអឺរ៉ុបទាំងអស់សុទ្ធតែឯកភាពគ្នាថា នុយក្លេអ៊ែរ និងឧស្ម័នធម្មជាតិនេះ គឺជាថាមពលបៃតងនោះទេ។
បារាំង ដែលគេស្គាល់ជាទូទៅថា ជាប្រទេសពឹងផ្អែកខ្លាំងលើថាមពលនុយក្លេអ៊ែរ គឺជាអ្នកចេញមុខជាងគេ ក្នុងការជំរុញឲ្យអឺរ៉ុបដាក់បញ្ចូលនុយក្លេអ៊ែរ ទៅក្នុងប្រភេទថាមពលបៃតង ក៏ប៉ុន្តែ អាល្លឺម៉ង់វិញ ដែលកំពុងអនុវត្តផែនការបិទមជ្ឈមណ្ឌលនុយក្លេអ៊ែររបស់ខ្លួនម្តងមួយៗនោះតែងតែចេញមុខជំទាស់ ដោយកាលពីថ្ងៃសៅរ៍ម្សិលមិញនេះ រដ្ឋមន្រ្តីក្រសួងបរិស្ថានអាល្លឺម៉ង់បានលើកឡើងថា គេមិនគួរចាត់បញ្ចូលនុយក្លេអ៊ែរជាថាមពលបៃតងនោះទេ ពីព្រោះថា នុយក្លែអ៊ែរអាចបង្កនូវវិនាសកម្មធ្ងន់ធ្ងរដល់បរិស្ថាន។
អូទ្រីសវិញក៏បានបង្ហាញនូវជំហរជំទាស់ដូចគ្នានេះដែរ ដោយរដ្ឋមន្រ្តីក្រសួងបរិស្ថានអូទ្រីសបានលើកឡើងថា ថាមពលនុយក្លេអ៊ែរជាប្រភេទថាមពលដែលទាមទារឲ្យមានការវិនិយោគក្នុងតម្លៃខ្ពស់ ហើយទាមទារពេលវេលាយូរ ដូច្នេះ វាមិនមែនជាថាមពលដែលមានប្រសិទ្ធភាពនោះទេ ក្នុងការប្រយុទ្ធប្រឆាំងនឹងការឡើងកម្តៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ