របាយការណ៍៖ មនុស្សជាង១លាននាក់ស្លាប់ដោយសារតែភាពស៊ាំនៃថ្នាំផ្សះ អង់ទីប៊ីយូទិក
ភាពស៊ាំនឹងថ្នាំផ្សះ អង់ទីប៊ីយូទិក បានបណ្តាលឲ្យមនុស្សជាង ១លាន ២សែននាក់ ស្លាប់នៅក្នុងពិភពលោកនៅឆ្នាំ២០១៩។ តាមរបាយការណ៍ដែលចុះផ្សាយ កាលពីថ្ងៃ ព្រហស្បតិ៍ ទី ២០មករា ក្នុងទស្សនាវដ្តីសុខភាពអង់គ្លេស ដ៏ល្បីឈ្មោះ Lancet មនុស្សស្លាប់ដោយសារតែឆ្លងបាក់តេរី ដែលស៊ាំ លែងចុះចាញ់នឹងអំណាចថ្នាំផ្សះ អង់ទីប៊ីយូទិក។
ចុះផ្សាយនៅថ្ងៃ៖
ស្តាប់ - ០២:១៥
របាយការណ៍សកល ដែលចងក្រងឡើងដោយអ្នកស្រាវជ្រាវអន្តរជាតិបានបង្ហាញថា នៅឆ្នាំ ២០១៩ មនុស្សជាង១លាននាក់ស្លាប់ដោយសារជំងឺដែលបង្កឡើងដោយបាក់តេរី ដែលស៊ាំនឹងថ្នាំផ្សះ។ ភាពស៊ាំនឹងថ្នាំផ្សះនេះ បានដើរតួនាទីផងដែរក្នុងមរណភាពរបស់មនុស្សជាង ៣លានផ្សេងទៀត នៅក្នុងពិភពលោក។ ជាការប្រៀបធៀបភាពស៊ាំនឹងថ្នាំផ្សះបានធ្វើឲ្យមនុស្សស្លាប់ច្រើនជាងជំងឺអេដស៍ និងជំងឺគ្រុនចាញ់។ នៅឆ្នាំ ២០១៩ ជំងឺអេដស៍សម្លាប់មនុស្សជាង ៨សែននាក់ និងជំងឺគ្រុនចាញ់សម្លាប់មនុស្សជាង ៦សែននាក់នៅក្នុងពិភពលោក។
តាមរបាយការណ៍ ដែលចងក្រងឡើងដោយសកលវិទ្យាល័យវ៉ាស៊ីនតោន ភាពស៊ាំនឹងថ្នាំផ្សះប៉ះពាល់ សម្លាប់មនុស្សច្រើននៅក្នុងប្រទេសក្រីក្រ ដូចជានៅតំបន់អាហ្វ្រិក និងនៅអាស៊ីខាងត្បូង។ គេវាយតម្លៃថា ការប្រើថ្នាំផ្សះច្រើនជ្រុល សូម្បី សម្រាប់ជំងឺឆ្លងតូចតាច នៅប៉ុន្មានឆ្នាំចុងក្រោយនេះ បានធ្វើឲ្យថ្នាំផ្សះលែងមានប្រសិទ្ធិភាព សម្រាប់ព្យាបាលជំងឺធ្ងន់ធ្ងរដែលបង្កឡើងដោយបាក់តេរីកាន់តែសាហាវ ដែលធន់ស៊ាំនឹងថ្នាំអង់ទីប៊ីយូទិក។
ដោយពឹងផ្អែកលើទិន្នន័យ បានមកពីប្រទេស និងទឹកដីចំនួន ២០៤ នៅក្នុងពិភពលោក របាយការណ៍ បានដាស់ពញ្ញាក់ស្មារតី សាជាថ្មី ពីគ្រោះថ្នាក់នៃភាពស៊ាំនឹងថ្នាំផ្សះ។ របាយការណ៍របស់គណៈកម្មការឯកទេស ដែលបង្កើតឡើងដោយរដ្ឋាភិបាលអង់គ្លេស កាលពី ឆ្នាំ ២០១៤ ធ្លាប់បានវាយតម្លៃថា ចាប់ពីឆ្នាំ ២០៥០ មនុស្សប្រមាណ១០លាននាក់ នៅក្នុងពិភពលោក នឹងអាចស្លាប់ ក្នុងមួយឆ្នាំៗ ដោយសារជំងឺឆ្លង ដែលបង្កឡើងដោយបាក់តេរីដែលធន់ ស៊ាំនឹងថ្នាំផ្សះ អង់ទីប៊ីយូទិក។ ក្នុងករណីដែលភាពស៊ាំនឹងថ្នាំផ្សះ អាចធ្វើឲ្យមនុស្សជាង១លាននាក់ ស្លាប់នៅឆ្នាំ ២០១៩ នោះ គេមិនបាច់រង់ចាំដល់ឆ្នាំ ២០៥០នោះ។ អត្រាមរណភាព១០លាននាក់ ក្នុងមួយឆ្នាំ ដោយសារភាពស៊ាំនឹងថ្នាំផ្សះ នឹងអាចកើតឡើង ក្នុងប៉ុន្មានឆ្នាំខាងមុខ។
សម្រាប់សាស្ត្រាចារ្យ Chris Murray មកពីសកលវិទ្យាល័យវ៉ាស៊ីនតោន ជាមួយតួលេខ ថ្មី ដែលបង្ហាញថា ភាពស៊ាំនឹងថ្នាំផ្សះ កើតមាននៅគ្រប់ទីកន្លែង នៅក្នុងពិភពលោក នៅក្នុងល្បឿនមួយដ៏លឿន គេចាំបាច់ត្រូវចាត់វិធានការបន្ទាន់ ដូចជាការបោះទុនវិនិយោគសម្រាប់ការស្រាវជ្រាវរបស់មន្ទីរពិសោធន៍ ក្នុងការរកថ្នាំផ្សះថ្មី សម្រាប់ជំនួសថ្នាំផ្សះចាស់ដែលលែងមានប្រសិទ្ធិភាពលើបាក់តេរី។ ប៉ុន្តែ ក្នុងពេលរង់ចាំ ឲ្យមានថ្នាំផ្សះថ្មី ដែលមានប្រសិទ្ធិភាពទប់ទល់នឹងបាក់តេរីដែលធន់នឹងថ្នាំផ្សះ ឥរិយាបថដែលគេត្រូវប្រកាន់ខ្ជាប់ គឺព្យាយាមការពារខ្លួន កុំឲ្យកើតមានជំងឺឆ្លង ឬបើឆ្លងហើយ ត្រូវប្រើប្រាស់ថ្នាំផ្សះឲ្យត្រឹមត្រូវតាមក្បួនខ្នាតជៀសវាង កុំឲ្យមានភាពស៊ាំនឹងថ្នាំផ្សះអង់ទីប៊ីយូទិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ