ជំនួយមនុស្សធម៌ជាប្រធានបទស្នូលនៃជំនួបពិភាក្សារវាងពួកតាលីបង់និងបស្ចិមលោក
កិច្ចប្រជុំរវាងបេសកជនតាលីបង់និងមន្ត្រីលោកខាងលិចស្តីពីវិបត្តិមនុស្សធម៌នៅអាហ្វហ្កានីស្ថាន ចាប់បើកក្នុងថ្ងៃអាទិត្យ ទី២៣ មករានេះនៅក្នុងទីក្រុងអូស្លូប្រទេសន័វែស។ នេះជាលើកដំបូងដែលក្រុមតាលីបង់ជួបពិភាក្សាគ្នាជាផ្លូវការជាមួយអ្នកការទូតបស្ចិមលោកនៅអឺរ៉ុបចាប់តាំងពីពួកគេបានដណ្តើមគ្រប់គ្រងអំណាចនៅអាហ្វហ្កានីស្ថានមក។
ចុះផ្សាយនៅថ្ងៃ៖
ស្តាប់ - ០២:១៧
ក្នុងដំណើរទស្សនកិច្ចជាលើកដំបូងរបស់ខ្លួននៅអឺរ៉ុប ចាប់តាំងពីបានវិលទៅកាន់អំណាចនៅអាហ្វហ្កានីស្ថាននាខែសីហា ឆ្នាំ២០២១ បេសកជនតាលីបង់នឹងជួបជាមួយមន្ត្រីន័រវេស តំណាងសហរដ្ឋអាមេរិក បារាំង អង់គ្លេស អាល្លឺម៉ង់ អ៊ីតាលី និងសហភាពអឺរ៉ុប។
កិច្ចពិភាក្សារយៈពេល៣ ថ្ងៃ ចាប់បើកពីថ្ងៃអាទិត្យនេះដោយផ្តោតជាចំបងលើជំនួយមនុស្សធម៌សម្រាប់ប្រជាជនអាហ្វហ្កានីស្ថាន និងសំណុំរឿងសិទ្ធិមនុស្ស។ គេរំពឹងដែរថាពួកតាលីបង់នឹងជួបពិភាក្សាជាមួយសង្គមស៊ីវិលអាហ្វហ្កានីស្ថានរួមទាំងមេដឹកនាំស្ត្រី និងអ្នកកាសែតផងដែរ។
នៅមុនកិច្ចប្រជុំមួយថ្ងៃ អ្នកនាំពាក្យរដ្ឋាភិបាលតាលពីបង់លោក Zabihullah Mujahid បានប្រាប់ទីភ្នាក់ងារព័ត៌មាន AFP ថារបបតាលីបង់បានចាត់វិធានការនានាដើម្បីបំពេញតាមការទាមទាររបស់បស្ចិមលោក និងសង្ឃឹមថាអាចពង្រឹងទំនាក់ទំនងរបស់ខ្លួនតាមរយៈការទូតជាមួយប្រទេសទាំងអស់ រួមទាំងប្រទេសលោកខាងលិចផង។ ថ្នាក់ដឹកនាំតាលីបង់ចង់ផ្លាស់ប្តូរបរិយាកាសសង្គ្រាមនៅអាហ្វាហ្កនីស្ថានទៅជាស្ថានភាពសន្តិភាពវិញ។ នេះបើតាមអ្នកនាំពាក្យរបបតាលីបង់ដដែល។
គួរជ្រាបថាមកទល់នឹងសព្វថ្ងៃនេះ នៅមិនទាន់មានប្រទេសណាមួយទទួលស្គាល់រដ្ឋាភិបាលតាលីបង់ជាផ្លូវការទេ ហើយរដ្ឋមន្ត្រីការបរទេសន័រវែសអ្នកស្រី Anniken Huitfeldt បានគូសបញ្ជាក់ជាមុនរួចហើយដែរថាកិច្ចពិភាក្សារវាងបេសកជនតាលីបង់ និងមន្ត្រីប្រទេសលោកខាងលិចនៅទីក្រុងអូស្លូ មិនតំណាងឲ្យភាពស្របច្បាប់ឬការទទួលស្គាល់របបតាលីបង់ឡើយ។ ក៏ប៉ុន្តែបស្ចិមលោកត្រូវតែបើកកិច្ចពិភាក្សាជាមួយក្រុមតាលីបង់ដើម្បីរារាំងកុំឲ្យគ្រោះមហន្តរាយមនុស្សធម៌នៅប្រទេសអាហ្វហ្កានីស្ថានកាន់តែអាក្រក់ខ្លាំង។
យោងតាមអង្គការសហប្រជាជាតិ ភាពអត់ឃ្លានបានគំរាមកំហែងប្រជាជនអាហ្វហ្កានីស្ថានចំនួន ២៣លាននាក់ ឬស្មើនឹង ៥៥%នៃចំនួនប្រជាជនសរុប។ អង្គការសហប្រជាជាតិថាខ្លួនត្រូវការថវិកាប្រមាណ ៤,៤ពាន់លានដុល្លារពីប្រទេសម្ចាស់ជំនួយនៅឆ្នាំនេះ ដើម្បីដោះស្រាយវិបត្តិមនុស្សធម៌នៅក្នុងប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ