អូទ្រីសប្រកាសដាក់ពាក្យប្តឹង ក្រោយអឺរ៉ុបសម្រេចប្រគល់ « ឡាប៊ែលបៃតង » ឲ្យថាមពលនុយក្លេអ៊ែរ
នៅព្រឹកថ្ងៃពុធទី២កុម្ភៈ គណកម្មការអឺរ៉ុប បានអនុម័តបញ្ជីថ្មីនៃថាមពលអគ្គីសនី ភ្ជាប់ដោយ « ឡាប៊ែលបៃតង »។ នៅក្នុងបញ្ជីថ្មីនេះ គឺ ថាមពលអគ្គិសនីបានមកពីនុយក្លេអ៊ែរ និងថាមពលអគ្គិសនីបានមកពីចំហេះឧស្ម័នហ្កាស ត្រូវបានគេរាប់បញ្ចូលដែរ ថាមានឡាប៊ែលបៃតង។ ជាការសម្រេច ដែលបង្កឲ្យមានការតវ៉ាពីសំណាក់អង្គការបរិស្ថាន និងប្រទេសអឺរ៉ុបមួយ ចំនួន ដែលចាត់ទុកថា ថាមពលអគ្គិសនីនុយក្លេអ៊ែរ គឺមិនមែនជាថាមពលដែលស្អាតស្អំទេ។ រដ្ឋាភិបាលប្រទេសអូទ្រីសបានប្រកាសថា នឹងប្តឹងទៅកាន់តុលាការយុត្តិធម៌អឺរ៉ុប ឲ្យលុបចោលសេចក្តីសម្រេចនេះ។
ចុះផ្សាយនៅថ្ងៃ៖
ស្តាប់ - ០២:៣៥
តើថាមពលអគ្គិសនីដែលបានមកពីរោងចក្រនុយក្លេអ៊ែរ អាចត្រូវបានចាត់ទុកថាជាថាមពលស្អាតស្អំ ដែរឬទេ? នេះជាចំណោទដែលកំពុងពុះចែក មតិយល់ឃើញនៅអឺរ៉ុប។
ថ្ងៃពុធទី២កុម្ភៈ គណកម្មការអឺរ៉ុបបានសម្រេចថា អំណេះតទៅ ថាមពលអគ្គិសនីនុយក្លេអ៊ែរ និងថាមពលអគ្គិសនីបានមកពីចំហេះឧស្ម័នហ្កាស ក៏អាចទទួលបានឡាប៊ែលបៃតងដែរ។ កម្មវត្ថុនៃសេចក្តីសម្រេចនេះ គឺដើម្បីជំរុញការប្រមូលហ៊ុនវិនិយោគឯកជន លើប្រភពថាមពលទាំងនេះ ព្រោះគណកម្មការអឺរ៉ុបយល់ថាថាមពលប្រភេទនេះ មិនបញ្ចេញឧស្ម័នពុលទៅក្នុងបរិយាកាស ហើយអឺរ៉ុបមានកម្មវត្ថុសម្រេចឲ្យបានអព្យាក្រិត្យភាពកាបូន នៅឆ្នាំ២០៥០។
គណកម្មការអឺរ៉ុប បានលើកហេតុផលថា ជាការពិត ថាមពលអគ្គិសនីបានមកពីកង្ហារខ្យល់ និងពីផ្ទាំងសូឡាជាដើម គឺជាប្រភេទថាមពលស្អាតស្អំមែនហើយ។ ក៏ប៉ុន្តែប្រភពថាមពលទាំងនេះ វាមិនគ្រប់គ្រាន់សម្រាប់តម្រូវការប្រើប្រាស់ទេ ហើយណាមួយទៀត គឺវាទំហំាថមពលអគ្គិសនីដែលអាចប្រមូលបាន គឺវាប្រែប្រួលទាបខ្ពស់ខ្លាំង ទៅតាមអាកាសធាតុ។
តែយ៉ាងណា ការសម្រេចរបស់គណកម្មការអឺរ៉ុប ដោយមានការជំរុញ ពីបារាំង ព្រមទាំងប្រទេសអឺរ៉ុបខាងកើតខ្លះផងនេះ បានធ្វើឲ្យមានការតវ៉ាជាខ្លាំង។ ក្រៅពីអង្គការការពារបរិស្ថានជាច្រើន ដែលបានចេញមុខតវ៉ា ប្រទេសអូទ្រីស បានអះអាងភ្លាមថា នឹងដាក់ពាក្យប្តឹងទៅកាន់តុលាការយុត្តិធម៌អឺរ៉ុប។ លោក Karl Nehammer ប្រមុខរដ្ឋាភិបាលអូទ្រីស បានសរសេរលើទំព័រ Twitter ថាលោកមិនអាចយល់បានទាល់តែសោះ ថាមានមូលហេតុអ្វីបានជាគណកម្មការអឺរ៉ុប យល់ឃើញថា ថាមពលនុយក្លេអ៊ែរ គឺជាថាមពលបៃតង និងជាថាមពលប្រកបដោយចីរភាពនោះ។
លោកស្រី Leonore Gewessler រដ្ឋមន្ត្រីក្រសួងបរិស្ថានអូទ្រីស បានអះអាងថា ប្រទេសលុចហ្សំបួរ អាចនឹងចូលរួមជាមួយអូទ្រីសដើម្បីដាក់ពាក្យប្តឹង ឲ្យលុបចោលការសម្រេចដែលគ្មានហេតុផលនេះ។ លោកស្រីធ្លាប់បានលើកឡើងថា ថាមពលនុយក្លេអ៊ែរ អាចបង្កផលប៉ះពាល់ធ្ងន់ធ្ងរណាស់ មកលើបរិស្ថានធម្មជាតិ។ ក្រៅពីករណីអាចផ្ទុះ គ្រោះថ្នាក់ជាយថាហេតុ ដូចក្នុងករណីនៅ Fukushima ប្រទេសជប៉ុនឆ្នាំ២០១១ កាកសំណល់នុយក្លេអ៊ែរ គឺជាចំណោទបញ្ហាដ៏ធំបំផុត។ លោកស្រីរដ្ឋមន្ត្រីអូទ្រីសរូបនេះ សង្កត់ធ្ងន់ថា យើងមិនអាចបញ្ជូនកាកសំណល់ក៏គ្រោះថ្នាក់នេះ ទុកឲ្យកូនចៅជំនាន់ក្រោយបានទេ។ សម្រាប់លោកស្រី ថាមពលនុយក្លេអ៊ែរ ជាថាមពលដែលហួសសម័យ និងមានតម្លៃថ្លៃ មិនអាចមកចូលរួមកាត់បន្ថយការកើនឡើងកំដៅផែនដីបានឡើយ។
គួររំលឹកថា អូទ្រីសដែលមានប្រជាជនប្រមាណ៩លាននាក់ គឺជាប្រទេសអឺរ៉ុបដំបូងគេ ដែលបានហាមឃាត់ការផលិតថាមពលអគ្គិសនី បានមកពីនុយក្លេអ៊ែរ នៅឆ្នាំ១៩៧៨។ ក្រោយមកគោលការណ៍នេះ ត្រូវបានកំណត់មានតម្លៃជាគោលការណ៍រដ្ឋធម្មនុញ្ញ នៅឆ្នាំ១៩៩៩។ អូទ្រីសបច្ចុប្បន្ន ប្រើប្រាស់ថាមពលអគ្គិសនីដែលមានប្រភពស្អាតស្អំ ដល់ទៅ៧៥% ដោយក្នុងនោះមួយភាគធំគឺបានមកពី ទំនប់វារីអគ្គិសនី។ តែយ៉ាងណា អូទ្រីសក៏បានទិញបន្ថែមចរន្តអគ្គិសនីពីប្រទេសផ្សេងដែរ បើទោះបីជាបានមកពីនុយក្លេអ៊ែរក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ