ជប៉ុននឹងបង្វែរហ្កាសដែលខ្លួននាំចូល ទៅឲ្យអឺរ៉ុប ដើម្បីបង្ការក្នុងករណីមានបញ្ហាជាមួយរុស្ស៊ី
កាលពីថ្ងៃពុធទី៩កុម្ភៈ លោករដ្ឋមន្ត្រីក្រសួងសេដ្ឋកិច្ចជប៉ុន បានប្រកាសថា រដ្ឋាភិបាលជប៉ុន បានសម្រេចបង្វែរបញ្ជូនហ្កាស ដែលជប៉ុននាំចូល យកទៅឲ្យអឺរ៉ុបជាមុនសិន។ ធ្វើបែបនេះ គឺដើម្បីជួយប្រទេសនៅអឺរ៉ុប ឲ្យមានហ្កាសក្នុងស្តុក ក្នុងករណីដែលមានបញ្ហាផ្ទុះសង្គ្រាមណាមួយ រវាងអ៊ុយក្រែន និងរុស្ស៊ី។ កាយវិការសាមគ្គីរបស់ជប៉ុននេះ ត្រូវបានតំណាងអង្គទូតអាមេរិក និងអឺរ៉ុប ប្រចាំនៅជប៉ុន ថ្លែងអបអរជាខ្លាំង។
ចុះផ្សាយនៅថ្ងៃ៖
លោក Koichi Hagiuda រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន បានប្រាប់ទៅអ្នកកាសែតថា នាវាជាច្រើនគ្រឿងដែលដឹកហ្កាសនាំចូលមកជប៉ុន ពេលនេះបានបង្វែរចង្កូត បើកសំដៅទៅកាន់អឺរ៉ុបហើយ។ នៅខែមីនាក្រោយ នាវាដឹកហ្កាសផ្សេងទៀត របស់ជប៉ុន ក៏នឹងបន្តដឹកហ្កាសទៅផ្គត់ផ្គង់នៅអឺរ៉ុបដែរ។ ហ្កាសដែលជប៉ុនបង្វែរឲ្យអឺរ៉ុប គឺជប៉ុនលក់ឲ្យដោយយកតម្លៃទីផ្សារ រួចដើមតែប៉ុណ្ណោះ។ តែយ៉ាងណា រដ្ឋមន្ត្រីជប៉ុនរូបនេះ មិនបានបញ្ជាក់លំអិតទេ ថាជប៉ុននឹងបញ្ជូនហ្កាសទៅជួយអឺរ៉ុប ក្នុងទំហំចំនួនប៉ុន្មាន។
តែយ៉ាងណាក៏ដោយ រដ្ឋមន្ត្រីជប៉ុន បានទទួលស្គាល់ថា ជប៉ុនក៏អាចជួបបញ្ហាខ្វះហ្កាស ដែលជាប្រភពថាមពលដ៏សំខាន់ដែរ។ ជប៉ុនប្រើហ្កាស ដើម្បីដុតផលិតចរន្តអគ្គិសនី ដំណើរការរោងចក្រ ព្រមទាំងដំណើរការម៉ាស៊ីនកំដៅ។ ក៏ប៉ុន្តែ តាមរយៈកាយវិការនេះ គឺជប៉ុនចង់ឆ្លើយតបចំពោះប្រទេសអឺរ៉ុបដែលជាមិត្ត ដែលធ្លាប់បានចូលរួមសាមគ្គីជួយជប៉ុន ក្នុងគ្រាលំបាក តួយ៉ាងដូចជាកាលពីករណីគ្រោះថ្នាក់នុយក្លេអ៊ែរ នៅហ្វ៊ូគូឈីម៉ា កាលពីឆ្នាំ២០១១។
ក្រោយការប្រកាសរបស់រដ្ឋាភិបាលជប៉ុននេះ លោកអគ្គរដ្ឋទូតអាមេរិក ក៏ដូចជាលោកស្រីតំណាងអង្គទូតសហភាពអឺរ៉ុប ប្រចាំនៅតូក្យូ បានសម្តែងការអបអរ ចំពោះកាយវិការសាមគ្គី ពីសំណាក់រដ្ឋាភិបាលជប៉ុន។
គួរបញ្ជាក់ថា វិបត្តិរវាងរុស្ស៊ី និងអ៊ុយក្រែន កំពុងតែធ្វើឲ្យមានការព្រួយបារម្ភជាខ្លាំង ខ្លាចក្រែងថា មានការរអាក់រអួល ក្នុងការបញ្ជូនហ្កាសរបស់រុស្ស៊ី មកកាន់អឺរ៉ុប។ នៅអឺរ៉ុបរដូវរងារ ធ្លាក់ទឹកកក នៅមិនទាន់ចប់នៅឡើយ ហើយដែលតម្រូវការអគ្គិសនីមានកម្រិតខ្ពស់ខ្លាំងណាស់។ កាលពីថ្ងៃចន្ទ លោក អូឡាហ្វ ស្ហុល ប្រមុខរដ្ឋាភិបាលអាល្លឺម៉ង់ បានបញ្ជាក់ប្រាប់ទៅ ភាគីអាមេរិកថា ក្នុងករណីដែលរុស្ស៊ីហ៊ានប្រើកម្លាំងទ័ព វាយប្រហារមកលើអ៊ុយក្រែន នោះបំពង់បង្ហូរឧស្ម័ន Nord Stream 2 ដែលរុស្ស៊ីបញ្ជូនហ្កាសចូលមកលក់នៅអាល្លឺម៉ង់ នឹងត្រូវបោះបង់ចោលមិនឲ្យដំណើរការទេ។
ដោយឡែក យោងតាមអ្នកវិភាគខ្លះ គឺវាមានលទ្ធភាពតិចណាស់ ដែលរុស្ស៊ីនឹងវាយប្រហារអ៊ុយក្រែនមែននោះ។ សម្រាប់ពេលនេះ មធ្យោបាយចរចាការទូត កំពុងតែសម្រុកខ្លាំង និងហាក់ដូចជាហុចផលវិជ្ជមានបង្គួរ បន្ទាប់ពីលោក ម៉ាក្រុង ប្រធានាធិបតីបារាំង បានទៅជួបលោកពូទីន ដល់ក្រុងម៉ូស្គូ។ កាលពីថ្ងៃអង្គារ លោកម៉ាក្រុង បានអះអាងប្រាប់អាល្លឺម៉ង់ និងអ៊ុយក្រែនថា លោកពូទីនបានសន្យានឹងលោក ថានឹងគ្មានការវាយប្រហារណាមួយ មកលើអ៊ុយក្រែនទេ។ ក៏ប៉ុន្តែការចរចាគ្នាផ្នែកការទូត រវាងរុស្ស៊ី និងក្រុមប្រទេសលោកខាងលិច នឹងបន្តទៅមុខទៀត ដើម្បីរៀបចំគូសវាផែនការសន្តិសុខ ឲ្យមានការស្ងប់ ត្រជាក់ចិត្តរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ