អ៊ុយក្រែន-រុស្ស៊ី៖ អូតង់ប្រាប់ទៅសមាជិកឲ្យត្រៀមខ្លួនជាស្រេច ក្នុងករណីសង្គ្រាមមិនអាចចៀសបាន
បើទោះបីជាមានលទ្ធផលវិជ្ជមានខ្លះៗ ក្រោយការព្យាយាមចរចាការទូត ជាមួយរុស្ស៊ីក៏ដោយ តែស្ថានការណ៍នៅតែមិនទាន់ធូរស្រាលនៅឡើយទេ ក្នុងសំណុំរឿងអ៊ុយក្រែន។ កងទ័ពរុស្ស៊ី និងបេឡារុស បានចាប់ផ្តើមធ្វើសមយុទ្ធយោធារួមគ្នា រយៈពេល១០ថ្ងៃ នៅក្បែព្រំដែនអ៊ុយក្រែន។ កាលពីថ្ងៃព្រហស្បតិ៍ លោកអគ្គលេខាធិការអង្គការអូតង់ បានលើកលើងថា ប្រទេសសម្ព័ន្ធមិត្តអូតង់ ត្រូវតែត្រៀមខ្លួនក្នុងករណីដែលស្ថានការណ៍អាចឈានទៅមានសង្គ្រាម ដោយមិនអាចចៀសរួច។
ចុះផ្សាយនៅថ្ងៃ៖
ស្តាប់ - ០២:១៤
ថ្លែងនៅក្នុងពេលធ្វើសន្និសីទកាសែតរួមគ្នា ជាមួយលោកបូរីស ចនសុន លោក Jens Stoltenberg អគ្គលេខាធិការអូតង់ បានលើកឡើងថា កាលៈទេសៈពេលនេះ ជាពេលដ៏គ្រោះថ្នាក់បំផុត សម្រាប់សន្តិសុខអឺរ៉ុប។ លោកបន្ថែម ចំនួនទាហានរុស្ស៊ី ដែលឡោមព័ទ្ធអ៊ុយក្រែន និងនៅខាងកើតអឺរ៉ុប គឺកើនឡើងជាលំដាប់។
អគ្គលេខាធិការអូតង់ បញ្ជាក់ថា អូតង់មិនមែនជាការគំរាមទៅលើរុស្ស៊ីទេ ក៏ប៉ុន្តែអូតង់ត្រូវតែត្រៀមខ្លួន ក្នុងករណីដែលអ្វីៗមិនអាចទប់ឈ្នះ។ តែយ៉ាងណាសម្ព័ន្ធមិត្តអូតង់ នៅតែបន្តតាំងចិត្តអត់ធ្មត់ ដើម្បីស្វែងរកដំណោះស្រាយការទូតជាមួយរុស្ស៊ី។
ចំណែកលោកបូរីស ចនសុនវិញ បានថ្លែងថាបច្ចុប្បន្ននេះអឺរ៉ុប កំពុងតែប្រឈមនឹងបញ្ហាសន្តិសុខធ្ងន់ធ្ងរមិនធ្លាប់មានទេ។ តែទោះជាយ៉ានេះក្តី លោកនាយករដ្ឋមន្ត្រីអង់គ្លេស បានបញ្ជាក់ថា អ៊ុយក្រែនមានសិទ្ធិចង់ចូល ឬមិនចូលជាសមាជិករបស់អូតង់។
គួរបញ្ជាក់ថា នៅថ្ងៃព្រហស្បតិ៍ទី១០កុម្ភៈ រុស្ស៊ីបានចាប់ផ្តើម ធ្វើសមយុទ្ធយោធាទ្រង់ទ្រាយធំ មានរយៈពេល១០ថ្ងៃ ជាមួយនឹងកងទ័ពបេឡារុស ដែលមានព្រំដែនជាប់ភាគខាងជើងអ៊ុយក្រែន។ ចំណែកនៅភាគខាងត្បូង ក្នុងសមុទ្រខ្មៅឯណោះវិញ កងទ័ពជើងទឹករុស្ស៊ីក៏កំពុងធ្វើសមយុទ្ធដែរ។ អ៊ុយក្រែនអះអាងថា សមយុទ្ធរបស់ទាហានជើងទឹករុស្ស៊ី កំពុងតែរំខានសឹងតែទាំងស្រុង ដល់ការធ្វើចរាចរណ៍របស់នាវាផ្សេងទៀត។ នៅថ្ងៃព្រហស្បតិ៍ដែរ អ៊ុយក្រែន បានអះអាងថាខ្លួនក៏បានចាប់ផ្តើមធ្វើសមយុទ្ធយោធាដែរ។
ជាមួយនឹងស្ថានការណ៍ដ៏តានតឹងនេះ លោកស្រីនាយករដ្ឋមន្ត្រីដាណឺម៉ាក បានប្រកាសថា លោកស្រីនឹងអនុញ្ញាត ឲ្យមានវត្តមានរបស់កងទ័ពអាមេរិកនៅលើដីដាណឺម៉ាក ដើម្បីត្រៀមខ្លួនជាស្រេច ក្នុងករណីផ្ទុះសង្គ្រាមណាមួយជាមួយរុស្ស៊ី។
ដោយឡែក យុទ្ធនាការការទូតនៅតែបន្ត ដោយកាលពីថ្ងៃព្រសហ្បតិ៍ លោកស្រី Liz Truss រដ្ឋមន្ត្រីការបរទេសអង់គ្លេស បានទៅជួបលោករដ្ឋមន្ត្រីការបរទេសរុស្ស៊ីនៅក្រុងម៉ូស្គូ។ ក្រោយជំនួបនេះ លោកស្រីបានប្រាប់ឲ្យដឹងថា ភាគីរុស្ស៊ីបានបដិសេធជាថ្មី ថាគ្មានគម្រោងវាយប្រហារអ៊ុយក្រែនទេ។ តែយ៉ាងណាលោកស្រីលើកឡើងថា ទាល់តែរុស្ស៊ីបញ្ចេញសញ្ញាច្បាស់លាស់ជាក់ស្តែង ថាគ្មានកម្រោងនេះមែន ទើបប្រទេសលោកខាងលិចជឿទុកចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ