របាយការណ៍៖ ធានាគារអឺរ៉ុបនៅតែបន្តបញ្ចេញប្រាក់រាប់ពាន់លាន ទៅឲ្យក្រុមហ៊ុនប្រេងនិងហ្កាស
បណ្តាធនាគារនៅអឺរ៉ុប នៅតែបន្តបញ្ចេញប្រាក់រាប់ពាន់លានដុល្លារ ឲ្យក្រុមដែលរកស៊ីវិនិយោគ ក្នុងវិស័យប្រេងកាត និងឧស្ម័ហ្កាស បើទោះបីជាធនាគារទាំងនោះ បានសន្យាថានឹងប្រឹងប្រែង ដើម្បីប្រយុទ្ធប្រឆាំងនឹង វិបត្តិអាកាសធាតុក៏ដោយ។ នេះគឺជាសេចក្តីសណ្ឋាន នៃរបាយការណ៍មួយរបស់អង្គការ ShareAction ដែលមានទីតាំងនៅប្រទេសអង់គ្លេស។
ចុះផ្សាយនៅថ្ងៃ៖
ស្តាប់ - ០២:១០
យ៉ាងហោងណាស់ ធនាគារធំៗនៅអឺរ៉ុបចំនួន២៥ស្ថាប័ន បានបញ្ចេញកញ្ចប់ប្រាក់ សរុបចំនួន៥៥ពាន់ដុល្លារ នៅក្នុងឆ្នាំ២០២១កន្លងទៅ ដើម្បីផ្តល់កម្ចីហិរញ្ញវត្ថុ ទៅឱ្យក្រុមហ៊ុន ដែលរកស៊ី ឬអភិវឌ្ឍន៍គម្រោងផលិតប្រេងឥន្ទនៈ និងឧស្ម័នហ្កាស។ ធនាគារអឺរ៉ុបទាំង២៥នោះ សុទ្ធតែជាធនាគារដែលបានកំណត់កម្មវត្ថុ អព្យាក្រិត្យភាពកាបូន ។
ជាក់ស្តែង ធនាគារអង់គ្លេស២ ដូចជាធនាគារ HSBC Barclays និងធនាគារបារាំង BNP Parisbas គឺជាធនាគារធំៗទាំង៣នៅអឺរ៉ុប ដែលបន្តផ្តល់ប្រាក់កម្ចីវិនិយោគច្រើនជាងគេ នៅក្នុងវិស័យថាមពលហ្វូស៊ីល ប្រេងឥន្ទនៈ និងហ្កាស។ នេះបើផ្អែកតាមសេចក្តីសន្និដ្ឋាន ក្នុងរបាយការណ៍របស់អង្គការ ShareAction។
អង្គការនេះបានលើកឡើងថា ការចំណាយប្រាក់វិនិយោគ ក្នុងវិស័យបំពុលបរិស្ថាននេះ គឺវាផ្ទុយស្រឡះពីអនុសាសន៍លើកឡើង របស់អ្នកវិទ្យាសាស្ត្រ ដែលតែងតែទាញសញ្ញាអាសន្នថា ត្រូវតែបញ្ឈប់ជាបន្ទាន់ នូវការវិនិយោគបង្កើតអណ្តូងប្រេងកាតថ្មី ឬជីករណ្តៅបូមហ្កាសថ្មីថែមទៀត ប្រសិនបើពិភពលោកយើង ពិតជាចង់កាត់បន្ថយសីតុណ្ហភាពផែនដី មិនឲ្យឡើងកំដៅបន្ថែមចំនួន ១.៥°c បន្ថែមទៀតទេនោះ។
យោងតាមការស្រាវជ្រាវរបស់អង្គការ ShareAction ដែលបានពិនិត្យឯកសារវិនិយោគ របស់ធនាគារពាក់ព័ន្ធ គឺមានយ៉ាងហោច សហគ្រាសចំនួន៥០ ដែលបានលើកគម្រោង និងទទួលបានប្រាក់យកទៅវិនិយោគ ជីកអណ្តូងប្រេងកាត ឬជីកបូមឧស្ម័នហ្កាស។ ក្រុមហ៊ុនទាំងនោះមានដូចជាExxon Mobil Saudi Aramco Shell និង BP ជាដើម។
ដោយឡែក មានធនាគារខ្លះ បានចាប់ផ្តើម កាត់បន្ថយការបញ្ចេញប្រាក់វិនិយោគ ក្នុងវិស័យថាមពលហ្វូស៊ីលហើយ ក្នុងនោះមានដូចជា Commerzbank, Crédit Mutuel និង La Banque Postale របស់បារាំង។ ShareAction បានសង្កត់ធ្ងន់ថា ធនាគារទាំងអស់ ត្រូវតែចាប់ផ្តើមគោរពការសន្យារបស់ខ្លួន ដើម្បីឈានទៅសម្រេចអព្យាក្រិត្យភាពកាបូន ព្រោះថាការចំណាយប្រាក់វិនិយោគលើវិស័យថាមពលហ្វូស៊ីល វាគឺជា « សេណារីយ៉ូខាតបង់ » ទាំងសម្រាប់ធនាគារខ្លួនឯង ទាំងសម្រាប់ម្ចាស់ភាគហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ