រដ្ឋមន្ត្រីអឺរ៉ុបជួបប្រជុំគ្នា និយាយអំពីទិសដៅ និងមហិច្ឆតាអឺរ៉ុប ក្នុងវិស័យអវកាស
នៅព្រឹកថ្ងៃពុធទី១៦កុម្ភៈ រដ្ឋមន្ត្រីអឺរ៉ុបទទួលបន្ទុកកិច្ចការអវកាស បានជួបប្រជុំគ្នានៅទីក្រុងទូលូស។ ជាការប្រជុំ ដែលគេនឹងជជែកគ្នា អំពីកម្មវត្ថុមហិច្ឆិតារបស់អឺរ៉ុប នៅក្នុងវិស័យអវកាស សន្តិសុខនៃប្រព័ន្ធផ្កាយរណប ព្រមទាំងការគ្រប់គ្រងកាកសំណល់អវកាសជាដើម។ វិស័យអវកាស ដែលកំពុងតែក្លាយជាដែនថ្មីនៃការប្រកួតប្រជែង បន្ទាប់ពីមានលេចចេញនូវ វត្តមានរបស់ក្រុមហ៊ុនឯកជនអាមេរិក កាន់តែច្រើនឡើង ដូចជា SpaceX និង Blue Origine ជាដើម។
ចុះផ្សាយនៅថ្ងៃ៖
ស្តាប់ - ០២:១៥
ដឹកនាំដោយលោករដ្ឋមន្ត្រីក្រសួងសេដ្ឋកិច្ចបារាំង រដ្ឋមន្ត្រីទទួលបន្ទុកកិច្ចការអវកាស នៃបណ្តាប្រទេសសហភាពអឺរ៉ុប បានជួបប្រជុំគ្នានៅព្រឹកថ្ងៃពុធ នៅទីក្រុងទូលូស ទីក្រុងនៃវិស័យអាកាសចរណ៍ និងអវកាស។ ក្រោយស្តាប់សន្ទរកថា របស់លោកម៉ាក្រុងចប់ រដ្ឋមន្ត្រឺអឺរ៉ុបនឹង បើកការប្រជុំមិនផ្លូវការមួយ ជាមួយទីភ្នាក់ងារអវកាសអឺរ៉ុប ESA ដែលមានប្រទេសសមាជិកអឺរ៉ុបចំនួន១៨ប្រទេស រួមជាមួយ កាណាដា អង់គ្លេស ស្វ៊ីស និងន័រវែស។
ក្រៅពីបញ្ហា ស្រាវជ្រាវអវកាស និង សំណុំរឿងបម្រែបម្រួលអាកាសធាតុ កិច្ចប្រជុំជាមួយទីភ្នាក់ងារអវកាសអឺរ៉ុបនេះ នឹងផ្តោតសំខាន់ អំពីយុទ្ធសាស្ត្រដើម្បីកសាងភាពឯករាជ្យម្ចាស់ការរបស់អឺរ៉ុប ក្នុងវិស័យអវកាស។ យ៉ាងណាមិញ កាលពីថ្ងៃអង្គារទី១៥កុម្ភៈ គណកម្មការអឺរ៉ុប បានដាក់ចេញនូវវិធានការមួយចំនួន ទាក់ទិននឹង គម្រោងបណ្តុំផ្កាយរណបអឺរ៉ុប ព្រមទាំងការគ្រប់គ្រងចរាចរណ៍អវកាស។ យោងតាមលោក Josep Borrell ប្រមុខការទូតអឺរ៉ុប ផែនការទាំង២នេះ វាគឺជាផែនការ ត្រីវិស័យយុទ្ធសាស្ត្រ របស់អឺរ៉ុប ដើម្បីធានាពង្រឹងសមត្ថភាពផ្ទាល់ខ្លួនរបស់អឺរ៉ុប ក្នុងករណីមានការវាយប្រហារណាមួយ។
គួរបញ្ជាក់ថា គម្រោងបណ្តុំផ្កាយរណបអឺរ៉ុប La constellation de satellites នឹងត្រូវចាប់ផ្តើមអនុវត្តនៅឆ្នាំ២០២៤។ បណ្តុំផ្កាយរណបនេះ នឹងផ្តល់ឲ្យអឺរ៉ុបនូវបណ្តាញអ៊ីនធ័រនិតផ្ទាល់ខ្លួន ធានាការពារប្រព័ន្ធទូរគមនាគមន៍របស់រដ្ឋាភិបាល ឲ្យស្ថិតនៅក្នុងសុវត្ថិភាព ព្រមទាំងផ្តល់ឲ្យនូវបណ្តាញទំនាក់ទំនង ជាលក្ខណៈពាណិជ្ជកម្ម សម្រាប់អឺរ៉ុប និងអាហ្វ្រិកផងដែរ។ គម្រោងនេះ ត្រូវការប្រាក់ចំណាយប្រមាណ៥ ទៅ ៦ពាន់លានអឺរ៉ូ។
ដោយឡែកទាក់ទិននឹងការគ្រប់គ្រងចរាចរណ៍អវកាសវិញ អឺរ៉ុបមានបំណងលើជាសំណើរទៅកាន់សហគមន៍អន្តរជាតិ នូវវិធានច្បាប់រួមមួយ ស្តីអំពីការប្រើប្រាស់អវកាសប្រកបដោយការគោរពគ្នាទៅវិញមក។ ជាវិធានរួម ដែលនឹងមកការពារសន្តិសុខ ដល់ហេដ្ឋារចនាសម្ព័ន្ធនៅលើអវកាស របស់ប្រទេសទាំងអស់។ ទីភ្នាក់ងារអវកាសអឺរ៉ុប ក៏មានបំណងនិយាយផងដែរ អំពីលទ្ធភាពនៃការបង្កើតប្រព័ន្ធដឹកជញ្ជូនមនុស្សទៅលើអវកាសដោយខ្លួនឯង ព្រោះថាបច្ចុប្បន្នេះ គឺគេរំពឹងទាំងស្រុង ទៅលើយានរបស់រុស្ស៊ី ឬក៏យានរបស់ក្រុមហ៊ុនឯកជនអាមេរិក តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ