អនុប្រធានាធិបតីអាមេរិក អះអាងថាសម្ព័ន្ធមិត្តលោកខាងលិច នឹងសំពងរុស្ស៊ីឲ្យចាស់ដៃ ប្រសិនបើឈ្លានពានអ៊ុយក្រែនមែន
សំណុំរឿងអ៊ុយក្រែន កាន់តែតានតឹងខ្លាំង ជាមួយនឹងការបារម្ភកាន់តែធំ ទាក់ទិននឹងការបើប្រតិបត្តិការវាយប្រហារមកលើអ៊ុយក្រែន ពីសំណាក់រុស្ស៊ី។ ស្របពេលជាមួយនឹងការធ្វើសមយុទ្ធយោធាទ្រង់ទ្រាយធំរបស់រុស្ស៊ី នៅឯភាគខាងកើតអ៊ុយក្រែនឯណោះ ការផ្ទុះអាវុធបានកម្រើកឡើង រវាងក្រុមឧទ្ទាមបំបែកទឹកដី ដែលជាកូនចៅរបស់រុស្ស៊ី ជាមួយនឹងកងទ័ពរដ្ឋាភិបាលអ៊ុយក្រែន។ នៅក្នុងសន្និសីទស្តីពីសន្តិសុខ នៅទីក្រុងមុយនីឆ កាលពីថ្ងៃសៅរ៍ទី ១៩កុម្ភៈ លោកស្រី កាម៉ាឡា ហារីស អនុប្រធានាធិបតីអាមេរិក បានអះអាងថា អាមេរិករួមជាមួយសម្ព័ន្ធមិត្តលោកខាងលិច នឹងរួមសាមគ្គីគ្នា សំពងរុស្ស៊ីឲ្យចាស់ដៃ ប្រសិនបើរុស្ស៊ីហ៊ានឈ្លានពាន អ៊ុយក្រែនមែននោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
លោកស្រី កាម៉ាឡា ហារីស បានលើកឡើងថា ព្រំដែនជាតិរបស់ប្រទេសមួយ មិនអាចត្រូវបានរំលោភបំពាន ឬធ្វើឲ្យប្រែប្រួល ដោយប្រទេសមួយទៀតបានឡើយ។ លោកស្រីបានសន្យាថា នៅក្នុងករណីដែលរុស្ស៊ី ប្រើកម្លាំងឈ្លានពាន ចូលមកក្នុងទឹកដីអ៊ុយក្រែន គឺអាមេរិក រួមជាមួយសម្ព័ន្ធមិត្តលោកខាងលិច នឹងដាក់ទណ្ឌកម្មសេដ្ឋកិច្ចដ៏ធ្ងន់ធ្ងរបំផុត ទៅលើរុស្ស៊ី។
លោកស្រីបានបញ្ជាក់ថា វិធានការទណ្ឌកម្មសេដ្ឋកិច្ច ត្រូវបានគេគិតគូររួចស្រេចហើយ ពោលគឺជាទណ្ឌកម្មដ៏រហ័ស ក្លាំងក្លា និងច្បាស់លាស់ ដែលនឹងវាយសំពង ទៅលើស្ថាប័នហិរញ្ញវត្ថុ និងឧស្សាហកម្មសំខាន់ៗ របស់រុស្ស៊ី។ ក្រៅពីទណ្ឌកម្មសេដ្ឋកិច្ច លោកស្រីអនុប្រធានាធិបតីអាមេរិក បានបញ្ជាក់ថា សហរដ្ឋអាមេរិកនឹងជំរុញ ឲ្យអង្គការអូតង់ បន្ថែមកម្លាំងទ័ព នៅភាគខាងកើតអឺរ៉ុប។ តែទោះជាយ៉ាងនេះក្តី លោកស្រីអះអាងថា អាមេរិក នឹងមិនបិទផ្លូវចរចា ដោយសន្តិវិធី ជាមួយរុស្ស៊ីនោះឡើយ។
គួរបញ្ជាក់ថា សន្និសីទស្តីពីសន្តិសុខ ធ្វើនៅទីក្រុងមុយនីឆ ប្រទេសអាឡឺម៉ង់ គឺស្ថិតនៅក្នុងបរិបទមួយដ៏តានតឹងបំផុត ខណៈដែលរុស្ស៊ីកំពុងតែគម្រាម ឈ្លានពានមកលើអ៊ុយក្រែន។ ក្នុងឱកាសសន្និសីទនេះ លោក វ្លូឌីមៀរ ហ្សេឡិនស្គី ប្រធានាធិបតី អ៊ុយក្រែន បានទៅជួបនិយាយគ្នាដោយផ្ទាល់ ជាមួយលោកស្រីកាម៉ាឡា ហារីស លោកបូរីស ចនសុន និងលោកអូឡាហ្វ ស្ហុល ដើម្បីទាមទារការប្រកាសគោលជំហរច្បាស់ៗ ក្នុងការជួយទំនុកបំរុងអ៊ុយក្រែន ប្រឈមជាមួយរុស្ស៊ី។
យ៉ាងណាមិញ លោកបូរីស ចនសុន នាយករដ្ឋមន្ត្រីអង់គ្លេស បានប្រកាសអំពាវនាវ ឲ្យក្រុមប្រទេសលោកខាងលិចទាំងអស់ ត្រូវតែរួមកម្លាំងគ្នាជាធ្លុងមួយ ដើម្បីទប់ទល់នឹងការសំឡុតរបស់រុស្ស៊ី។ លោកចនសុន លើកឡើងថា កាលៈទេសៈពេលនេះ ធ្ងន់ធ្ងរណាស់ តែសម្រាប់អង់គ្លេស គឺអង់គ្លេសនៅតែចង់ឃើញដំណោះស្រាយការទូត ជាមួយរុស្ស៊ី ជាជាងការផ្ទុះអាវុធ។
ដោយឡែក យោងតាមប្រភពពីក្រសួងការពារជាតិអាមេរិក គឺរុស្ស៊ីកំពុងតែត្រៀមកម្លាំង ប្រុងប្រៀបសំដៅមកឈ្លានពានអ៊ុយក្រែនមែនទែនហើយ។ ឆ្លើយទៅកាន់អ្នកកាសែត លោក Dmytro Kouleba រដ្ឋមន្ត្រីការបរទេសអ៊ុយក្រែន បានបញ្ជាក់ថា អ៊ុយក្រែន កំពុងត្រៀមខ្លួន គ្រប់សេណារីយ៉ូទាំងអស់ ដោយរាប់ទាំងករណីត្រូវធ្វើសង្គ្រាមជាមួយរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ