អ៊ុយក្រែន៖ លោកម៉ាក្រុងទូរស័ព្ទទៅលោកពូទីន ដើម្បីបញ្ចៀសសង្គ្រាម នៅនាទីចុងក្រោយ
ការព្រួយបារម្ភ មានកាន់តែខ្លាំងឡើងៗ ទាក់ទិននឹងលទ្ធភាពផ្ទុះសង្គ្រាមទ្រង់ទ្រាយធំ នៅភាគខាងកើតអឺរ៉ុប ប្រសិនបើរុស្ស៊ីបើកការវាយប្រហារមកលើអ៊ុយក្រែន។ នៅភាគខាងកើតអ៊ុយក្រែន ការវាយប្រហារគ្នារវាងកងទ័ពរដ្ឋាភិបាល និងក្រុមឧទ្ទាមបំបែកទឹកដី ដែលជាកូនចៅរុស្ស៊ី បានចាប់ផ្ដើមកម្រើកឡើងវិញ យ៉ាងក្លាំងក្លា ដែលធ្វើឲ្យគេគិតថា រុស្ស៊ីនឹងយកលេសនេះ ដើម្បីធ្វើសង្គ្រាមជាមួយអ៊ុយក្រែន។ នៅព្រឹកថ្ងៃអាទិត្យនេះ លោកម៉ាក្រុងបានទូរស័ព្ទ ទៅនិយាយជាមួយលោកពូទីន នៅនាទីចុងក្រោយ ដើម្បីព្យាយាមរកដំណោះស្រាយ បញ្ចៀសការប្រឈមមុខដាក់គ្នា ដោយអាវុធ។
ចុះផ្សាយនៅថ្ងៃ៖
ស្តាប់ - ០២:១៨
ការប្រឹងប្រែងផ្នែកការទូត នៅនាទីចុងក្រោយ កំពុងតែត្រូវបានប្រធានាធិបតីបារាំង ព្យាយាមយ៉ាងសស្រាក់សស្រាំ ដើម្បីបញ្ចុះបញ្ចូលលោកពូទីន កុំឲ្យវាយប្រហារមកលើអ៊ុយក្រែន។ ការផ្ទុះសង្រ្គាម ដែលនឹងក្លាយជាការខាតបង់ដ៏ធ្ងន់ធ្ងរ សម្រាប់សេដ្ឋកិច្ចរុស្ស៊ី ព្រោះក្រុមប្រទេសលោកខាងលិច បានសន្យាថា នឹងវាយបកវិញឲ្យចាស់ដៃ។ វិមានប្រធានាធិបតីបារាំងបានលើកឡើងថា លោកម៉ាក្រុង នឹងព្យាយាមនិយាយជាមួយលោកពូទីន ឲ្យងាកមកផ្តល់វាសនា ដល់ការចរចាដោយសន្តិវិធីវិញ។
ដោយឡែក នៅក្នុងសន្និសីទទីក្រុងមុយនីឆ លោកប្រធានាធិបតីអ៊ុយក្រែន បានប្រកាសថា ក្រុមប្រទេសលោកខាងលិច គួរតែឈប់ប្រើគោលនយោបាយស្លូតបូត អត់ធ្មត់ ជាមួយរុស្ស៊ីតទៅទៀតទៅ។ កាលៈទេសៈពេលនេះ គឺក្រុមប្រទេសលោកខាងលិច ត្រូវតែងាកមកគូសវាសផែនការ ឲ្យបានច្បាស់ ដើម្បីជួយអ៊ុយក្រែន ឲ្យអ៊ុយក្រែនក្លាយជាខែលដ៏រឹងមាំ សម្រាប់ការពារសន្តិសុខអឺរ៉ុប។ តែយ៉ាងណា លោកហ្សេឡិនស្គី បានប្រាប់ទៅលោកម៉ាក្រុង ថាសូមផ្តាំប្រាប់ទៅលោកពូទីនផង ថា អ៊ុយក្រែននៅតែរងចាំ ការចរចាជាមួយរុស្ស៊ីជានិច្ច។
នៅព្រឹកថ្ងៃអាទិត្យនេះ ប្រតិកម្មបានធ្លាក់មកជាបន្តបន្ទាប់ បន្ទាប់ពីមានដំណឹង កាន់តែក្តៅឡើងៗ ស្តីពីលទ្ធភាពនៃការបើកការវាយប្រហារមកលើអ៊ុយក្រែន ពីសំណាក់រុស្ស៊ី ក្នុងពេលដ៏ឆាប់បំផុត។ លោកអគ្គលេខាធិការអង្គការអូតង់ ក៏ដូចសេតវិមានអាមេរិក បានអះអាងសាជាថ្មីទៀត ថារុស្ស៊ីកំពុងតែត្រៀម វាយប្រហារអ៊ុយក្រែនមែនទែនហើយ។ លោកស្ហាល មីឈែល ប្រធានក្រុមប្រឹក្សាអឺរ៉ុប បានលើកឡើងថា ក្រុមប្រទេសលោកខាងលិច មិនអាចចេះតែបន្តបោះដៃហុចទៅឲ្យរុស្ស៊ីចាប់រហូតនោះទេ។ វាដល់ពេលមួយ ដែលក្រុមប្រទេសលោកខាងលិច ត្រូវតែបង្ហាញជំហររឹងមាំដាច់ណាត់ ហ៊ានតតាំងវិញ។
គួរកត់សំគាល់ថា ប៉ុន្មានថ្ងៃចុងក្រោយនេះ នៅតំបន់ភាគខាងកើតអ៊ុយក្រែន ការវាយប្រយុទ្ធគ្នា រវាងកងទ័ពរដ្ឋាភិបាល និងក្រុមឧទ្ទាមបំបែកទឹកដីដែលជាកូនចៅរុស្ស៊ី បានចាប់ផ្តើមកម្រើកឡើងវិញខ្លាំងសម្បើមណាស់។ ក្រុមឧទ្ទាមអះអាងថា គឺទាហានអ៊ុយក្រែនជាអ្នកបើកការប្រយុទ្ធ បំពានបទឈប់បាញ់ ហើយដែលបានបង្ខំឲ្យពួកគេ ត្រូវជន្លៀសប្រជាពលរដ្ឋប្រមាណ៤ម៉ឺននាក់ ទៅកាន់ទឹកដីរុស្ស៊ី។
តែយ៉ាងណា យោងតាមការវិភាគរបស់ក្រសួងការពារជាតិអាេមរិក ការផ្ទុះអាវុធនៅភាគខាងកើត ព្រមទាំងការចោទប្រកាន់មកលើអ៊ុយក្រែននេះ វាគឺជាយុទ្ធសាស្ត្ររបស់រុស្ស៊ី ដើម្បីបានជាលេស បើកការវាយប្រហារមកលើអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ