វិបត្តិអ៊ុយក្រែន៖ បស្ចិមលោកសម្រុកដាក់ចេញទណ្ឌកម្មប្រឆាំងរុស្ស៊ី
សហរដ្ឋអាមេរិក អង់គ្លេស និងសម្ព័ន្ធមិត្តផ្សេងទៀតបានសម្រុកដាក់ចេញទណ្ឌកម្មប្រឆាំងរុស្ស៊ី ក្រោយលោកពូទីន ប្រកាសទទួលស្គាល់ឯករាជ្យនៃដែនដីអប្បគមពីរនៅប៉ែកខាងកើតអ៊ុយក្រែន និងបញ្ជាបញ្ជូនកងទ័ពទៅទីនោះ។ តើមានទណ្ឌកម្មអ្វីខ្លះដែលប្រទេសលោកខាងលិចដាក់លើរុស្ស៊ី?
ចុះផ្សាយនៅថ្ងៃ៖
ស្តាប់ - ០២:២៧
មិនបង្អែបង្អង់យូរឡើយ សហរដ្ឋអាមេរិកបានប្រកាសចេញភ្លាមភ្លែតហាមប្រាមពលរដ្ឋរបស់ខ្លួនមិនឲ្យធ្វើអាជីវកម្មឡើយនៅដូនែតស្ក៍ (Luhansk) និងលូហ្កាន់ស្ក៍ (Donetsk) ដែលជាតំបន់កាន់កាប់ដោយក្រុមអ្នកទាមទារផ្តាច់ទឹកដីនិយមគាំទ្ររុស្ស៊ី។ យ៉ាងណាក៏ដោយ ក្រុមហ៊ុនអាមេរិកមួយចំនួននៅតែមានសកម្មភាពនៅឡើយក្នុងតំបន់ទាំងពីរនោះ។
ពីទីក្រុងឡុងដ៍ សម្រាប់ជំហានដំបូង នាយករដ្ឋមន្ត្រីអង់គ្លេសលោក បូរីស ចនសុនបានប្រកាសដាក់ទណ្ឌកម្មលើធនាគាររុស្ស៊ីចំនួន៥ និងអ្នកជំនួញសម្បូរទ្រព្យរុស្ស៊ីចំនួន៣នាក់ (Gennady Timchenko, Boris Rotenberg និង Igor Rotenberg)។ ទ្រព្យសម្បត្តិរបស់មហាសេដ្ឋីរុស្ស៊ីទាំងបីរូបនៅអង់គ្លេសនឹងត្រូវបង្កក ហើយពួកគេនឹងត្រូវហាមឃាត់មិនឲ្យធ្វើដំណើរចូលអង់គ្លេសឡើយ។
ជាការឆ្លើយតបទៅនឹងទង្វើរបស់រុស្ស៊ីនៅអ៊ុយក្រែននេះដែរ រដ្ឋាភិបាលអាល្លឺម៉ង់របស់លោក អូឡាហ្វ ស្ហុលស៍ឯណោះវិញបានសម្រេចផ្អាកការដាក់ឲ្យដំណើរការគម្រោង Nord Stream 2 ដែលជាគម្រោងបំពង់បង្ហូរឧស្ម័នក្រោមបាតសមុទ្រមានតម្លៃប្រមាណ ១១,៥ ពាន់លានដុល្លារនិងដែលត្រូវបានបង្កើតឡើងដើម្បីបញ្ជូនបង្ហូរឧស្ម័នពីតំបន់ស៊ីបេរីរបស់រស្ស៊ីទៅប្រទេសអាល្លឺម៉ង់។
បន្ថែមលើនេះ រដ្ឋាភិបាលក្រុងប៊ែរឡាំងបាននិយាយដែរថាសហភាពអឺរ៉ុបនឹងអនុម័តទណ្ឌកម្មសេដ្ឋកិច្ចដ៏ធ្ងន់ធ្ងរសម្រាប់ដាក់លើក្រុងមូស្គូ។ ទីក្រុងវ៉ាស៊ីនតោនដែលកន្លងមកធ្លាប់បានគំរាមសម្លាប់គម្រោងបំពង់បង្ហូរឧស្ម័នរុស្ស៊ី Nord Stream 2 បានចេញមុខស្វាគមន៍ភ្លាមៗផងដែរចំពោះការសម្រេចចិត្តរបស់អាល្លឺម៉ង់។
ដោយឡែក នៅថ្ងៃអង្គារ ទី២២ កុម្ភៈម្សិលមិញ មេដឹកនាំសហភាពអឺរ៉ុបក៏បានពិចារណាកំណត់គោលដៅលើអ្នកនយោបាយនិងធនាគាររបស់រុស្ស៊ីជាច្រើនក្នុងទណ្ឌកម្មប្រឆាំងនឹងវិមានក្រេមឡាំង។ អឺរ៉ុបចង់រារាំងការចូលទៅកាន់ទីផ្សារហិរញ្ញវត្ថុរបស់រុស្ស៊ី និងដាក់បម្រាមលើការធ្វើពាណិជ្ជកម្មនៅក្នុងតំបន់ខាងកើតអ៊ុយក្រែនដែលគ្រប់គ្រងដោយពួកផ្តាច់ទឹកដីរុស្ស៊ីនិយម។
រដ្ឋមន្ត្រីការបរទេសរុស្ស៊ីលោក Sergei Lavrov បានប្រតិកម្មប្រឆាំងនឹងការគំរាមកំហែងដាក់ទណ្ឌកម្មជាច្រើនមកលើរុស្ស៊ីពីសំណាក់លោកខាងលិច។ លោក Lavrov និយាយថារុស្ស៊ីស៊ាំនឹងទណ្ឌកម្មហើយ ហើយរុស្ស៊ីក៏ដឹងទៀតថាទណ្ឌកម្មនឹងត្រូវគេជះដាក់លើរុស្ស៊ី ទោះក្នុងករណីណាក៏ដោយ ទោះមានឬគ្មានហេតុផលក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ