អ.ស.ប. ៖ មហន្តរាយភ្លើងឆេះព្រៃមានកាន់ច្រើន ពិភពលោកគ្មានមធ្យោបាយប្រឈម
មហន្តរាយភ្លើងឆេះព្រៃ ដ៏កំណាច និងអាក្រក់ខ្លាំងបំផុត ដូចធ្លាប់មានកើតនៅអូស្ត្រាលី កាលពីឆ្នាំ២០១៩-២០២០ ឬនៅសហរដ្ឋអាមេរិក ឬដល់តំបន់នៅអង់តាទិក គ្រាន់តែជាការចាប់ផ្តើមប៉ុណ្ណោះ។ បន្ថែមដោយការឡើងកម្តៅអាកាសធាតុនៃភពផែនដីមហន្តរាយដ៏ខ្លាំងហួសហេតុបែបនេះ នឹងកើនឡើងកាន់តែច្រើន នៅចុងសតវត្សរ៍។ នេះបើតាមរបាយការណ៍ព្រមានរបស់ភ្នាក់ងារបរិស្ថានអង្គការសហប្រជាជាតិ ចេញផ្សាយនៅថ្ងៃទី ពុធ ទី ២៣កុម្ភៈ ២០២២។
ចុះផ្សាយនៅថ្ងៃ៖
ស្តាប់ - ០២:០៩
គ្រោះមហន្តរាយឆេះព្រៃ ដោយធម្មជាតិ ដោយស្នាដៃមនុស្ស ឬដោយចៃដន្យ មិនបង្កឡើងដោយផ្ទាល់ដោយការឡើងកម្តៅអាកាសធាតុនៃភពផែនដីមែន ប៉ុន្តែ គ្រោះមហន្តរាយបែបកំណាចៗ សាហាវៗ ហួសហេតុ ដូចជាស្ងួតហួតហែងខ្លាំង ក្តៅខ្លាំង ជាកត្តានាំងាយមានភ្លើងឆេះព្រៃខ្លាំងណាស់។ របាយការណ៍អង្គការសហប្រជាជាតិបានអះអាងទៀតថា បើទោះបីពិភពលោកសម្រេចកម្មវត្ថុប្រកបដោយមហិច្ឆតា ដូចមានចែងក្នុងកិច្ចព្រមព្រៀងអាកាសធាតុក្រុងប៉ារីសក៏ដោយ ក៏លក្ខខណ្ឌនាំឱ្យងាយមានមហន្តរាយធម្មជាតិឆេះព្រៃកើនឡើងខ្លាំងដែរ។ ចំនួនគ្រោះមហន្តរាយធម្មជាតិឆេះព្រៃដ៏កំណាចដូចនៅអូស្ត្រាលី កាលពីឆ្នាំ២០១៩-២០២០ ឬនៅតំបន់អង់តាទិកកាលពីឆ្នាំ២០២០ នឹងកើនឡើងពី ៩ទៅ១៤% នៅឆ្នាំ២០៣០ -ពី២០ទៅ៣៣%នៅឆ្នាំ២០៥០ និងពី៣១ទៅ៥២%នៅឆ្នាំ២១០០។ នេះបើតាមរបាយការណ៍អង្គការសហប្រជាជាតិដដែល ដែលបញ្ជាក់ថា តួលេខខាងលើជាតួលេខស្តីពីគ្រោះមហន្តរាយភ្លើងឆេះព្រៃដ៏កំណាចខ្លាំង ដែលបើតាមក្បួន ជាបាតុភូតប្រចាំសតវត្សរ៍ កើតឡើង ជារៀងរាល់១០០ឆ្នាំម្តង ប៉ុន្តែឥលូវពិភពលោកជួបកាន់តែញឹកញយខ្លាំងឡើងៗ។
របាយការណ៍មិនវាយតម្លៃអំពីគ្រោះអគ្គីភ័យឆេះព្រៃ តូចតាចមិនសូវកំណាចមែន តែគ្មានអ្វីគួរសង្ស័យទេ គ្រោះមហន្តរាយបែបនេះក៏នឹងកើនឡើងខ្លាំងដែរ។ ហើយរាល់គ្រោះឆេះព្រៃ សុទ្ធតែជាអាចបង្កគ្រោះថ្នាក់ដល់ផែនដី ដល់ជីវិតមនុស្ស តាមរយៈការស្រូបផ្សែង ខូចដី បំពុលទឹក បំផ្លាញជីវិតសត្វរុក្ខជាតិជាច្រើនប្រភេទឱ្យហិនហោច។ ជាងនេះទៅទៀត ភ្លើងឆេះព្រៃ នឹងចូលរួមចំណែកធ្វើឱ្យឡើងកម្តៅអាកាសធាតុ ព្រោះលែងមានព្រៃសម្រាប់ស្រូបឧស្ម័នកាបូនិក។
គេមិនអាចលុបបំបាត់ហានិភ័យភ្លើងឆេះព្រៃបានទេ គឺបានត្រឹមតែកាត់បន្ថយតែប៉ុណ្ណោះ។ នេះបើតាមការបញ្ជាក់របស់អង្គការសហប្រជាជាតិក្នុងរបាយការណ៍ដែលណែនាំឱ្យរដ្ឋាភិបាលនីមួយៗ ឈប់ចំណាយខុសទិស និងប្តូរទម្លាប់ងាកមកគិតគូរ ការពារភ្លើងឆេះព្រៃ ប្រសើរជាងត្រៀមសកម្មភាពចាប់ទប់ទល់នៅពេលឃើញភ្លើងផ្តើមឆាបឆេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ