ខណៈអ៊ុយក្រែនរងគ្រាប់មីស៊ីលរបស់រុស្ស៊ី ក្រុមប្រទេសលោកខាងលិចបារម្ភខ្លាចរងការវាយប្រហារតាមអ៊ីនធ័រនែត
ក្នុងខណៈដែលអ៊ុយក្រែន កំពុងតែរងនូវការវាយប្រហារ ឈ្លានពានពីរុស្ស៊ី បណ្តាប្រទេសលោកខាងលិច បានអឺរ៉ុប អាមេរិកជាដើម កំពុងតែបារម្ភ ខ្លាចក្រែងមានការវាយប្រហារតាមប្រព័ន្ធអ៊ីនធ័រនែត ពីសំណាក់រុស្ស៊ី។ មន្ត្រីជំនាញសន្តិសុខបច្ចេកវិទ្យា កំពុងតែបង្កើនការប្រុងប្រយ័ត្នជាខ្លាំង ព្រោះវាអាចជាប្រតិបត្តិការរករឿងរបស់រុស្ស៊ី ចំពោះប្រទេសណា ដែលប្រឆាំងនឹងអំពើឈ្លានពានរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:៤១
នៅរសៀលថ្ងៃពុធ មុនពេលដែលរុស្ស៊ីចាប់ផ្តើមវាយប្រហារលើអ៊ុយក្រែន គេហទំព័រធនាគារ និងស្ថាប័នក្រសួងរដ្ឋអ៊ុយក្រែនជាច្រើន ដោយក្នុងនោះមានក្រសួងការបរទេស បានរងនូវការវាយប្រហារតាមអ៊ីនធ័រនែត ធ្វើឲ្យលែងដំណើរការ។ ហើយនៅយប់ថ្ងៃពុធដដែល អ្នកជំនាញរបស់ក្រុមផ្នែកសន្តិសុខបច្ចេកវិទ្យា ESET បានប្រទះឃើញកម្មវិធីមេរោគមួយ ពួនសំងំនៅតាមម៉ាស៊ីនកុំព្យូទ័រជាច្រើននៅអ៊ុយក្រែន។ កាលពីចុងខែមករា គេហទំព័រជាង១០ របស់រដ្ឋាភិបាលអ៊ុយក្រែន ក៏ត្រូវបានចោរព័ត៌មានវិទ្យាចូលអុកឡុក។ អ៊ុយក្រែន បានចោទថាសកម្មភាពទាំងនេះ គឺជាស្នាដៃរបស់រុស្ស៊ី ដែលបានរៀបគំរោង២ខែមកហើយ។
ទន្ទឹមពេលដែល អ៊ុយក្រែនបានរងការវាយប្រហារតាមអ៊ីនធ័រនែត កាន់តែញឹកញាប់ ក្រុមប្រទេសលោកខាងលិចផ្សេងទៀត ក៏បានចាប់ផ្តើមព្រួយបារម្ភដែរ។ លោក Mark Warner ប្រធានគណកម្មការចារកិច្ចនៃព្រឹទ្ធសភាអាមេរិក បានលើកឡើងថា ថាបើរុស្ស៊ីហ៊ានបញ្ជូនទាហានដល់ទៅ១៩ម៉ឺននាក់ ឈ្លានពានអ៊ុយក្រែន នោះរុស្ស៊ីក៏អាចប្រើកម្មវិធីបច្ចេកវិទ្យា រាប់រយរាប់ពាន់ វាយប្រហារមកលើក្រុមប្រទេស ដែលគាំទ្រអ៊ុយក្រែនដែរ។ ការវាយប្រហារបែបនេះ គឺរុស្ស៊ីអាចនឹងពង្រីក ធ្វើមកលើអាមេរិក អង់គ្លេស និងប្រទេសអឺរ៉ុបផ្សេងទៀត ដូចជាប៉ូឡូញជាដើម។
យ៉ាងណាមិញ តាំងតែពីថ្ងៃអង្គារ សហភាពអឺរ៉ុប បានបានបញ្ជាឲ្យក្រុមការងារសន្តិសុខព័ត៌មានវិទ្យា បង្កើនការប្រុងប្រយ័ត្នខ្ពស់ តួយ៉ាងដូចជាក្នុងវិស័យធនាគារ ហិរញ្ញវត្ថុ។ នៅសហរដ្ឋអាមេរិក លោកស្រីអភិបាលរដ្ឋញូយ៉ក ក៏បានប្រកាស កាលពីចុងសប្តាហ៍កន្លងទៅ ឲ្យបង្កើនការប្រុងប្រយ័ត្នដែរ នៅក្នុងវិស័យធនាគារហិរញ្ញវត្ថុ សុខាភិបាល ថាមពល និងការដឹកជញ្ជូន ព្រោះប្រព័ន្ធបច្ចេកវិទ្យានៃវិស័យទាំងនេះ អាចរងការវាយប្រហារពីរុស្ស៊ី។
លោក Serge Droz ប្រធានសន្តិសុខប្រព័ន្ធសារអេឡិចត្រូនិក នៅក្រុមហ៊ុន Protonmail បានលើកឡើងថា រុស្ស៊ីពូកែណាស់ ក្នុងការបន្លំឆ្ពិនភ្នែកគេឯង លាយឡំក្រុមចោរព័ត៌មានវិទ្យាឯកជន ជាមួយនឹងអាជ្ញាធររដ្ឋរុស្ស៊ី។ លោកពូទីន ខ្លួនឯង ធ្លាប់បានទទួលស្គាល់ ការវាយប្រហាររបស់ចោរព័ត៌មានវិទ្យារុស្ស៊ីខ្លះ មានលក្ខណៈជាការស្នេហាជាតិ ថែមទៀតផង។ លោក Serge Droz អះអាងថា ការវាយប្រហារតាមប្រព័ន្ធបច្ចេកវិទ្យា បើទោះបីមិនមានមនុស្សស្លាប់ តែវាជាកម្មវត្ថុរបស់រុស្ស៊ី ក្នុងការបង្កើតបរិយាកាសភ័យខ្លាច ជ្រួលច្របល់ នៅតាមប្រទេសដែលរុស្ស៊ីស្អប់។
ដោយឡែក លោក John Hultquist នាយករកផ្នែកវិភាគទិន្នន័យនៅក្រុមហ៊ុនសន្តិសុខព័ត៌មានវិទ្យា Mandiant បានអះអាងថា ក្រុមហ៊ុនក៏ដូចជាស្ថាប័ននៅតាមប្រទេសលោកខាងលិច បានដកពិសោធន៍ច្រើន ជាមួយនឹងសកម្មភាពវាយប្រហាររបស់រុស្ស៊ី។ ជាមួយនឹងបទពិសោធន៍ទាំងនេះ គេបានរៀបចំវិធានការរឹងមាំច្រើនណាស់ សម្រាប់ការពារសន្តិសុខបច្ចេកវិទ្យាព័ត៌មានវិទ្យា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ