ទីផ្សារហិរញ្ញវត្ថុអន្តរជាតិ ភ័យជ្រួលច្របល់ខ្លាំង ក្រោយការបើកការវាយប្រហាររបស់រុស្ស៊ីទៅលើអ៊ុយក្រែន
ការផ្ទុះសង្គ្រាមនៅអ៊ុយក្រែន បង្កឡើងដោយរុស្ស៊ីនៅពេលនេះ បានធ្វើឲ្យមានការភ័យជ្រួលច្របល់ជាខ្លាំង នៅលើទីផ្សារហិរញ្ញវត្ថុអន្តរជាតិ ព្រោះវាប្រាកដជាអាចប៉ះពាល់ ដល់វិស័យមូលធនវិនិយោគ ព្រមទាំងតម្លៃវត្ថុធាតុដើមជាច្រើនមុខ ដូចជាប្រេងឥន្ធនៈ ឧស្ម័នហ្កាស និងស្រូវសាឡីជាដើម ដែលផ្គត់ផ្គង់ដោយរុស្ស៊ី។ តម្លៃភាគហ៊ុន នៅទីផ្សារអឺរ៉ុប បានធ្លាក់ដាំក្បាលចុះជាខ្លាំង នៅព្រឹកថ្ងៃព្រហស្បតិ៍ទី១៤កុម្ភៈ ដូចគ្នានឹងតម្លៃប្រាក់ រូប្ល ដែលជារូបិយបណ្ណរបស់រុស្ស៊ី ដែរ។
ចុះផ្សាយនៅថ្ងៃ៖
ស្តាប់ - ០២:៤១
នៅម៉ោង១០ព្រឹក ថ្ងៃព្រហស្បតិ៍ទី២៤កុម្ភៈ តម្លៃភាគហ៊ុននៅលើទីផ្សារហិរញ្ញវត្ថុអឺរ៉ុប បានចាប់ផ្តើមដាំក្បាលចុះជាបន្តបន្ទាប់។ ផ្សារហ៊ុននៅបារីស ធ្លាក់ ៣.៧៣% នៅហ្វ្រង់ហ្វ័រត៍ ធ្លាក់ ៣.៩៦% នៅឡុងដ៍ ធ្លាក់ 2.៥៨% និងនៅមីឡង់ ធ្លាក់ ៣.៧៦%។ ចរន្តរញ្ជួយភ័យជ្រួលច្របល់ បានសាយភាយទៅដល់ផ្សារហ៊ុននៅអាស៊ីផងដែរ។
តម្លៃភាគហ៊ុននៅម៉ូស្គូវិញ ធ្លាក់ដល់ទៅ២៥%។ តម្លៃប្រាក់រូប្ល ដែលជារូបិយបណ្ណរុស្ស៊ី បានធ្លាក់ចុះទាបបំផុតក្នុងប្រវត្តិសាស្ត្រ ដោយ ៩០រូប្ល ទើបដូរបាន ១ដុល្លារអាមេរិក។ ក្រៅពីប្រាក់ដុល្លារអាមេរិក ដែលជារូបិយបណ្ណសម្រាប់ជ្រកកោណ បានឡើងថ្លៃ តម្លៃមាសក៏បានឡើងថ្លៃដែរ ចំនួន ២.៣១%។ ដោយឡែក លុយឌីជីថល bitcoin បានធ្លាក់ចុះចំនួន ៥.៧៤%។
លោក Ipek Ozkardeskaya អ្នកវិភាគទីផ្សារ នៅក្រុមហ៊ុនវិនិយោគ SwissQuote បានអះអាងថា ទីផ្សារហិរញ្ញវត្ថុពិភពលោក កំពុងភ័យជ្រួលច្របល់ខ្លាំងណាស់ បន្ទាប់ពីរុស្ស៊ី បានចាប់ផ្តើមបើកប្រតិបត្តិការយោធាវាយប្រហារលើអ៊ុយក្រែន។ ជាជំហានដំបូង វិស័យធនាគារ និងហិរញ្ញវត្ថុអន្តរជាតិ ប្រាកដជារងសំពាធខ្លាំង ដោយសារតែទណ្ឌកម្មសេដ្ឋកិច្ច ដែលអឺរ៉ុប និង អាមេរិក បានដាក់ទៅលើរុស្ស៊ី។ នៅម៉ូស្គូ ធនាគារ Sberbank បានធ្លាក់តម្លៃភាគហ៊ុន ចំនួនដល់ទៅ ៣៨.៨៥% ធនាគារ VTB Bank ធ្លាក់ចំនួន ៣៧%។ នៅវីយែនវិញ ធនាគារ Raiffeisen ធ្លាក់តម្លៃចំនួន ១៥.៥%។
តម្លៃប្រេងឆៅ បានឡើងថ្លៃ លើស ១០០ដុល្លារ ក្នុងមួយធុងបារីល ទាំងប្រភេទប្រេងឆៅអាមេរិក និងប្រភេទប្រេងឆៅសមុទ្រខាងជើង។ តម្លៃអាលុយមីញ៉ូម ក៏បានស្ទុះឡើងខ្ពស់ខ្លាំងមិនធ្លាប់មានដែរ។ រីឯតម្លៃឧស្ម័នហ្កាសវិញ បានស្ទុះឡើងដល់ទៅ ៣១% បើប្រៀបធៀបទៅថ្ងៃម្សិលមិញ។ ការឡើងថ្លៃខ្លាំង លើវត្ថុធាតុដើមផ្នែកថាមពលនេះ គឺជាបញ្ហាចោទមួយសម្រាប់អឺរ៉ុប ព្រោះថា ៤០%នៃឧស្ម័នដែលអឺរ៉ុបប្រើ រួមជាមួយ៣០%នៃប្រេងឥន្ធនៈ នាំចូលមកពីរុស្ស៊ី។ ទន្ទឹមគ្នានេះ ក្រុមហ៊ុនធំៗ ដែលរកស៊ីផ្នែកធនធានរ៉ែនៅរុស្ស៊ី បានធ្លាក់តម្លៃហ៊ុនខ្លាំងណាស់។ នៅហ្វ្រង់ហ្វ័រត៍ ក្រុមហ៊ុនថាមពល Uniper ដែលចូលហ៊ុនពាក់ព័ន្ធជាមួយគម្រោងបំពង់បង្ហូរឧស្ម័ន Nord Stream 2 បានខាតតម្លៃចំនួន ១១.៦៣%។ ភាពរញ៉េរញ៉ៃជ្រួលច្របល់ នៅលើទីផ្សារហ៊ុន កំពុងតែមានខ្លាំង ឲ្យតែពាក់ព័ន្ធនឹងក្រុមហ៊ុន សហគ្រាស ដែលរកស៊ីពាក់ព័ន្ធជាមួយរុស្ស៊ី។
លោក Ipek Ozkardeskaya អះអាងថា សម្រាប់ពេលនេះ អ្នកវិនិយោគ ក៏ដូចជាទីផ្សារហិរញ្ញវត្ថុទាំងអស់ មិនអាចធ្វើអ្វីបានច្រើនទេ ក្រៅតែពីតាមដានស្ថានការណ៍វិវឌ្ឍន៍ ហើយត្រៀមខ្លួនទទួលរងនូវ ការធ្លាក់ចុះ ខាតបង់បន្ថែមទៀត តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ