រុស្ស៊ីចាប់ផ្តើមបើកការវាយប្រហារ ឈ្លានពានអ៊ុយក្រែន
ដូចអ្វីគេដែលគេបានប៉ាន់ស្មាន និងបារម្ភ នៅទីបំផុត រុស្ស៊ីបានចាប់ផ្តើមបើកការវាយប្រហារ មកលើអ៊ុយក្រែនពិតមែន។ តាមរយៈវីដេអូ ដែលគេបានថតទុកតាំងតែពីថ្ងៃចន្ទ ហើយចាក់ផ្សាយនៅយប់ថ្ងៃពុធ ឈានចូលថ្ងៃព្រហស្បតិ៍ ទី២៤កុម្ភៈនេះ លោកពូទីន បានប្រកាសអំពើការបើកប្រតិបត្តិការយោធារបស់រុស្ស៊ី ទៅលើទឹកដីអ៊ុយក្រែន។ ប្រធានាធិបតីរុស្ស៊ី អះអាងថាគ្មានបំណងឈ្លានពានអ៊ុយក្រែនទេ។ អ្វីដែលរុស្ស៊ីធ្វើ គឺដើម្បីរំដោះអ៊ុយក្រែន ពីរបបដឹកនាំ បែបណាហ្ស៊ីសម័យថ្មី ដែលបានធ្វើបាបប្រជាជនអ៊ុយក្រែន។
ចុះផ្សាយនៅថ្ងៃ៖
សម្តីរបស់លោកពូទីន ប្រកាសបើកប្រតិបត្តិការទ័ពទៅលើអ៊ុយក្រែន
« ខ្ញុំបានសម្រេច ចាប់ផ្តើមប្រតិបត្តិការយោធាពិសេស។ កម្មវត្ថុរបស់វា គឺដើម្បីការពារមនុស្ស ដែលបានរងនូវការរំលោភបំពាន និងអំពើប្រល័យពូជសាសន៍ បង្កឡើងដោយរបបដឹកនាំអ៊ុយក្រែន អស់រយៈពេល៨ឆ្នាំមកនេះ។ ដើម្បីសម្រេចកម្មវត្ថុនេះ យើងនឹងប្រឹងប្រែង ដកគ្រឿងសព្វាវុធពីអ៊ុយក្រែន លាងជំរះផ្នត់គំនិតបែបណាហ្ស៊ីនៅអ៊ុយក្រែន ព្រមទាំងចាប់យកអ្នកទទួលខុសត្រូវ យកទៅកាត់ទោស ចំពោះអំពើឧក្រិដ្ឋដែលបានធ្វើទៅលើប្រជាពលរដ្ឋស្លូតត្រង់ ដោយក្នុងនោះមានប្រជាជនរុស្ស៊ីផងដែរ។
ផែនការរបស់យើង គឺគ្មានរាប់បញ្ចូលដោយការគ្រប់គ្រង ដែនដីអ៊ុយក្រែននោះទេ។ យើងគ្មានបំណងដាក់កំហិតអ្វីមួយ ទៅលើនរណាម្នាក់ តាមរយៈការប្រើកម្លាំងនោះឡើយ។
អ្នកណាក៏ដោយ ដែលហ៊ានមករារាំងយើង ឬក៏មកគំរាមប្រទេសយើង ប្រជាជនយើង គឺត្រូវតែដឹងខ្លួនថា ចម្លើយរបស់រុស្ស៊ី នឹងមានភ្លាមៗ។ ការឆ្លើយតបវិញរបស់រុស្ស៊ី នឹងបង្កផលវិបាកដ៏ធំធេង ដែលគ្មាននរណាធ្លាប់បានឃើញពីមុនមកទេ ក្នុងប្រវត្តិសាស្ត្រ។ យើងបានត្រៀមខ្លួនរួចជាស្រេច មិនស្ថានការណ៍វិវឌ្ឍន៍ទៅជាបែបណាឡើយ។ យើងបានធ្វើសេចក្តីសម្រេចចាំបាច់រួចរាល់អស់ហើយ ហើយខ្ញុំសង្ឃឹមថាគ្រប់គ្នានឹងយល់ច្បាស់ ពីបំណងរបស់យើង។ »
ទន្ទឹមគ្នាជាមួយពាក្យគំរាមទាំងនេះ លោកពូទីន ក៏បានអំពាវនាវ ហើយឲ្យកងទ័ពអ៊ុយក្រែន ទំលាក់អាវុធ កុំតតាំងជាងមួយរុស្ស៊ី ដោយអះអាងជាថ្មីទៀតថា ប្រតិបត្តិការរបស់កងទ័ពរុស្ស៊ី គឺដើម្បីជួយរំដោះប្រជាជនអ៊ុយក្រែន ពីរបបដឹកនាំរបស់ពួកណាហ្ស៊ីសម័យថ្មី។
សម្តីលោកពូទីន អំពាវនាវឲ្យកងទ័ពអ៊ុយក្រែនទំលាក់អាវុធ កុំតដៃ
« ខ្ញុំក៏ត្រូវតែប្រកាសអំពាវនាវដែរ ទៅដល់បងប្អូនសមាសភាពកងទ័ពអ៊ុយក្រែន ទាំងអស់។ សមមិត្តទាំងអស់គ្នា ឪពុករបស់អ្នក ជីតា និងជីតាទួតរបស់អ្នក ដែលបានចូលរួមប្រយុទ្ធការពារប្រទេសជាតិយើងទាំងអស់គ្នា យកជ័យជំនះលើពួកណាហ្ស៊ីកាលពីជំនាន់មុននោះ គឺពួកគាត់ពិតជាមិនចង់ឃើញពួកណាហ្ស៊ីសម័យថ្មី មកគ្រប់គ្រងអំណាចនៅអ៊ុយក្រែនឡើយ។
អ្នកទាំងអស់គ្នា បានស្បថសច្ចាការពារប្រជាជនអ៊ុយក្រែន មិនមែនការពាររបបយោធាប្រឆាំងប្រជាជន ដែលលួចប្លន់ និងធ្វើបាបអ៊ុយក្រែននោះឡើយ។ ដូច្នេះ សូមកុំធ្វើតាមការបញ្ជារបស់ពួកឧក្រិដ្ឋ! ខ្ញុំសូមអំពាវនាវ ឲ្យអ្នកទាំងអស់គ្នាទំលាក់អាវុធចុះ ហើយត្រលប់ទៅផ្ទះវិញ។ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ