ម៉ុលដាវីសុំជំនួយបន្ទាន់ពីអាមេរិកសម្រាប់ដោះស្រាយវិបត្តិជនភៀសខ្លួនអ៊ុយក្រែន
នៅក្នុងជំនួបជាមួយប្រមុខការបរទេសអាមេរិក លោកអង់តូនី ប្លីងកិន នៅទីក្រុងឃីស្ហីនណោវ នៅព្រឹកថ្ងៃអាទិត្យទី ៦ មីនា នាយករដ្ឋមន្រ្តីម៉ុលដាវីបាននិយាយសុំជំនួយបន្ទាន់ពីអាមេរិកសម្រាប់ដោះស្រាយវិបត្តិជនភៀសខ្លួន អ៊ុយក្រែន។ តាមឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន គិតមកត្រឹមថ្ងៃអាទិត្យនេះ មនុស្ស ប្រមាណ ១លាន ៥សែននាក់ បានរត់គេចចេញពីសង្រ្គាមឈ្លានពានរបស់រុស្ស៊ីនៅប្រទេសអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:១៨
ដូចប្រទេសជិតខាងផ្សេងទៀតរបស់អ៊ុយក្រែន ម៉ុលដាវី ប្រទេសដ៏តូច និងក្រីក្របំផុតរបស់អឺរ៉ុប កំពុងប្រឈមនឹងលំហូរជនភៀសខ្លួន ដែល រត់គេចចេញពីសង្រ្គាមវាយប្រហាររបស់កងទ័ពរុស្ស៊ី នៅអ៊ុយក្រែន។ ក្នុងចំណោមជនភៀសខ្លួនជាង ២សែន ៣ម៉ឺននាក់ ដែលបានឆ្លងដែនចូលម៉ុលដាវី មានជាង ១សែននាក់បានសុំសំចតស្នាក់នៅប្រទេសម៉ុលដាវី។ នេះជាចំនួន ដ៏ច្រើន សម្រាប់ម៉ុលដាវី ដែលមានផ្ទៃដីដ៏តូច និងមានប្រជាជនសរុបមិនដល់៣លាននាក់ (២,៦លាននាក់)។
នៅក្នុងជំនួបទទួលប្រមុខការបរទេសអាមេរិក លោកអង់តូនី ប្លីងកិនដែលបានធ្វើដំណើរទៅដល់ម៉ុលដាវី តាំងយប់ថ្ងៃសៅរ៍ទី ៥ មីនា នាយករដ្ឋមន្រ្តីម៉ុលដាវី លោកស្រី Natalia Gavrilita បាននិយាយប្រាប់លោកប្លីងកិនថា ម៉ុលដាវីបានផ្តល់ជំរក អាហារ និងសេវាសុខភាពសម្រាប់ប្រជាជនភៀសខ្លួនពីអ៊ុយក្រែន ប៉ុន្តែ ជាមួយមធ្យោបាយមានកំណត់ ម៉ុលដាវី ត្រូវការជំនួយមនុស្សធម៌បន្ទាន់ពីអាមេរិក សម្រាប់ជួយជនភៀសខ្លួនអ៊ុយក្រែន។
រដ្ឋមន្រ្តីការបរទេសអាមេរិក លោកអង់តូនី ប្លីងកិនវិញ បានថ្លែងកោតសរសើរ ការទទួលរាក់ទាក់ យ៉ាងកក់ក្តៅរបស់ម៉ុលដាវី សម្រាប់ប្រជាជនភៀសខ្លួនអ៊ុយក្រែននិងបានសន្យាជួយដោះស្រាយបន្ទុករបស់ម៉ុលដាវី។ នៅក្នុងដំណើរទស្សនកិច្ចទៅកាន់ប្រទេសប៉ូឡូញ កាលពីថ្ងៃសៅរ៍ ប្រមុខការបរទេសអាមេរិកបាននិយាយថា សេតវិមានកំពុងស្វែងរកថវិកាជាង ២៧៥០លានដុល្លារសម្រាប់ជួយប្រជាជនអ៊ុយក្រែន ដែលរងគ្រោះ ដោយសារសង្រ្គាមឈ្លានពានរបស់រុស្ស៊ីនៅអ៊ុយក្រែន។
ក្រៅពីជំនួយមនុស្សធម៌សម្រាប់ជនភៀសខ្លួន ម៉ុលដាវីក៏ត្រូវការជំនួយគាំទ្រពីអាមេរិក ក្នុងកាលៈទេសៈដែលម៉ុលដាវីបារម្ភខ្លាចភ្លើងសង្រ្គាមរុស្ស៊ីរាលដាលដល់ទឹកដីរបស់ខ្លួន។ មានព្រំដែនជាប់អ៊ុយក្រែន នៅភាគខាងត្បូង ម៉ុលដាវី ខ្លាចថា រុស្ស៊ីនឹងអាចប្រើទឹកដីរបស់ខ្លួន សម្រាប់ចូលវាយ សង្រ្គប់ អ៊ុយក្រែន ពីទិសខាងត្បូង និងខាងលិច។
ម៉ុលដាវី ប្រទេសអតីតសហភាពសូវៀត មិនមែនជាសមាជិករបស់អូតង់។ សង្រ្គាមឈ្លានពានរបស់រុស្ស៊ីនៅទឹកដីអ៊ុយក្រែនបានជំរុញឲ្យម៉ុលដាវី និងហ្សកហ្ស៊ី ដាក់បេក្ខភាពជាផ្លូវការសម្រាប់ចូលជាសមាជិករបស់សហភាពអឺរ៉ុប នៅថ្ងៃព្រហស្បតិ៍ ទី ៣មីនា។
នៅដើមសប្តាហ៍នេះ ម៉ុលដាវីបានប្រាប់អ្នកតំណាងទូតអឺរ៉ុបថា ដោយសារសង្រ្គាមអ៊ុយក្រែន ប្រទេសម៉ុលដាវីកំពុងប្រឈមធ្ងន់ធ្ងរនឹងបញ្ហាសន្តិសុខ។ តាមប្រធានាធិបតីម៉ុលដាវី តាំងពីរដ្ឋធានី ឃីស្ហីនណោវរបស់ម៉ុលដាវី គេលឺសំឡេងផ្ទុះគ្រាប់បែក គ្រាប់ផ្លោង នៅក្នុងទឹកដី អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ