បារាំង អង់គ្លេស អាមេរិក និងអាល្លឺម៉ង់ សន្យារួមគ្នាប្រឹងប្រែង ដាក់ទណ្ឌកម្មសំពងរុស្ស៊ីឲ្យធ្ងន់ថែមទៀត
កាលពីរសៀលថ្ងៃចន្ទទី៧មីនា លោកម៉ាក្រុង លោកចូ បៃដិន និងលោកអូឡាហ្វ ស្ហុលស៍ និងលោកបូរីស ចនសុន បានជួបប្រជុំគ្នា តាមប្រព័ន្ធវីដេអូខុសហ្វឺរិនស៍ ដើម្បីនិយាយគ្នាអំពីសំណុំរឿងអ៊ុយក្រែន។ ប្រមុខដឹកនាំមហាអំណាចលោកខាងលិចទាំង៤នេះ បានសន្យារួមគ្នា ថានឹងប្រឹងប្រែង ដាក់ទណ្ឌកម្មបន្ថែមទៀត ដើម្បីសំពងលើរុស្ស៊ីឲ្យធ្ងន់ជាងនេះ។
ចុះផ្សាយនៅថ្ងៃ៖
ស្តាប់ - ០២:១៨
មហាអំណាចលោកខាងលិចទាំង៤ បារាំង អង់គ្លេស អាល្លឺម៉ង់ និង អាមេរិក បានបង្ហាញការសាមគ្គីជាធ្លុងមួយ ជាថ្មីម្តងទៀត ក្នុងការដាក់ទណ្ឌកម្មផ្តន្ទាទោសរុស្ស៊ី ដែលបានធ្វើសង្គ្រាមឈ្លានពានអ៊ុយក្រែន។ យោងតាមលិខិតជូនដំណឹងរបស់សេតវិមាន មហាអំណាចទាំង៤ បានសន្យាថានឹងបន្ថែមដាក់ទណ្ឌកម្ម សំពងរុស្ស៊ី ឲ្យធ្ងន់ជាងនេះទៀត។
តែយ៉ាងណា យោងតាមការវិភាគខ្លះ បានឲ្យដឹងថា មានចំណុចខ្លះ បានធ្វើឲ្យមហាអំណាចទាំង៤ មានការខ្ទាស់គំនិតគ្នា ជាក់ស្តែងគឺបញ្ហា ធ្វើពហិការ ឈប់ទិញប្រេង និងហ្កាសរបស់រុស្ស៊ី។ លោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ ដែលជាប្រទេសទិញប្រេង និងហ្កាសរបស់រុស្ស៊ីច្រើនបំផុតនោះ បានបង្ហាញជំហរជំទាស់ ថាមិនអាចបញ្ឈប់ការនាំចូលទំនិញថាមពលទាំង២មុខនេះ ពីរុស្ស៊ីបានទេ។ យ៉ាងណាមិញ នៅក្នុងលិខិតប្រកាសរបស់រដ្ឋាភិបាលអាល្លឺម៉ង់ ស្តីពីលទ្ធផលប្រជុំនៅរសៀលថ្ងៃចន្ទ គឺគេបានគូសបញ្ជាក់តែអំពីការសន្យាគ្នា ជួយផ្នែកមនុស្សធម៌តែប៉ុណ្ណោះ។
ដោយឡែក លោកចូ បៃដិនវិញ ហាក់កំពុងតែរងសំពាធខ្លាំង ពីសភាខុនហ្ក្រេស ដែលចង់ឲ្យអាមេរិក ត្រូវតែឈប់ទិញប្រេង និងហ្កាសរបស់រុស្ស៊ី ព្រោះវាហាក់បីដូចជាអាមេរិក យកលុយទៅចិញ្ចឹមរបបផ្តាច់ការរបស់លោកពូទីន។ ប៉ុន្តែសម្រាប់ពេលនេះ លោកចូ បៃដិន មិនចង់សម្រេចដោយអត្តនោម័ត ធ្វើឲ្យខូចដល់សាមគ្គីភាព ជាមួយសម្ព័ន្ធមិត្តអឺរ៉ុបឡើយ។
នៅក្នុងអត្ថបទចំហមួយ ចុះផ្សាយដោយកាសែតបារាំង Le Monde នៅថ្ងៃចន្ទ លោក ហ្វ្រង់ស្វ័រ ហូឡង់ អតីតប្រធានាធិបតីបារាំង បានលើកឡើងថា ចង់សំពងរបបរបស់ពូទីនឲ្យចាស់ដៃ គឺត្រូវតែឈប់ទិញឧស្ម័នហ្កាសរបស់រុស្ស៊ី ព្រោះវាជាប្រភពចំណូលមួយសំខាន់ណាស់របស់ក្រុមបក្សពួកពូទីន។ លោកហូឡង់ បានសង្កត់បន្ថែមថា ក្រុមបស្ចឹមលោក មិនអាចថ្កោលទោសលោកពូទីន តែព្រមពេលជាមួយគ្នានេះ បែរជាចិញ្ចឹមរបបរបស់ពូទីនទៅវិញ។
ដោយឡែក ទាក់ទិននឹងបញ្ហាសន្តិសុខនៅអឺរ៉ុបខាងកើតវិញ សហរដ្ឋអាមេរិក បានសម្រេចនៅថ្ងៃចន្ទទី៧មីនា ថានឹងបញ្ជូនទាហានចំនួន ៥០០នាក់បន្ថែមទៀត ដើម្បីជួយការពារប្រទេសសមាជិកអូតង់។ គិតពីដើមឆ្នាំ២០២២នេះមក អាមេរិកបានបញ្ជូនទាហាន ចំនួន១២០០០នាក់ហើយ មកកាន់អឺរ៉ុប។ តែទន្ទឹមគ្នានេះ លោកចូ បៃដិនបានបញ្ជាក់ថា ទាហានអាមេរិកដែលលោកបានបញ្ជូនទៅអឺរ៉ុប គឺគ្មានកម្មវត្ថុទៅចូលធ្វើអន្តរាគមន៍នៅអ៊ុយក្រែនឡើយ ព្រោះថាអ៊ុយក្រែនមិនមែនជាសមាជិករបស់អូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ