ចិនបដិសេធ មិនឲ្យខ្លួនពាក់ព័ន្ធអ្វីទាំងអស់ ជាមួយនឹងទណ្ឌកម្មរបស់លោកខាងលិចទៅលើរុស្ស៊ី
លោកវ៉ាង យី រដ្ឋមន្ត្រីការបរទេសចិន បានលើកឡើងថា ចិនបដិសេធមិនឲ្យខ្លួនពាក់ព័ន្ធជាមួយទណ្ឌកម្ម ដែលក្រុមប្រទេសលោកខាងលិច បានដាក់ទៅលើរុស្ស៊ីជាដាច់ខាត ព្រោះថាចិន មិនប្រកាន់ជំហរខាងណាមួយឡើយ។ ការលើកឡើងរបស់លោករដ្ឋមន្ត្រីការបរទេសចិននេះ គឺបន្ទាប់ពីមានដំណឹងលេចឮថា រុស្ស៊ីបានទៅសុំជំនួយយោធា និងសេដ្ឋកិច្ចពីចិន។ ហើយនៅទីក្រុងរ៉ូម កាលពីថ្ងៃចន្ទម្សិលមិញ លោក ជែក ស៊ូលីវ៉ាន ទីប្រឹក្សាសន្តិសុខជាតិអាមេរិក បានជួបនិយាយអំពីបញ្ហានេះ ជាមួយលោក យ៉ាង ជែឈី ប្រធានគណកម្មការកិច្ចការបរទេស នៃគណបក្សកុម្មុយនីស្តចិន។
ចុះផ្សាយនៅថ្ងៃ៖
ស្តាប់ - ០២:៤២
ផ្អែកតាមការចុះផ្សាយ របស់ទីភ្នាក់ងារព័ត៌មានផ្លូវការចិន ស៊ីនហ័រ ក្នុងពេលនិយាយទូរស័ព្ទ ជាមួយលោករដ្ឋមន្ត្រីការបរទេសអេស្ប៉ាញ កាលពីល្ងាចថ្ងៃចន្ទទី១៤មីនា លោកវ៉ាង យី បានអះអាងថា ចិនមិនជាប់ពាក់ព័ន្ធអ្វីជាមួយវិបត្តិអ៊ុយក្រែនឡើយ។ ដូច្នេះ ចិនបដិសេធ មិនឲ្យខ្លួនទៅពាក់ព័ន្ធនឹងទណ្ឌកម្ម ដែលក្រុមប្រទេសលោកខាងលិច កំពុងដាក់ទៅលើរុស្ស៊ីនោះទេ។ លោកវ៉ាង យី បានលើកឡើងទៀតថា សម្រាប់ចិន គឺចិនតែងតែប្រឆាំងនឹងការប្រើប្រាស់ទណ្ឌកម្ម ជាមធ្យោបាយដោះស្រាយបញ្ហា ជាពិសេសនោះ គឺទណ្ឌកម្មបែបឯកត្តោភាគី ដោយគ្មានមូលដ្ឋានច្បាប់អន្តរជាតិ។ លោកសង្កត់បន្ថែមថា ចិនមានសិទ្ធិការពារ សិទ្ធិនិងផលប្រយោជន៍ស្របច្បាប់របស់ខ្លួន។
គួររំលឹកថា នៅក្នុងសំណុំរឿងសង្គ្រាមនៅអ៊ុយក្រែន រហូតមកទល់ពេលនេះ គឺចិន មិនបានប្រកាសជំហរថ្កោលទោសរុស្ស៊ីទេ។ តែទន្ទឹមគ្នានេះ ចិនធ្លាប់បានចោទប្រកាន់ក្រុមប្រទេសលោកខាងលិច និងអង្គការអូតង់ ថាជាអ្នកបង្កបញ្ហាមុន។ ទោះចិន អះអាងថាខ្លួនមិនកាន់ជើងខាងណាមួយមែន តែមានការបារម្ភសង្ស័យ ថាចិនអាចប្រកាន់ជំហរនៅខាងរុស្ស៊ី រួចទៅហើយ។
យ៉ាងណាមិញ យោងតាមការចុះផ្សាយរបស់កាសែត The New York Times កាលពីថ្ងៃអាទិត្យ ដោយស្រង់ប្រភពពីមន្ត្រីអាមេរិក គឺរុស្ស៊ីបានងាកទៅសុំជំនួយពីចិន។ ចំណែក កាសែត Financial Times បានចុះផ្សាយលំអិត នៅថ្ងៃចន្ទម្សិលមិញថា រដ្ឋាភិបាលអាមេរិក បានប្រាប់ទៅភាគីសម្ព័ន្ធមិត្តលោកខាងលិចទាំងអស់ ថារុស្ស៊ីពិតជាបានសុំជំនួយយោធាពីចិនមែន ហើយចិនបានឆ្លើយយល់ព្រមហើយ។ ជំនួយយោធាដែលរុស្ស៊ីសុំពីចិន គឺមាន គ្រាប់មីស៊ីល យានដ្រូន រថពាសដែក និងសម្ភារៈបច្ចេកវិទ្យាស៊ើបការណ៍ផ្សេងទៀតផងដែរ។ យ៉ាងណាក៏ដោយ ភាគីចិនបានបដិសេធ ថាវាជាដំណឹងប្រឌិតបោកប្រាស់ ដើម្បីចាប់កំហុសចិន។
ដោយឡែក លោក Hu Xijin អ្នកសរសេរវិចារណកថានៅកាសែតចិន Global Times បានបង្ហោះសារវីដេអូ នៅលើគេហទំព័រកាសែតនេះ កាលពីយប់ថ្ងៃចន្ទ ដោយបានលើកឡើងថា ចិនគ្មានកាតព្វកិច្ចអ្វីត្រូវទៅសន្យាជាមួយអាេមរិក ថានឹងមិនផ្តល់ជំនួយសព្វាវុធទៅឲ្យរុស្ស៊ីនោះឡើយ ហើយអាមេរិកក៏គ្មានសិទ្ធិអ្វីមកដាក់កំហិតចិនដែរ។ អ្នកកាសែតចិនដ៏មានឥទ្ធិពលរូបនេះ បន្ថែមថា ចិនគ្មានបំណងទៅយកចិត្តអាមេរិក ហើយធ្វើឲ្យខូចមិត្តភាពជាមួយរុស្ស៊ីនោះឡើយ៕
សូមបញ្ជាក់ថា កាលពីថ្ងៃចន្ទម្សិលមិញ លោក ជែក ស៊ូលីវ៉ាន ទីប្រឹក្សាសន្តិសុខអាមេរិក បានជួបប្រជុំជាមួយ យ៉ាង ជែឈី នៅទីក្រុងរ៉ូម។ នៅក្នុងជំនួបរយៈពេលប្រមាណ៧ម៉ោងនេះ គឺមិនមានលទ្ធផលអ្វីធំដំឡើយ ដោយភាគីទាំង២មានគោលជំហរមិនស្របគ្នា។ ភាគីអាមេរិក បានអះអាងជាថ្មីថា អាមេរិកនឹងមិនឱបដៃ បណ្តោយឲ្យប្រទេសណាមួយ លួចលាក់ផ្តល់ជំនួយដល់រុស្ស៊ីឡើយ មិនថាចិន ឬនរណាទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ