រុស្ស៊ីគំរាមថា អឺរ៉ុបនឹងពិបាកខ្លួនឯង បើហ៊ានសម្រេចធ្វើពហិការឈប់ទិញប្រេងរុស្ស៊ី
កាលពីថ្ងៃចន្ទទី២១មីនា ក្រុមប្រទេសសហភាពអឺរ៉ុប បានចាប់ផ្តើមជួបប្រជុំគ្នា ដើម្បីលើកឡើង ពីវិធានការទណ្ឌកម្មបន្ថែមទៀត ទៅលើរុស្ស៊ី។ គិតមកទល់ពេលនេះ វិស័យថាមពល មានប្រេង និងហ្កាស របស់រុស្ស៊ី គឺមិនទាន់បានរងទណ្ឌកម្មដោយផ្ទាល់ ពីអឺរ៉ុបនៅឡើយទេ។ ក៏ប៉ុន្តែពេលនេះ មានមតិកាន់តែច្រើន បានទាមទារថាអឺរ៉ុប ត្រូវតែពិចារណា សម្រេចបិទផ្លូវ ឈប់នាំចូលប្រេងរបស់រុស្ស៊ី តទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
តែយ៉ាងណា នេះគឺជាវិធានការ ដែលអឺរ៉ុបពិបាកសម្រេចចិត្តខ្លាំងណាស់ ព្រោះអឺរ៉ុបរំពឹងខ្លាំង លើការនាំចូលប្រេងពីរុស្ស៊ី។ យ៉ាងណាមិញ ក្រោយសង្គ្រាមនៅអ៊ុយក្រែនបានផ្ទុះឡើង តម្លៃប្រេងបានឡើងថ្លៃខ្លាំងនៅអឺរ៉ុប បង្កឲ្យមានចលនាតវ៉ាប្រឆាំងរដ្ឋាភិបាលរួចទៅហើយ ក្នុងពេលបច្ចុប្បន្ននេះ។
ជាមួយគ្នានេះដែរ លោក ឌីមីទ្រី ប៉េឆកូវ អ្នកនាំពាក្យវិមានក្រឹមឡាំងរបស់រុស្ស៊ី បានរំលឹកថា អាមេរិកអាបិទផ្លូវមិនទិញប្រេងរុស្ស៊ីបាន ព្រោះអាមេរិកមិនរងការលំបាកទេ។ តែបើអឺរ៉ុបហ៊ានតែបិទផ្លូវ ឈប់ទិញប្រេងរុស្ស៊ីវិញ គឺអឺរ៉ុបទេដែលជាអ្នកលំបាកខ្លួនឯង។
សម្រង់សំដីរបស់លោក Dimitri Peskov អ្នកនាំពាក្យរដ្ឋាភិបាលរុស្ស៊ី
ទាក់ទិននឹងបញ្ហាតម្លៃប្រេងឡើងថ្លៃនេះដែរ វិបត្តិសង្គ្រាមអ៊ុយក្រែន គឺជាប្រភពនៃការព្រួយបារម្ភមួយហើយ ព្រោះវាប៉ះពាល់ដល់នាំចេញប្រេងរបស់រុស្ស៊ី។ តែទន្ទឹមគ្នានេះ មានការបារម្ភមួយទៀត នៅតំបន់ដើមបូព៌ា គឺការវាយប្រហាររបស់ក្រុមឧទ្ទាមហ៊ូទីយេមែន ដែលអាចវាយប្រហារបំផ្លាញ សមត្ថភាពផលិតប្រេង របស់អារ៉ាប៊ីសាអូឌីត។ ជាក់ស្តែង កាលពីថ្ងៃអាទិត្យម្សិលមិញ ក្រុមឧទ្ទាមហ៊ូទី បានវាយប្រហារ បង្កឲ្យខូចខាតទីតាំងស្ថានីយផលិតប្រេងមួយកន្លែង ធ្វើឲ្យអារ៉ាប៊ីសាអូឌីត សម្រេចចិត្តកាត់បន្ថយការផលិតប្រេង នៅស្ថានីយ៍នេះជាបណ្តោះអាសន្នសិន។
ដំណឹងទាំងនេះ បានធ្វើឲ្យទីផ្សារប្រេងជ្រួលច្របល់ ហើយតម្លៃបានឡើងជាង៣%បន្ថែមទៀត។យោងតាមអ្នកវិភាគទីផ្សារប្រេង លទ្ធភាពនៃការវាយប្រហាររបស់ក្រុមឧទ្ទាមហ៊ូទី មកលើរោងចក្រប្រេងនៅអារ៉ាប៊ីសាអូឌីត ព្រមជាមួយលទ្ធភាពនៃការសម្រេចរបស់អឺរ៉ុប បិទផ្លូវមិនឲ្យរុស្ស៊ីអាចលក់ប្រេងបាន គឺវានឹងរុញតម្លៃប្រេង ឲ្យកាន់តែឡើងខ្ពស់បន្ថែមទៀត ជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ