អង្គការសុខភាពពិភពលោករិះគន់អឺរ៉ុបថាលើកវិធានការកូវីដលឿនជ្រុល
អឺរ៉ុបមិនទាន់ឆ្លងផុតរលកចម្លងកូវីដទី៥ទេ ហើយចំនួនអ្នកវិជ្ជមានកូវីដបានស្ទុះឡើងខ្លាំងជាថ្មីវិញ ជាពិសេសនៅតាមបណ្តាប្រទេសជាច្រើននៅលើទ្វីបអឺរ៉ុប មានអាទិ៍អាល្លឺម៉ង់ បារាំង អ៊ីតាលី អង់គ្លេស...។ បើតាមការថ្ងូចថ្ងូររបស់អង្គការសុខភាពពិភពលោក។នេះបណ្តាលមកពីអ្នកដឹកនាំ នយោបាយប្រទេសនីមួយៗ សម្រេចនាំគ្នាដកវិធានការទប់ស្កាត់ជំងឺកូវីដ១៩ លឿនរហ័សជ្រុលពេក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
បច្ចុប្បន្ននេះ ក្រោមឥទ្ធិពលនៃការបំប្លែងខ្លួនមួយជាន់ទៀតរបស់មេរោគបំប្លែងខ្លួនអូមីក្រុង ករណីវិជ្ជមានកូវីដបានស្ទុះឡើងជាថ្មីក្នុង១៨ប្រទេស នៅលើទ្វីបអឺរ៉ុបដែលមានសរុប៥៣ប្រទេស។ ចំនួនអ្នកឆ្លងកូវីដថ្មីមានកំណើនគួរឱ្យកត់សម្គាល់ខ្លាំង នៅប្រទេស អង់គ្លេស អៀរឡង់ ក្រិក ស៊ីប អ៊ីតាលី និងបារាំង។ នេះបើតាមការគូសបញ្ជាក់ របស់នាយកអង្គការសុខភាពពិភពលោកប្រចាំតំបន់អឺរ៉ុប លោក Hans Kluge នៅក្នុងសន្និសីទកាសែតពីប្រទេសម៉ុលដាវី។ មូលហេតុគឺបណ្តាលមកពីបណ្តាប្រទេសទាំងអស់នេះ លើកវិធានការប្រឆាំងកូវីដ លឿនជ្រុលពេក និងមិនរក្សាទុកវិធានការការពារគ្រប់គ្រាន់។
ពេលនេះអង្គការសុខភាពពិភពលោកប្រចាំតំបន់អឺរ៉ុប កំពុងតាមដានដោយប្រុងប្រយ័ត្នស្ថានភាពចម្លងរាតត្បាតកូវីដលើទ្វីប ប៉ុន្តែអង្គការនៅតែមានសុទិដ្ឋនិយមទេ។
បើតាមទិន្នន័យអង្គការសុខភាពពិភពលោក ករណីឆ្លងថ្មីនៅអឺរ៉ុបបានធ្លាក់ចុះជាគំហុកចាប់ពីចុងខែមករាមក ហើយគ្រាន់តែលើកវិធានការវិញ ករណីវិជ្ជមានកូវីដចាប់ស្ទុះឡើងវិញតាំងពីដើមខែមីនាមក ក្រោមឥទ្ធិពលនៃមេរោគអូមីក្រុងបំប្លែងខ្លួនមួយជាន់ទៀត BA.2 មានអំណាចចម្លងខ្លាំងជាងមេរោគបំប្លែងខ្លួនអូមីក្រុងដើម BA.1 ដល់៣០% តែមិនសូវកំណាច និងខ្សោយជាងមេរោគអូមីក្រុងដើមទេ។ ក្នុងរយៈពេល៧ថ្ងៃ ចុងក្រោយនេះ អឺរ៉ុបរាប់ឃើញមាន អ្នកវិជ្ជមានថ្មី ចំនួនជាង ៥,១លាននាក់ និងស្លាប់១២៤៩៦ នាក់ ឬត្រូវជា ១៩៤,៤លាននាក់ និងស្លាប់ជិត១លាន៩សែននាក់ បើគិតតាំងពីកូវីដចាប់រាតត្បាតដំបូងភ្លាមមក។
តែយ៉ាងណាក៏ដោយ ក៏អ្នកជំនាញអង្គការសុខភាពពិភពលោកអឺរ៉ុប នៅតែមានសុទិដ្ឋនិយម ព្រោះមើលឃើញមានចំណុចវិជ្ជមានជាច្រើនផ្សេង ៖ ប្រជាពលរដ្ឋមានភាពស៊ាំ ដោយបានចាក់ថ្នាំបង្ការរួច និងតាមរយៈការឆ្លងឈឺ ក្នុងចំនួនភាគច្រើនខ្លាំង លែងសូវមានការប្រមូលផ្តុំក្នុងទីបិទជិតដោយរដូវរងារឈានដល់ទីបញ្ចប់ហើយមេឃចាប់ផ្តើមស្រលះល្អ និងជាចុងក្រោយ អូមីក្រុង កម្រធ្វើឱ្យអ្នកបានចាក់វ៉ាក់សាំងពេញលេញធ្លាក់ខ្លួនឈឺធ្ងន់ណាស់។
នាយកអង្គការសុខភាពពិភពលោកប្រចាំតំបន់អឺរ៉ុប មានជំនឿថា អឺរ៉ុបត្រូវបន្តរស់ជាមួយកូវីដ១៩ មួយរយៈទៀត តែអឺរ៉ុបអាចនឹងដោះខ្លួនចេញពីវិបត្តិរាតត្បាតសកលបាន ដោយគ្រាន់តែត្រូវបន្តដោះស្រាយបញ្ហាជាអាទិភាពបួនយ៉ាង គឺ ការពារពលរដ្ឋទន់ខ្សោយ ពង្រឹងការតាមដានមេរោគ ផ្តល់ថ្នាំប្រឆាំងកូវីដឱ្យដល់ប្រទេសផ្សេងៗឱ្យបានកាន់តែច្រើន និងត្រូវដោះបន្ទុកព្យាបាលអ្នកជំងឺក្រោយកូវីដ ឬជំងឺកូវីដរ៉ាំរ៉ៃ “Covid long"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ