សង្រ្គាមអ៊ុយក្រែន៖ រដ្ឋាភិបាលអាល្លឺម៉ង់គ្រោងទិញប្រព័ន្ធខែលមីស៊ីលរបស់អ៊ីស្រាអែល
សង្រ្គាមឈ្លានពានរបស់រុស្ស៊ីនៅអ៊ុយក្រែនបានជំរុញឲ្យរដ្ឋាភិបាលអាល្លឺម៉ង់បង្កើនការចំណាយលើវិស័យកងទ័ព។ នៅថ្ងៃអាទិត្យ ទី ២៧ មីនា ប្រធានគណៈកម្មការការពារជាតិ នៅសភាអាល្លឺម៉ង់បានបញ្ជាក់ការចុះផ្សាយរបស់កាសែតអាល្លឺម៉ង់ដែលថា រដ្ឋាភិបាលអាល្លឺម៉ង់ គ្រោងនឹងទិញប្រព័ន្ធខែលមីស៊ីលរបស់អ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:៣៣
តាមកាសែតប្រចាំថ្ងៃអាល្លឺម៉ង់ Bild រដ្ឋាភិបាលអាល្លឺម៉ង់នៅមិនទាន់សម្រេចចិត្តជាផ្លូវការ ប៉ុន្តែ គណបក្សសង្គមប្រជាធិបតេយ្យរបស់ នាយករដ្ឋមន្រ្តីអាល្លឺម៉ង់ លោកOlaf Scholz បានគាំទ្រឲ្យរដ្ឋាភិបាលទិញប្រព័ន្ធខែលមីស៊ីលអ៊ីស្រាអែល។
លោកAndreas Schwarzសមាជិកគណៈកម្មការថវិការបស់សភា មកពីគណបក្សកាន់អំណាច សង្គមប្រជាធិបតេយ្យបាននិយាយប្រាប់កាសែតBildថា អាល្លឺម៉ង់ត្រូវបង្កើនការការពារខ្លួន នៅចំពោះមុខការគំរាមកំហែងរបស់រុស្ស៊ី និងថា ប្រព័ន្ធខែលមីស៊ីលអ៊ីស្រាអែល Arrow 3 ជាដំណោះស្រាយដ៏ល្អប្រសើរ ពីព្រោះវាជាប្រភេទមីស៊ីលដែលកសាងឡើង ជាពិសេស សម្រាប់បាញ់បំផ្លាញ មីស៊ីលបាលីស្ទិក មីស៊ីលចម្ងាយឆ្ងាយ ដែលប្រព័ន្ធខែលមីស៊ីលធម្មតាគ្មានសមត្ថភាពចាប់ស្ទាក់បាន។
ប្រធានគណៈកម្មការការពារជាតិនៅសភាអាល្លឺម៉ង់ លោកស្រី Marie Agnes Stack Zimmeramnnបានបញ្ជាក់ទៅកាន់កាសែតអាល្លឺម៉ង់មួយទៀត ឈ្មោះ Weltថា ដោយមើលទៅការគំរាមកំហែង និងសព្វាវុធដែលរុស្ស៊ី កំពុងមានក្នុងដៃ វាជារឿងសមហេតុផល ដែលអាល្លឺម៉ង់ត្រូវទិញប្រព័ន្ធខែលមីស៊ីលរបស់អ៊ីស្រាអែល។
តាមកាសែតអាល្លឺម៉ង់ Bild ប្រព័ន្ធខែលមីស៊ីលដែលអាល្លឺម៉ង់ចង់ទិញពីអ៊ីស្រាអែល មានតម្លៃ ជាង ២ពាន់លានអឺរ៉ូ និងអាចចាប់ដំណើរការចាប់ពីឆ្នាំ ២០២៥។ យកគំរូតាមប្រព័ន្ធការពារដែលអាកាសរបស់អ៊ីស្រាអែល ឈ្មោះ Iron Dome ដែលមានសមត្ថភាពទប់ស្កាត់ គ្រាប់រ៉ុកក្កែតរបស់ពួកហាម៉ាសប៉ាឡេស្ទីន អាល្លឺម៉ង់គ្រោងនឹងដាក់ពង្រាយប្រព័ន្ធខែលមីស៊ីល Arrow 3 នៅទីតាំង៣កន្លែងក្នុងប្រទេស។ តាមសមាជិកគណៈកម្មការថវិកានៅសភាអាល្លឺម៉ង់ ប្រព័ន្ធខែលមីស៊ីលArrow 3 អាចមានសមត្ថភាពការពារ គ្របដណ្តប់ប្រទេសជិតខាងរបស់អាល្លឺម៉ង់ ដូចជារូម៉ានី ប៉ូឡូញ និងក្រុមប្រទេសជាប់សមុទ្របាល់ទិក ដែលមានព្រំដែនជាប់រុស្ស៊ី។
បន្ទាប់ពីធ្វេសប្រហែល វិនិយោគតិចតួចក្នុងវិស័យកងទ័ព អាល្លឺម៉ង់ បានចាប់ភ្លឺភ្នែក ស្ទុះស្ទា ទៅបង្កើនថវិកាកងទ័ពឡើងវិញ នៅក្រោយឃើញរុស្ស៊ីចូលធ្វើសង្រ្គាមឈ្លានពានអ៊ុយក្រែន។ នៅថ្ងៃទី ២៧កុម្ភៈ បីថ្ងៃក្រោយ កងទ័ពរុស្ស៊ីចូលឈ្លានពានអ៊ុយក្រែន នាយករដ្ឋមន្រ្តីអាល្លឺម៉ង់ លោកOlaf Scholz បានប្រកាសកញ្ចប់ថវិកាដ៏ច្រើនមិនធ្លាប់មាន ប្រមាណ ១០០ពាន់លានអឺរ៉ូសម្រាប់ធ្វើទំនើបកម្ម ពង្រឹងវិស័យការពារជាតិ។ ប្រមុខរដ្ឋាភិបាលអាល្លឺម៉ង់បានប្រកាសផងដែរថា នឹងបង្កើនការចំណាយសម្រាប់វិស័យកងទ័ពឲ្យបាន២%នៃផលិតផលក្នុងស្រុកសរុប ទៅតាមគោលដៅរបស់អង្គការអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ