ឥណ្ឌានិងអូស្ត្រាលីបានចុះហត្ថលេខាលើកិច្ចព្រមព្រៀងដោះដូរពាណិជ្ជកម្មសេរីបណ្តោះអាសន្ន
ប្រទេសឥណ្ឌានិងអូស្ត្រាលី នៅថ្ងៃសៅរ៍ទី២មេសានេះ បានចុះហត្ថលេខាលើកិច្ចព្រមព្រៀងដោះដូរពាណិជ្ជកម្មសេរី បណ្តោះអាសន្នមួយ ដែលអាចកាត់បន្ថយពន្ធពាណិជ្ជកម្មរាប់ពាន់លានដុល្លារ។ កិច្ចព្រមព្រៀងពាណិជ្ជកម្មសេរីរវាងប្រទេសទាំង២ដែលជាសមាជិកសម្ព័ន្ធចតុភាគី «Quad» គឺជាពង្រឹងទំនាក់ទំនងផ្នែកសេដ្ឋកិច្ច និងអាចជាការបោះជំហានដ៏ស្តួចស្តើងថ្មីមួយដើម្បីរួមគ្នាទប់ទល់ជាមួយចិននៅតំបន់ឥណ្ឌូប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:៤១
កិច្ចព្រមព្រៀងនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មថ្មីមួយរវាងឥណ្ឌានិងអូស្ត្រាលី ត្រូវបានចុះហត្ថលេខាក្នុងពេលដំណាលគ្នានៅទីក្រុងញូវដេលី និងទីក្រុងកង់បេរ៉ា ដោយរដ្ឋមន្ត្រីក្រសួងពាណិជ្ជកម្មនៃប្រទេសទាំង២នៅថ្ងៃសៅរ៍ទី២មេសានេះ។ ជាកិច្ចព្រមព្រៀងដែលបានចាប់ផ្តើមចរចារជាងមួយទសវត្សរ៍មុន ប៉ុន្តែបានជាប់គាំងនៅក្នុងឆ្នាំ២០១៥។ ចំពោះលោករដ្ឋមន្ត្រីពាណិជ្ជកម្មឥណ្ឌា Piyush Goyal ឥណ្ឌានិងអូស្ត្រាលីគឺជាដៃគូធម្មជាតិដែលតភ្ជាប់តម្លៃរួមដោយលទ្ធិប្រជាធិបតេយ្យ នីតិរដ្ឋ និងតម្លាភាព។
ជាមួយនឹងកិច្ចព្រមព្រៀងពាណិជ្ជកម្មបណ្តោះអាសន្នថ្មីនេះ ឥណ្ឌានិងអូស្ត្រាលីនឹងអាចចំណេញការបង់ពន្ធពាណិជ្ជកម្មរាប់ពាន់លានដុល្លារក្នុងមួយឆ្នាំៗ ក្នុងនោះជាង ៨៥ភាគរយរបស់អូស្ត្រាលីទៅកាន់ប្រទេសឥណ្ឌា។ ឥណ្ឌានិងអូស្ត្រាលី ដែលមានព្រំប្រទល់ជាប់មហាសមុទ្រឥណ្ឌា កាលពីឆ្នាំមុន សម្រេចបានពាណិជ្ជកម្មទ្វេភាគីក្នុងទំហំប្រហែល ២៧.៥ពាន់លានដុល្លារ ដោយប្រទេសអូស្ត្រាលីបាននាំចេញសាច់ចៀម ធ្យូងថ្ម និងទំនិញផ្សេងទៀត។ ចំណែកឥណ្ឌាផ្គត់ផ្គង់ផលិតផលសម្រេចនិងសេវាកម្ម។
វាជាការបោះជំហានដ៏ស្តួចស្តើងថ្មីមួយ ដើម្បីទប់ទល់ជាមួយចិននៅតំបន់ឥណ្ឌូប៉ាស៊ីហ្វិក ព្រោះថាឥណ្ឌាគ្រាន់ជាដៃគូពាណិជ្ជកម្មធំជាងគេទី៧របស់អូស្ត្រាលីក្នុងឆ្នាំ២០២០ ដែលមានទំហំពាណិជ្ជកម្មត្រឹមជាង ៤ភាគរយនៃការនាំចេញ។
លោកនាយករដ្ឋមន្ត្រីអូស្ត្រាលី Scott Morrison និងលោកនាយករដ្ឋមន្រ្តីឥណ្ឌា Narendra Modi នៅថ្ងៃទី២មេសានេះ បានរួមគ្នាគូសបញ្ជាក់ពីភាពជិតស្និតរវាងឥណ្ឌាជាមួយអូស្ត្រាលី ដែលបានធ្វើឡើង តាមរយៈការតភ្ជាប់តម្លៃលទ្ធិប្រជាធិបតេយ្យ។ និងបន្តថា ទំនាក់ទំនងនោះគឺជាការឆ្លុះបញ្ជាក់ឱ្យឃើញពីការចូលរួមយុទ្ធសាស្ត្រនៅក្នុងភូមិសាស្ត្រកាន់តែស៊ីជម្រៅ តាមរយៈក្របខណ្ឌសម្ព័ន្ធចតុភាគី «Quad » និងគំនិតផ្តួចផ្តើមភាពធន់នៃសង្វាក់ផ្គត់ផ្គង់ពាណិជ្ជកម្មនានា។ គួរដឹងថា ឥណ្ឌានិងអូស្ត្រាលីជាសមាជិកសម្ព័ន្ធចតុភាគី «Quad» ដែលមានជប៉ុន និងសហរដ្ឋអាមេរិកជាអ្នកផ្តួចផ្តើម ដើម្បីប្រជែងឥទ្ធិពលជាមួយនឹងចិននៅក្នុងតំបន់ឥណ្ឌូប៉ាស៊ីហ្វិក។
សូមជម្រាបថា ទាំងអូស្រ្តាលីនិងឥណ្ឌា គឺមានបញ្ហារកាំរកូសផ្នែកសេដ្ឋកិច្ច ពាណិជ្ជកម្ម និងយោធាជាមួយចិន។ ចិនធ្លាប់មានប្រតិកម្មខឹងសម្បារលើអូស្ត្រាលី ដែលបានចូលរួមបង្កើតច្បាប់ប្រឆាំងប្រតិបត្តិការរារាំងក្រុមហ៊ុនចិន Huawei ពីកិច្ចសន្យាបច្ចេកវិទ្យា 5G និងការអំពាវនាវឱ្យមានការស៊ើបអង្កេតឯករាជ្យលើប្រភពដើមនៃមេរោគកូវីដ១៩។ រីឯជាមួយឥណ្ឌាវិញ ចិនក៏ធ្លាប់ប៉ះទង្គិចផ្នែកយោធានៅតាមព្រំដែនខ្លាំងក្លានារយៈពេលប៉ុន្មានឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ