អង្គការ Oxfam ជំរុញ IMF ឲ្យបោះបង់ចោលនូវលក្ខខណ្ឌតឹងរ៉ឹងនៅក្នុងប្រាក់កម្ចីរបស់ខ្លួន
នៅថ្ងៃអង្គារ ទី១៩ មេសា អង្គការ Oxfam ជំរុញឲ្យមូលនិធិរូបិយវត្ថុអន្តរជាតិបោះបង់ចោលនូវលក្ខខណ្ឌតឹងរ៉ឹងនៅក្នុងប្រាក់កម្ចីរបស់ខ្លួនក្នុងសម័យកូវីដ១៩។ អង្គការក្រៅរដ្ឋាភិបាលមួយនេះបានមើលឃើញថា លក្ខខណ្ឌតឹងរឹងដែល IMF បានដាក់ទៅលើក្រុមប្រទេសមួយចំនួន ពិសេសក្រុមប្រទេសក្រីក្រជាដើមចមនៃកំណើនគ្រោះអត់ឃ្លាន និងភាពក្រីក្រនៅក្នុងលោក។ Oxfam បានរម្លឹកថា កូវីដ១៩ មិនទាន់ចប់ទេ ហើយក្រុមប្រទេសក្រីក្រជាអ្នកដែលកំពុងរងគ្រោះខ្លាំងជាងគេ។
ចុះផ្សាយនៅថ្ងៃ៖
ស្តាប់ - ០២:០១
អង្គការ Oxfam បានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា នៅក្នុងកម្មវិធីប្រាក់កម្ចីរបស់ IMF ទាំង ១៧កម្មវិធីដែលបានចរចាក្នុងឆ្នាំទី២ នៃសម័យកូវីដ១៩ មាន ១៣កម្មវិធីត្រូវបាន IMF ដាក់លក្ខខណ្ឌតឹងរ៉ឹងមួយចំនួន ដូចជាតម្រូវឲ្យដំឡើងពន្ធលើស្បៀងអាហារ ប្រេងសាំង ឬមួយក៏កាត់បន្ថយការចំណាយសាធារណៈ។ តែ Oxfam មិនភ្លេចរម្លឹកទេថាក្នុងឆ្នាំ ២០២០ មានប្រាក់រាប់ពាន់លានដុល្លារត្រូវបាន IMF ផ្តល់បន្ទាន់ឲ្យក្រុមប្រទេសកំពុងអភិវឌ្ឍន៍ខ្ចីដើម្បីទប់ទល់នឹងវិបត្តិកូវីដ១៩ដោយបានដាក់លក្ខខណ្ឌតិចតួច ឬគ្មានលក្ខខណ្ឌសោះតែម្តង។
Oxfam បានបន្ថែមថាថ្មីៗនេះទៀត អគ្គនាយិកា IMF ក៏បានជំរុញអឺរ៉ុបកុំឲ្យចាត់វិធានការសេដ្ឋកិច្ចតឹងតែងដែលអាចបង្កគ្រោះថ្នាក់ដល់ការមានកំណើនសេដ្ឋកិច្ចឡើងវិញ។ តែស្រាប់នៅឆ្នាំ ២០២០ IMF បែរជាត្រឡប់ទៅដាក់លក្ខខណ្ឌតឹងរ៉ឹងលើក្រុមប្រទេសដែលមានចំណូលតិច ឬក្រុមប្រទេសក្រីក្រទៅវិញ នេះជាការមើលឃើញរបស់ Oxfam។ ត្រង់ចំណុចនេះត្រូវបានទីប្រឹក្សានយោបាយ Oxfam លោកណាប៊ីល អាប់ដូយល់ថា IMF មានស្តង់ដារពីរ។ តាមទីប្រឹក្សានយោបាយ Oxfam រូបនេះដដែល វិបត្តិកូវីដ១៩ មិនទាន់ចប់ទេ ហើយក្រុមប្រទេសក្រីក្រជាអ្នកប្រឈមខ្លាំងជាងគេនឹងការឡើងថ្លៃថាមពល និងស្បៀងអាហារ។
នៅក្នុងន័យនេះ លោកណាប៊ីល អាប់ដូបានជំរុញឲ្យ IMF ព្យួរលក្ខខណ្ឌតឹងរ៉ឹងសម្រាប់ប្រាក់កម្ចីដែលបានផ្តល់រួចហើយ និងបង្កើនបន្ថែមនូវប្រាក់កម្ចីបន្ទាន់។ ទន្ទឹមគ្នានេះ លោកណាប៊ីល អាប់ដូក៏បានស្នើឲ្យ IMF ចូលរួមលើកទឹកចិត្តបណ្តាប្រទេសឲ្យដំឡើងពន្ធលើអ្នកមានខ្លាំង និងរោងចក្រសហគ្រាសដើម្បីកាត់បន្ថយវិសមភាពនៅក្នុងសង្គមផង និងដើម្បីទទួលបានចំណូលបន្ថែមផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ