IMF/FMI ៖ ចំណូលដុលក្នុងស្រុករុស្ស៊ី នឹងធ្លាក់ចុះ ៨,៥% ចំណែកអ៊ុយក្រែន អាចធ្លាក់ចុះ៣៥%
ចំណូលដុលក្នុងស្រុក របស់រុស្ស៊ី អាចនឹងធ្លាក់ចុះ ចំនួន ៨,៥% ក្នុងឆ្នាំ២០២២នេះ ដោយសារតែទណ្ឌកម្មសេដ្ឋកិច្ច។ ចំណែក អ៊ុយក្រែនវិញ ចំណូលដុលក្នុងស្រុក អាចនឹងធ្លាក់យ៉ាងគំហុក ប្រមាណជា៣៥%។ នេះបើផ្អែកតាមការព្យាករណ៍ របស់មូលនិធិរូបិយវត្ថុអន្តរជាតិ ចេញផ្សាយកាលពីថ្ងៃអង្គារទី១៩មេសា។ ស្ថាប័ននេះ បានទាញសញ្ញាអាសន្នផងដែរ ថាវិបត្តិសង្គ្រាមនៅអ៊ុយក្រែន កំពុងតែគំរាមស្ថិរភាពទីផ្សារហិរញ្ញវត្ថុពិភពលោកទាំងមូលតែម្តង។
ចុះផ្សាយនៅថ្ងៃ៖
ស្តាប់ - ០២:៣៣
មូលនិធិរូបិយវត្ថុអន្តរជាតិ បានលើកឡើង អំពីការលំបាកក្នុងការព្យាករណ៍ ទាក់ទិននឹងសេដ្ឋកិច្ចអ៊ុយក្រែន ដោយសារតែគ្មានទិន្នន័យច្បាស់លាស់ ស្តីអំពីការខូចខាតទាំងឡាយ ក្នុងវិស័យសេដ្ឋកិច្ច។ តែយ៉ាងណា ស្ថាប័ននេះអះអាងថា សេដ្ឋកិច្ចអ៊ុយក្រែន ក្នុងឆ្នាំ២០២២ អាចនឹងធ្លាក់ចុះខ្លាំងណាស់ ពោលគឺយ៉ាងហោច ៣៥% បើប្រៀបធៀបទៅឆ្នាំមុន។
សង្រ្គាម មិនត្រឹមតែបានបំផ្លាញហេដ្ឋារចនាសម្ព័ន្ធ សំណង់ អាគារ ផ្លូវស្ពាន គ្រប់សព្វនោះទេ តែវាបានកំចាយធនធានមនុស្ស ប្រជាជនជាច្រើនលាននាក់ រត់ភៀសខ្លួនចេញទៅក្រៅប្រទេស។ កត្តាទាំងនេះ នឹងវាយបំបាក់សរសរទ្រូងសេដ្ឋកិច្ច របស់អ៊ុយក្រែន ក្នុងរយៈពេលច្រើនឆ្នាំ ទម្រាំអាចត្រលប់មករកស្ថិរភាពភាព។ នេះបើផ្អែកតាមអ្នកជំនាញ នៃមូលនិធិរូបិយវត្ថុអន្តរជាតិ។
ដោយឡែក ទាក់ទិននឹងសេដ្ឋកិច្ចរុស្ស៊ីវិញ ស្ថាប័ននេះ បានព្យាករណ៍ថា នឹងធ្លាក់ចុះប្រមាណ៨,៥% ក្នុងឆ្នាំ២០២២។ ដោយសារតែទណ្ឌកម្មសេដ្ឋកិច្ច ស្ថាប័នហិរញ្ញវត្ថុ និងធនាគាររុស្ស៊ី មួយចំនួនធំ ត្រូវបានគេហាមឃាត់ មិនឲ្យធ្វើប្រតិបត្តិការធនាគារ។ ទន្ទឹមគ្នានេះ ធនាគារកណ្តាលរបស់រុស្ស៊ី ក៏ត្រូវគេហាមឃាត់ មិនឲ្យប្រើប្រាស់មូលធនរបស់ខ្លួន ដែលមាននៅបរទេស។
ថ្វីបើប្រាក់រូប្ល របស់រុស្ស៊ី ដែលបានធ្លាក់ថ្លៃដល់ទៅ៦០% ហើយពេលនេះ បានកើនតម្លៃមកវិញ ប្រហាក់ប្រហែលនឹងមុនពេលសង្គ្រាមពិតមែន តែអ្នកជំនាញជឿថា សេដ្ឋកិច្ចរុស្ស៊ីនៅតែទន់ខ្សោយខ្លាំងណាស់។ វិស័យឧស្សាហកម្មរុស្ស៊ី កំពុងតែជួបការលំបាកជាខ្លាំង បន្ទាប់ពីក្រុមហ៊ុនអន្តរជាតិធំៗ បានសម្រេចដកខ្លួនចេញជាបន្តបន្ទាប់ ពីទីផ្សាររុស្ស៊ី ជាក់ស្តែងក្នុងវិស័យផលិតរថយន្ត វិស័យយន្តហោះ វិស័យបច្ចេកវិទ្យា និងកសិកម្មផងដែរ។ ទំហំប៉ះពាល់ផ្នែកសេដ្ឋកិច្ចរុស្ស៊ី អាចនឹងកាន់តែមានធំ ប្រសិនបើប្រទេសខ្លះ ដូចជាអាល្លឺម៉ង់ជាដើម សម្រេចចិត្តឈប់ទិញទំនិញថាមពលរបស់រុស្ស៊ី នៅពេលខាងមុខ។
ក្រៅពីនេះ មូលនិធិរូបិយវត្ថុអន្តរជាតិ បានទាញសញ្ញាអាសន្នផងដែរ អំពីផលប៉ះពាល់ដោយផ្ទាល់ និងដោយប្រយោលខ្លះ មកលើទីផ្សារហិរញ្ញវត្ថុអន្តរជាតិ ដោយសារតែសង្គ្រាមនៅអ៊ុយក្រែន។ ទីផ្សារទំនិញវត្ថុធាតុដើម អាចនឹងរង្គោះរង្គើរខ្លាំង បូកបន្ថែមជាមួយការលំបាកក្នុងការរកមូលធនមកវិនិយោគ លើទីផ្សារខ្លះ រួមជាមួយនឹងការព្រួយបារម្ភអំពីការវាយប្រហារតាមប្រព័ន្ធបច្ចេកវិទ្យាថែមទៀត។ ផលប៉ះពាល់ទាំងនេះ អាចជំរុញ ឲ្យតម្លៃវត្ថុធាតុដើម ទំនិញស្បៀងអាហារកាន់តែឡើងថ្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ