អ៊ុយក្រែនបានទទួលយន្តហោះចម្បាំង មកពង្រឹងកម្លាំងយោធាជើងអាកាស
បន្ទាប់ពីបានទទូចសុំអស់ជាច្រើនថ្ងៃខែ នៅទីបំផុត អ៊ុយក្រែនបានទទួលនូវជំនួយជាយន្តហោះចម្បាំង ព្រមទាំងគ្រឿងបន្លាស់ជាច្រើនផ្សេងទៀត មកពង្រឹងកងកម្លាំងយោធាជើងអាកាសរបស់ខ្លួន។ នេះបើតាមការគូសបញ្ជាក់របស់អ្នកនាំពាក្យក្រសួងការពារជាតិអាមេរិក លោក John Kirby កាលពីនៅថ្ងៃអង្គារទី ១៩មេសា ដែលបដិសេធមិនបញ្ជាក់អំពីប្រភេទ ចំនួន និងប្រភពម្ចាស់ជំនួយទេ។
ចុះផ្សាយនៅថ្ងៃ៖
ស្តាប់ - ០១:៥៨
តាំងពីរុស្ស៊ីបើកប្រតិបត្តិការចូលឈ្លានពានអ៊ុយក្រែនភ្លាម ក្រុមលោកខាងលិចតែងបដិសេធរហូតមក មិនទទួលសំណើ ទទូចសុំយន្តហោះចម្បាំងរបស់លោកប្រធានាធិបតី ហ្សេឡេនស្គីទេ។ តែពេលនេះ យន្តហោះចម្បាំង និងគ្រឿងបន្លាស់ បានទៅដល់ដៃយោធាអ៊ុយក្រែនហើយ សម្រាប់បង្កើនសមត្ថភាពយោធា។ ជាយន្តហោះបន្ថែម និងជាគ្រឿងបន្លាស់សម្រាប់យកទៅជួសជុលយន្តហោះចាស់ៗផ្សេងទៀត ឱ្យដំណើរការបានច្រើនជាងមុខ។ “ខ្ញុំអាចនិយាយបានតែត្រឹមនេះ និងមិនអាចប្រាប់ឈ្មោះម្ចាស់ជំនួយ ឬប្រភេទយន្តហោះបានឡើយ”។ នេះជាប្រសាសន៍បញ្ជាក់របស់អ្នកនាំពាក្យក្រសួងការពារជាតិអាមេរិក ដោយសង្កត់ធ្ងន់ថា សហរដ្ឋអាមេរិក ដែលមិនចង់ជាប់ឈ្មោះជាប្រទេសបំបះបំបោរឱ្យមានជម្លោះអ៊ុយក្រែន បានសម្រួលការបញ្ជូនគ្រឿងបន្លាស់ទៅកាន់ទឹកដីអ៊ុយក្រែន ប៉ុន្តែមិន បានបញ្ជូនយន្តហោះទៅឱ្យអ៊ុយក្រែនទេ។
មិនប្រាប់អំពីប្រភេទ មិនបញ្ចេញឈ្មោះប្រទេសម្ចាស់ជំនួយមែន ប៉ុន្តែអ៊ុយក្រែនទំនងជាបានទទួលនូវយន្តហោះផលិតដោយសហភាពសូវៀត ដែលទាហានអ៊ុយក្រែនចេះប្រើស្រាប់។ ពោលគឺអាចជាយន្តហោះចម្បាំងប្រភេទ Mig-29 ដែលមានស្រាប់នៅក្នុងបណ្តាប្រទេសមួយក្តាប់តូចនៅអឺរ៉ុបខាងកើត និងដែលរដ្ឋាភិបាលអ៊ុយក្រែនធ្លាប់ទទូចចង់បាន។ ហើយ អាចជាការបញ្ជូនយន្តហោះសំណល់រុស្ស៊ីពីប៉ូឡូញទៅក្រុងកៀវ ព្រោះមន្ទីរបញ្ចកោណធ្លាប់ពិភាក្សាអំពីចំណុចនេះ តាំងពីដើមមីនាមក តែត្រូវបានសហរដ្ឋអាមេរិកបដិសេធ ខ្លាចក្រែងរុស្ស៊ីខឹងនិងយល់ថាអូតង់លូកដៃ ចូលក្នុងវិបត្តិត្រង់ៗពេក។
កាលពីសប្តាហ៍មុន មូស្គូ បានព្រមានសហរដ្ឋអាមេរិកជាថ្មី ថាការបញ្ជូនអាវុធរសើបៗទៅឱ្យអ៊ុយក្រែន អាចនឹងបង្កឱ្យមានផលវិបាកធ្ងន់ធ្ងរ មើលមិនឃើញ ប៉ះពាល់ដល់សន្តិសុខតំបន់និងអន្តរជាតិ។
បើតាមដំណឹងក្នុងសារព័ត៌មាន សហរដ្ឋអាមេរិកកំពុងត្រៀមរៀបចំបញ្ជូនជំនួយយោធាមួយវគ្គថ្មីទៀត។ លោក ប្រធានាធិបតី ចូ បៃដិន ក៏បានបញ្ជាក់រួចហើយដែរ អំពីគម្រោងបញ្ជូនកាំភ្លើងធំទៅឱ្យអ៊ុយក្រែនឱ្យបានច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ