លោកម៉ាក្រុងស្បថចូលកាន់តំណែងប្រធានាធិបតីបារាំង សម្រាប់អាណត្តិ៥ឆ្នាំតទៅទៀត
នៅប្រទេសបារាំង លោកអេម៉ានុយអែល ម៉ាក្រុងបានស្បថ ចូលកាន់តំណែងជាប្រធានាធិបតីបារាំងមួយអាណត្តិទៀត។ នៅក្នុងពិធីស្បថចូលកាន់តំណែង នៅវិមានប្រធានាធិបតី នៅថ្ងៃសៅរ៍នេះ មានការចូលរួមពីឥស្សរជននយោបាយជាន់ខ្ពស់របស់បារាំង ដែលក្នុងនោះមានផងដែរ អតីតប្រធានាធិបតីបារាំង ដូចជាលោកហ្វ្រង់ស័រហូឡង់ និងលោកនីកូឡា សាកូហ្ស៊ី។ សម្រាប់អាណត្តិ៥ឆ្នាំ ខាងមុខ លោកប្រធានាធិបតីម៉ាក្រុងនឹងអាចប្រឈម ជួបឧបសគ្គច្រើន ក្នុងដឹកនាំប្រទេស ជាពិសេស ក្នុងករណីដែលគណបក្សរបស់លោកមិនអាចទទួលជ័យជំនះលើសលុប នៅក្នុងការបោះឆ្នោតសភា នៅខែមិថុនាខាងមុខ។ គ្មានសំឡេងភាគច្រើន នៅរដ្ឋសភា លោកម៉ាក្រុងត្រូវបង្ខំចិត្តបង្កើតរដ្ឋាភិបាលចម្រុះជាមួយគណបក្សប្រឆាំង។
ចុះផ្សាយនៅថ្ងៃ៖
សម្រាប់ពិធីស្បថចូលកាន់តំណែងប្រធានាធិបតីបារាំងអាណត្តិទី ២ វិមានប្រធានាធិបតីបារាំងបានរៀបចំកម្មវិធីតូច មិនសូវអធិកអធម ដូចកាលពី៥ឆ្នាំមុន។ នៅវិមានប្រធានាធិបតី លោកអេម៉ានុយអែលម៉ាក្រុងបានស្បថចូលកាន់តំណែងប្រធានាធិបតី បារាំង សម្រាប់អាណត្តិទី ២ នៅក្រោមក្រសែភ្នែករបស់អតីតប្រធានាធិបតីបារាំង អតីតនាយករដ្ឋមន្រ្តី និងរដ្ឋមន្រ្តី ក្រុមគ្រូពេទ្យ កងទ័ព និងអ្នកតំណាងអង្គការសមាគម សរុបជាង៤៥០នាក់។
ថ្លែងនៅក្នុងពិធីស្បថចូលកាន់តំណែងនៅថ្ងៃសៅរ៍នេះ លោកម៉ាក្រុងបាននិយាយសន្យាដឹកនាំប្រទេសបារាំង ដោយប្រើវិធីសាស្រ្តថ្មី តាមរយៈការរៀបចំការធ្វើកំណែទម្រង់ ដោយមានការចូលរួមពីប្រជាជនបារាំង។ លោកម៉ាក្រុងបានសន្យាផងដែរថា នឹងប្រែក្លាយប្រទេសបារាំងឲ្យខ្លាំងពូកែ ឲ្យក្លាយជាទីកន្លែងដែលគេអាចរស់នៅបាន។
លោកអេម៉ានុយអែល ម៉ាក្រុង ស្បថចូលកាន់តំណែងប្រធានាធិបតី នៅថ្ងៃសៅរ៍នេះមែន ប៉ុន្តែ អាណត្តិប្រធានាធិបតីរបស់លោកនឹងចាប់ផ្តើមជាផ្លូវការ សប្តាហ៍ក្រោយ ពោលគឺចប់អាណត្តិរដ្ឋាភិបាលចាស់ នៅថ្ងៃទី ១៣ឧសភា។
មួយវិញទៀត ទោះអាណត្តិដឹកនាំរបស់លោកម៉ាក្រុងនឹងចាប់ផ្តើមនៅសប្តាហ៍ថ្មី ប៉ុន្តែ គេនៅមិនទាន់ច្បាស់ថា បារាំង នឹងមានរដ្ឋាភិបាលថ្មីភ្លាមៗដែរ ព្រោះថា រហូតមកដល់ពេលនេះ លោកម៉ាក្រុង នៅមិនទាន់បង្ហាញឈ្មោះ បេក្ខជនដែលលោកត្រូវជ្រើសរើសជានាយករដ្ឋមន្រ្តី សម្រាប់ដឹកនាំរដ្ឋាភិបាលថ្មីនៅឡើយទេ។
ទោះឈ្នះដាច់មុខគូប្រកួតប្រជែងមកពីគណបក្សស្តាំនិយមជ្រុល នៅក្នុងអំឡុងបោះឆ្នោតប្រធានាធិបតី ប៉ុន្តែ លោកម៉ាក្រុង កំពុងប្រឈមនឹងការរៀបចំបង្កើតរដ្ឋាភិបាលចម្រុះ ជាមួយគណបក្សប្រឆាំង នៅក្នុងករណីដែលគណបក្សរបស់លោកមិនអាចទទួលជ័យជំនះ នៅក្នុងការបោះឆ្នោតជ្រើសរើសសមាជិកសភា នៅខែមិថុនាខាងមុខ។ គេវាយតម្លៃថា គណបក្សឆ្វេងនិយមជ្រុលដែលកំពុង ដើរបញ្ចុះបញ្ចូល បង្រួបបង្រួមជាមួយគណបក្សធំៗដូចជា គណបក្សឆ្វេងនិយម PS និង គណបក្សបរិស្ថាន គណបក្សកុម្មុយនិស្ត ជាដើមនោះ នឹងអាចទទួលបានសំឡេងភាគច្រើន នៅក្នុងការបោះឆ្នោតសភា បារាំង ហើយនិងអាចមានសិទ្ធិទៅបង្កើតរដ្ឋាភិបាលចម្រុះជាមួយ គណបក្សរបស់លោកប្រធានាធិបតីម៉ាក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ