អ៊ុយក្រែនអះអាងថា បានបាញ់ពន្លិចនាវាចម្បាំងមួយគ្រឿងរបស់រុស្ស៊ី
អ៊ុយក្រែនបានបង្ហាញមោទនភាពរបស់ខ្លួន នៅបន្ទាប់ពីបានពន្លិចនាវាចម្បាំងមួយគ្រឿងរបស់រុស្ស៊ី នៅក្នុងសមុទ្រខ្មៅ។ ជាមួយវីដេអូបង្ហោះផ្សាយនៅលើបណ្តាញសង្គម ហ្វេសប៊ុកកាលពីថ្ងៃសៅរ៍ទី ៧ឧសភា កងទ័ពជើងទឹកអ៊ុយក្រែន បានអះអាងថា គេបានបាញ់ពន្លិចនាវាចម្បាំង និងបំផ្លាញ ប្រព័ន្ធមីស៊ីលការពារដែនអាកាសដែលរុស្ស៊ីកំពុងដឹកយកទៅបំពាក់ឲ្យកោះពស់ ដែលកងទ័ពរុស្ស៊ីវាយដណ្តើម ចូលគ្រប់គ្រងតាំងពីគ្រាដំបូងនៃសង្រ្គាមឈ្លានពានអ៊ុយក្រែន។
ចុះផ្សាយនៅថ្ងៃ៖
កងទ័ពអ៊ុយក្រែនមានមោទនភាព ដែលបានបាញ់បំផ្លាញទីតាំងយោធារបស់កងទ័ពរុស្ស៊ី។ តាមក្រសួងការពារជាតិអ៊ុយក្រែន គេបានប្រើយន្តហោះដ្រូន ទៅបានបាញ់ពន្លិច នាវាចម្បាំងមួយគ្រឿង ដែលចតនៅកំពង់ផែកោះពស់ ក្នុងសមុទ្រខ្មៅ។ តាមកងទ័ពជើងទឹកអ៊ុយក្រែន យន្តហោះដ្រូន ដែលផលិតឡើងនៅប្រទេសតួកគី បានបាញ់បំផ្លាញផងដែរ ប្រព័ន្ធមីស៊ីលការពារដែនអាកាសរបស់រុស្ស៊ី នៅលើកោះពស់។
កោះពស់ ក្នុងសមុទ្រខ្មៅ ជានិមិត្តរូបនៃការតស៊ូប្រយុទ្ធ មិនចុះចាញ់របស់កងទ័ពអ៊ុយក្រែន ព្រោះថា នៅដើមដំបូងនៃសង្រ្គាមឈ្លានពានរបស់រុស្ស៊ី កាលពីចុងខែកុម្ភៈ កងទ័ពអ៊ុយក្រែន ដែលប្រចាំការនៅលើកោះពស់ ធ្លាប់បានបដិសេធ មិនព្រមទម្លាក់អាវុធ តាមការដាក់ឱសានវាទរបស់រុស្ស៊ី។ នៅទីបំផុត កងទ័ពរុស្ស៊ីបានវាយសង្រ្គប់ ចូលគ្រប់គ្រងកោះពស់ និងចាប់ទាហានអ៊ុយក្រែន ទាំងនោះជាចំណាប់ខ្មាំង។ ពួកគេត្រូវបានដោះលែងមកវិញ បន្ទាប់ពីអ៊ុយក្រែនសុខចិត្តដោះលែងទាហានឈ្លើយសឹករុស្ស៊ី។
នៅសារទ្វីតធ័រកាលពីថ្ងៃសៅរ៍ ក្រសួងការពារជាតិអ៊ុយក្រែនបានសរសេរចំអកដាក់រុស្ស៊ីថា នៅឆ្នាំនេះ នាវាចម្បាំងរុស្ស៊ីដែលប្រចាំការនៅកោះពស់នឹងចូលរួមអបអរ បុណ្យជ័យជំនះថ្ងៃទី ៩ឧសភា តាំងពីបាតសមុទ្រ។ មានប្រវែង ២៦ម៉ែត្រ នាវាចម្បាំង ឈ្មោះ Sernaដែល កងទ័ពអ៊ុយក្រែនអះអាងថា បានបាញ់ពន្លិច កាលពីថ្ងៃម្សិលមិញ មាននាទីដឹកជញ្ជូនកងទ័ព និង គ្រឿងសព្វាវុធ ទៅដាក់នៅលើកោះពស់។ នៅដើមខែនេះ កងទ័ពអ៊ុយក្រែនបានប្រកាសដែរថា បានបាញ់ពន្លិចកប៉ាល់ល្បាតពីរគ្រឿងរបស់រុស្ស៊ី នៅក្បែរកោះពស់។
នៅក្រោយការចុះផ្សាយរបស់កងទ័ពអ៊ុយក្រែន ភាគីរុស្ស៊ីនៅមិនទាន់អត្ថាធិប្បាយអ្វីនៅឡើយទេ។ នៅពាក់កណ្តាលខែមេសា រុស្ស៊ីធ្លាប់បានបាត់បង់នាវាចម្បាំងយុទ្ធសាស្រ្តរបស់ខ្លួន នៅសមុទ្រខ្មៅ។ តាមអាមេរិក និងកងទ័ពអ៊ុយក្រែន គឺមីស៊ីលរបស់អ៊ុយក្រែនដែលបានបាញ់ពន្លិចនាវាចម្បាំង Moskva ប៉ុន្តែ ម៉ូស្គូវិញបានលើកមូលហេតុថា គឺអគ្គិភ័យ នៅកន្លែងស្តុកអាវុធ ដែលធ្វើឲ្យនាវាចម្បាំងឆេះលិចក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ