អុតស្វា៖ អាជ្ញាធរសុខាភិបាលបារាំងចេញអានុសាសន៍ឲ្យចាក់វ៉ាក់សាំងដល់អ្នកពាក់ព័ន្ធ
រដ្ឋមន្រ្តីក្រសួងសុខាភិបាលបារាំងបានឲ្យដឹង នៅថ្ងៃពុធនេះថា គិតរហូតមកទល់នឹងពេលនេះ បារាំងបានរកឃើញករណីឆ្លងជំងឺអុតស្វាចំនួន ៥ករណី ហើយថា រដ្ឋាភិបាលបារាំងនឹងធ្វើតាមអានុសាសន៍របស់អាជ្ញាធរជាន់ខ្ពស់សុខាភិបាល ដែលចេញកាលពីថ្ងៃអង្គារ កំណត់ឲ្យចាក់វ៉ាក់សាំងដល់រាល់អ្នកដែលជាប់ពាក់ព័ន្ធនឹងអ្នកឆ្លងអុតស្វា។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមអានុសាសន៍របស់អាជ្ញាធរជាន់ខ្ពស់សុខាភិបាលបារាំង ចេញកាលពីថ្ងៃអង្គារ ២៤ឧសភា ការចាក់វ៉ាក់សាំងត្រូវធ្វើឡើង នៅក្នុងរយៈពេល ៤ថ្ងៃក្រោយពីពាក់ព័ន្ធជាមួយនឹងអ្នកឆ្លងអុតស្វា និងមិនឲ្យលើសពី ១៤ថ្ងៃក្រោយ ដោយការចាក់វ៉ាក់សាំងនេះត្រូវធ្វើពី ២ ទៅ ៣ដូស ហើយពីមួយដូសទៅមួយដូសត្រូវមានគម្លាតគ្នារយៈពេល ២៨ថ្ងៃ។
រដ្ឋមន្រ្តីក្រសួងសុខាភិបាលបារាំងបានឲ្យដឹងថា នៅក្នុងពេលបច្ចុប្បន្ននេះ បារាំងមានវ៉ាក់សាំងក្នុងស្តុកគ្រប់គ្រាន់ ដើម្បីទប់ទល់នឹងការឆ្លងរាលដាលជំងឺអុតស្វានេះ។ ចំណែកអ្នកជំនាញខាងវេជ្ជសាស្ត្របារាំងវិញបានលើកឡើងថា ស្ថានភាពឆ្លងរាលដាលជំងឺអុតស្វានៅពេលនេះ វានៅមិនទាន់ដល់កម្រិតធ្ងន់ធ្ងរដែលត្រូវនាំគ្នាច្រួលច្របល់នោះទេ ក៏ប៉ុន្តែ ការកំណត់ឲ្យចាក់វ៉ាក់សាំងបង្ការ ដែលធ្វើឡើងដោយអាជ្ញាធរសុខាភិបាលនៅពេលនេះ គឺជាការសម្រេចមួយត្រឹមត្រូវ ដែលអាចនឹងជួយទប់ស្កាត់ការឆ្លងរាលដាលកាន់តែខ្លាំង។
លោក ប៉ាទ្រិច ប៊ែរស្ហ៍ (Patrick Berche) សាស្ត្រាចារ្យនៅសកលវិទ្យាល័យប៉ារីស បានលើកឡើងថា៖
“នេះជាវិធានការបង្ការទុកជាមុន ដែលអាចនឹងជួយទប់ស្កាត់ការរីករាលដាលមេរោគ។ ភាពចម្លែកមួយ នៅក្នុងការរីករាលដាលមេរោគអុតស្វានៅពេលនេះ គឺវាឆ្លងនៅតាមបណ្តាប្រទេសជាច្រើន នៅក្នុងពេលតែមួយ ដែលយើងនៅមិនទាន់យល់ថា មកពីមូលហេតុអ្វីពិតប្រាកដ តែយើងអាចមើលឃើញថាវាជារឿងខុសពីប្រក្រតី។
បច្ចុប្បន្ននេះ កំពុងតែមានការស៊ើបអង្កេតរកប្រភពដើមនៃការឆ្លងអុតស្វានេះ ក៏ប៉ុន្តែ មកទល់ពេលនេះ យើងឃើញថា ក្រៅពីករណីឆ្លងនៅអង់គ្លេសមួយករណី ដែលអ្នកជំងឺធ្លាប់ធ្វើដំណើរទៅប្រទេសនីហ្សេរីយ៉ា ក្រៅពីនេះ ជាអាទិ៍ ករណីឆ្លងនៅបារាំង និងករណីឆ្លងភាគច្រើននៅអាមេរិក គឺអត់មានជាប់ពាក់ព័ន្ធណាសោះនឹងតំបន់អាហ្វ្រិក។
ដូច្នេះ សំណួរត្រូវចោទឡើងថា តើការឆ្លងរាលដាលមេរោគអុតស្វានៅពេលនេះ មានប្រភពដើមចេញមកពីណា? មេរោគប្រហែលជាមានប្រភពចេញពីសត្វ ក៏ប៉ុន្តែ ហេតុអ្វីបានជាភ្លាមៗ ស្រាប់តែត្រូវឆ្លងរាលដាលពីមនុស្សទៅមនុស្ស នៅក្នុងប្រទេសច្រើនផ្សេងៗគ្នាបែបហ្នឹង? នេះហើយជាចំណុចដែលគួរឲ្យឆ្ងល់!
តែស្ថានភាពឆ្លងរាលដាលពេលនេះ ក៏វានៅមិនទាន់ដល់កម្រិតដែលគួរឲ្យព្រួយបារម្ភនៅឡើយនោះដែរ ដូច្នេះ តាមយោបល់ខ្ញុំ យើងមិនត្រូវបង្កការច្រួលច្របល់ទៅដល់ប្រជាជនទេ ក៏ប៉ុន្តែ យើងក៏មិនត្រូវប្រហែសដែរ! អ៊ីចឹងហើយបានជាខ្ញុំឯកភាពនឹងអានុសាសន៍ ដែលកំណត់ឲ្យចាក់វ៉ាក់សាំងដល់អ្នកជាប់ពាក់ព័ន្ធនឹងអ្នកឆ្លងអុតស្វានេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ