កាតា ជ្រើសរើសក្រុមហ៊ុនបារាំង ដើម្បីគម្រោងថ្មីផលិតឧស្ម័នធម្មជាតិ
ពីក្រុងដូហា ថ្ងៃអាទិត្យ ទី១២មិថុនា, រដ្ឋមន្ត្រីក្រសួងថាមពលជាតិកាតា ប្រកាសថាបានសម្រេចជ្រើសរើសក្រុមហ៊ុនបារាំង ដើម្បីសហការរកស៊ីផលិតឧស្ម័ន ក្នុងគម្រោងថ្មីរួមគ្នា។ នេះជំហានថ្មីមួយ ឋិតក្នុងបរិបទដែលប្រទេសបច្ចិមលោកស្វះស្វែងរកប្រភពថាមពលនិងឧស្ម័នថ្មី ដើម្បីខំជៀសវាងពីការបញ្ជាទិញឧស្ម័នរុស្ស៊ី។ រុស្ស៊ីដែលត្រូវប្រទេសបច្ចិមលោក កំពុងតែនាំគ្នាធ្វើពហិការផ្អាកទិញថាមពលឧស្ម័ន ព្រោះតែសំណុំរឿងធ្វើសង្គ្រាមឈ្លានពានអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៥១
រដ្ឋមន្ត្រីក្រសួងថាមពលកាតា លោក Saad Sherida Al-Kaabi ជាអគ្គនាយកក្រុមហ៊ុនរដ្ឋ QatarEnergy មានប្រសាសន៍ថា «ខ្ញុំសប្បាយរីករាយ សូមប្រកាសជម្រាបពីការជ្រើសរើសយក ក្រុមបារាំង TotalEnergies ធ្វើជាដៃគូសហការ ទី១ សម្រាប់គម្រោងថ្មី នៅតំបន់ North Field ខាងកើត»។ នេះគឺការសេចក្តីថ្លែងនៅចំពោះមុខអ្នកកាសែត និងចំពោះមុខអគ្គនាយកក្រុមហ៊ុនTotalEnergies លោក Patrick Pouyanne។ ជាមួយនឹងគ្នានេះ លោកអ្នកតំណាងក្រុមហ៊ុនបារាំង ក៏មានប្រសាសន៍ដែរថា «គម្រោងដៃគូសហការថ្មីនេះ នឹងអនុញ្ញាតឲ្យយើងបំពេញតម្រូវការឧស្ម័ននៅក្នុងសកលលោក ហើយជាមួយនឹងប្រទេសកាតា យើងនឹងចូលរួមពង្រឹងសុវត្ថិភាពថាមពលនៅអឺរ៉ុបទៀតផង។»
គួរជ្រាបថា ក្រុមហ៊ុនបារាំងនេះ បានធ្លាប់រកស៊ីវិស័យថាមពលជាមួយកាតាប្រមាណ៣០រួចមកហើយ។ ចំណែកឯ ឧស្ម័នធម្មជាតិ នៅតំបន់ North Field ខាងកើត គឺល្បីល្បាញណាស់ ដែលគេដឹងថា នៅតំបន់នេះ មានឧស្ម័នធម្មជាតិ ប្រមាណជា១០%នៃពិភពលោក ឋិតនៅក្រោមបាតសមុទ្រនិងបែងចែងរវាងកាតានិងអ៊ីរ៉ង់។ តែអ៊ីរ៉ង់ត្រូវទទួលរងទណ្ឌកម្មអន្តរជាតិ ក៏ពុំអាចអនុញ្ញាតឲ្យអ៊ីរ៉ង់ចម្រាញ់ផលិតឧស្ម័នទីនេះបានស្រួលបួលនៅឡើយ។
ចំពោះដំណើរការចម្រាញ់ផលិតឧស្ម័នធម្មជាតិ នៅក្នុងតំបន់ North Field ខាងកើត ដែលនឹងធ្វើឡើងរវាងក្រុមហ៊ុនបារាំងនិងកាតានេះ គឺរដ្ឋមន្ត្រីថាមពលកាតា បញ្ជាក់ថា បារាំងបានទទួលបញ្ជាទិញរួចហើយ ៣២លានតោនឧស្ម័ន ហើយក្រុមហ៊ុនពីរប្រទេសនេះនឹងបង្កើនចំនួនបន្ថែមទៀត ពី៧៧លានតោន ទៅ ១២៧លានតោនឧស្ម័ន ពីពេលនេះដល់ឆ្នាំ២០២៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ