បារាំងបញ្ជាក់ពីការពង្រឹងនិងធ្វើទំនើបកម្មសមត្ថភាពយោធា នៅអាស៊ីប៉ាស៊ីហ្វិក
នៅក្នុងកិច្ចប្រជុំកំពូលសន្តិសុខ Dialogue of Shangri-La នៅសិង្ហបុរី រដ្ឋមន្រ្តីការពារចិនបានបញ្ជាក់ជាថ្មី នាថ្ងៃអាទិត្យនេះ ពីការធ្វើអ្វីៗគ្រប់យ៉ាងដើម្បីរារាំងតៃវ៉ាន់មិនឲ្យប្រកាសឯករាជ្យ។ ចំណែកនាយករដ្ឋមន្រ្តីតៃវ៉ាន់បានប្រកាសពីការត្រៀមខ្លួនចរចាជាមួយចិនដោយឈរលើគោលការណ៍ស្មើគា្ន និងគ្មានលក្ខខណ្ឌនយោបាយ។ ដោយឡែក រដ្ឋមន្ត្រីថ្មីនៃក្រសួងការពារជាតិបារាំង លោក សេបាស្យាង ឡឺក័រនុយ (Sébastien Lecornu) ក៏បានចូលរួមកិច្ចប្រជុំនេះដែរ ហើយរដ្ឋមន្ត្រីការពារជាតិបារាំង បានបញ្ជាក់ពីការពង្រឹងនិងធ្វើទំនើបកម្មសមត្ថភាពយោធារបស់ខ្លួន ដែលដាក់ពង្រាយនៅតំបន់អាស៊ីប៉ាស៊ីហ្វិក។ ហេតុអ្វីបានជាបារាំងគិតថាសំខាន់ដែលត្រូវពង្រឹងកម្លាំងនៅតំបន់អាស៊ីប៉ាស៊ីហ្វិក?
ចុះផ្សាយនៅថ្ងៃ៖
ស្តាប់ - ០១:៥៦
អ្នកជំនាញលោក អេម៉ានុយអែល វ៉េរ៉ុង ដែលជាអ្នកជំនាញស្រាវជ្រាវនិងជាសាស្ត្រាចារ្យ នៅសាលាជាតិជាន់ខ្ពស់ខាងកងទ័ពជើងទឹកបារាំង (Ecole navale) មានប្រសាសន៍យ៉ាងដូច្នេះ។
«ស្នូលនៃសំណុំរឿងនៅតំបន់អាស៊ីប៉ាស៊ីហ្វិក គឺវាទាក់ទិននឹងបញ្ហាដែនអធិបតីភាព។ មិនថា នៅកោះ Réunion នៅមហាសមុទ្រឥណ្ឌា, មិនថា នៅហៃទី នៅអាស៊ីប៉ាស៊ីហ្វិក មិនថា នៅដែនដីនូវេលកាឡេដូនី មិនថានៅអូសេអានី ក្តីទេ! រឿងនេះ គឺវាមានជាប់ពាក់ព័ន្ធនឹងដែនអធិបតីភាពនៃដែនដីបារាំងនៅតំបន់ដែនដីឯនាយសមុទ្រ ដែល បារាំង មានដាក់ពង្រាយកងកម្លាំងមួយចំនួននៅទីនោះស្រាប់។
ដូច្នេះ កិច្ចការជាអាទិភាពសម្រាប់ពេលនេះ បារាំងមានឆន្ទៈពង្រឹងសមត្ថភាព និងពង្រឹងមធ្យោបាយ ហើយ បារាំង ក៏មានចេតនាបង្កើនវត្តមាន និងបង្កើតកម្លាំងនៅក្នុងតំបន់ តាមរយៈការធ្វើសមយុទ្ធយោធារួមគ្នា ជាមួយប្រទេសជាដៃគូសហការ នៅក្នុងតំបន់ ។ នេះក៏ដើម្បីគាំទ្រនិងគាំពារចំពោះគោលការណ៍ពហុភាពនិយម។ ជំហរនេះ ក៏វាស្របពេលដែលត្រូវទប់ទល់នឹងឥទ្ធិពលចិន ដែលសាយភាពក្នុងតំបន់អន្តរជាតិ។
ចិន ដែលត្រូវគេចង្អុរមុខជាញឹកញយ ជុំវិញឥទ្ធិពលនិងការគំរាមកំហែងរបស់យក្សចិន នៅក្នុងតំបន់ ហើយដែលត្រូវគេទាមទារឲ្យគោរពច្បាប់អន្តរជាតិ។ ខ្ញុំសំដៅដល់ បញ្ហាសមុទ្រចិន,បញ្ហាគំរាមកំហែងកាន់តែខ្លាំងឡើងៗពីសំណាក់ចិនចំពោះកោះតៃវ៉ាន់, បញ្ហាជំម្លោះពាក់ព័ន្ធនឹងការនេសាទ ហើយនិងការរុករកធនធានធម្មជាតិបាតសមុទ្រ។
ប្រឈមមុខនឹងសំណុំរឿងជាច្រើនដែលរស៊ើប និងប្រឈមមុខខ្លាំង ទាំងអស់នេះហើយ ដែលវានាំឲ្យចោទជាចំណោទ ជុំវិញការត្រូវតែធានាការពារសន្តិសុខសុវត្ថិភាព និងដែលជំរុញ ឆន្ទៈឲ្យ បារាំង ត្រូវពង្រឹងវត្តមាននៅអាស៊ីប៉ាស៊ីហ្វិក។ ហើយប្រសិនបើ បារាំង ចង់ពង្រឹងវត្តមាននៅទីនេះ ឲ្យជាប់លាប់យូរនោះគឺ បារាំងត្រូវតែបំពាក់បំប៉ន់ខ្លាំងបំផុត ខាង សមត្ថភាពយោធា។»
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ