សហភាពអឺរ៉ុប សន្យាផ្តល់ចម្លើយក្នុងមួយសប្តាហ៍ចំពោះសំណើរបស់អ៊ុយក្រែន សុំចូលជាសមាជិក
ប្រធានគណៈកម្មការសហភាពអឺរ៉ុប អ្នកស្រី អួរស៊ូឡា វ៉ុនឌែរ ឡេយែន (Ursula von der Leyen) បានទៅបំពេញទស្សនកិច្ច នៅក្នុងទីក្រុងកៀវ ប្រទេសអ៊ុយក្រែន នាថ្ងៃសៅរ៍ ទី១១មិថុនា។ ក្នុងជំនួបជាមួយប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី (Volodymyr Zelensky), អ្នកស្រី អួរស៊ូឡា វ៉ុនឌែរ ឡេយែន បានសន្យានឹងផ្តល់ចម្លើយក្នុងមួយសប្តាហ៍ខាងមុខ លើសំណើសុំចូលជាសមាជិកសហភាពអឺរ៉ុបរបស់អ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៥២
បើគិតតាំងពីពេលដែលរុស្ស៊ីវាយសម្រុកចូលអ៊ុយក្រែន ជាងបីខែមក, ពេលនេះ គឺជាលើកទី២ហើយ ដែលប្រធានគណៈកម្មការសហភាពអឺរ៉ុបអ្នកស្រី អួរស៊ូឡា វ៉ុនឌែរ ឡេយែន បានធ្វើដំណើរចុះទៅដល់រដ្ឋធានីកៀវ។ នៅក្នុងសន្និសីទកាសែតខ្លីរួមគ្នាជាមួយប្រធានាធិបតីអ៊ុយក្រែន, អ្នកស្រី អួរស៊ូឡា វ៉ុនឌែរ ឡេយែន បានថ្លែងថា «យើងចង់គាំទ្រអ៊ុយក្រែននៅក្នុងដំណើររួមជាមួយសហភាពអឺរ៉ុប»និងប្តេជ្ញាគាំទ្រអ៊ុយក្រែនដើម្បីសម្រេចមហិច្ឆតានេះ។
តាមគម្រោង គឺចាប់ពីថ្ងៃអាទិត្យតទៅ គណៈកម្មការសហភាពអឺរ៉ុបនឹងត្រូវជជែកពិភាក្សាគ្នា ហើយនិងត្រូវផ្តល់ចម្លើយមួយ ជាយោបល់ឬអនុសាសន៍ ទៅអ៊ុយក្រែនវិញ យ៉ាងយូរ នៅថ្ងៃសុក្រ ខាងមុខ។ ទោះជាម្តេចក្តី គេមើលឃើញថា មានចំនួនភាគរយច្រើន ដែលប្រធានគណៈកម្មការសហភាពអឺរ៉ុប អ្នកស្រី អួរស៊ូឡា វ៉ុនឌែរ ឡេយែន ច្បាស់ជាគាំទ្រអ៊ុយក្រែនឲ្យមាន«លក្ខន្តិកៈជារដ្ឋស្នើសុំចូលសមាជិក»។ ក៏ប៉ុន្តែ អ្នកដែលសម្រេច គឺ បណ្តាប្រមុខរដ្ឋនិងប្រមុខរដ្ឋាភិបាល ទាំង២៧ប្រទេស ដែលនឹងត្រូវជួបប្រជុំកំពូលនៅថ្ងៃទី២៣មិថុនាខាងមុខ ហើយការសម្រេចនោះទៀតសោត គឺត្រូវធ្វើឡើង ជា«ឯកឆ្ឆ័ន្ទ»។
នៅពេលនេះ ប្រធានាធិបតីប៉ុឡូញនិងលីទុយអានី បានសម្តែងឆន្ទៈផ្តល់ភ្លើងខៀវស្រេចហើយ។ ក៏ប៉ុន្តែ ដាណឺម៉ាក់ និង ហូឡង់ នៅចាត់ទុកថា អ៊ុយក្រែន នៅមាន«គុណសម្បត្តិចាស់ទុំ»នៅឡើយទេ។
អ្នកជំនាញកិច្ចការនយោបាយភូមិសាស្ត្រ លោក Florent Parmentier អគ្គលេខាធិការវិទ្យាស្ថានសិក្សានយោបាយក្រុងប៉ារីស បានគូសបង្ហាញថា អ៊ុយក្រែន នៅមានបញ្ហាជាច្រើនណាស់ដែលត្រូវកែសម្រួល។ ជាអាទិ៍នោះគឺទាក់ទងនឹង ស្ថាប័នសាធារណៈ ការធានានីតិរដ្ឋ និង សមត្ថភាពប្រយុទ្ធប្រឆាំងនឹងអំពើពុករលួយឲ្យមានប្រសិទ្ធភាព ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ