នៅចំពោះមុខការគំរាមរបស់រុស្ស៊ី អឺរ៉ុបងាករត់ទៅពឹងឧស្ម័នរបស់រដ្ឋអ៊ីស្រាអែល
នៅចំពោះមុខការគំរាមកាត់ផ្តាច់ឧស្ម័នរុស្ស៊ី ប្រធានគណៈកម្មការអឺរ៉ុបធ្វើដំណើរទៅពង្រឹងសហប្រតិបត្តិការផ្នែកថាមពលជាមួយប្រទេសនៅដើមបូព៌ា។ នៅក្នុងទស្សនកិច្ចទៅកាន់ប្រទេសអ៊ីស្រាអែលកាលពីថ្ងៃអង្គារ ទី ១៤មិថុនា ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរឡេយែន បានថ្លែងដោយឥតលាក់លៀមថា អឺរ៉ុបចង់បានប្រភពថាមពលរបស់រដ្ឋអ៊ីស្រាអែល ដើម្បីជំនួស ប្រេង ហ្គាសរបស់រុស្ស៊ី ដែលអឺរ៉ុបបានដាក់ទណ្ឌកម្ម ដោយសារធ្វើសង្រ្គាមឈ្លានពានអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
សកម្មភាពរបស់រុស្ស៊ីដែលបានធ្វើសង្រ្គាមឈ្លានពានអ៊ុយក្រែន និងកាត់ផ្តាច់ការផ្គត់ផ្គង់ឧស្ម័នដល់ប្រទេសសមាជិកអឺរ៉ុបដូចជាប៉ូឡូញ ប៊ុលហ្ការី និងហូឡង់ បានធ្វើឲ្យសហភាពអឺរ៉ុបសម្រេចចិត្តកាន់តែឆាប់ ដើម្បីឈប់ពឹងអាស្រ័យលើប្រភពថាមពលរុស្ស៊ី។
ដើម្បីអាច ដោះដៃ ឈប់ពឹងលើប្រេង និងឧស្ម័នរបស់រុស្ស៊ី សហភាពអឺរ៉ុបកំពុងស្វែងរក ផ្លូវថ្មី ដើម្បី ពង្រឹងសហប្រតិបត្តិការផ្នែកថាមពលជាមួយអ៊ីស្រាអែល។ នេះជាប្រសាសន៍របស់ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរឡេយ៉ែន ដោយនិយាយយោងដល់គម្រោងខ្សែកាបអគ្គិសនីដែលតភ្ជាប់អ៊ីស្រាអែលជាមួយ ប្រទេសស្ហ៊ីប និងក្រិក ហើយនិងគម្រោងបំពង់បង្ហូរប្រេងនៅសមុទ្រមេឌីទែរ៉ាណេ។
នៅក្នុងទស្សនកិច្ច ២ថ្ងៃ នៅអ៊ីស្រាអែល ប្រធានគណៈកម្មការអឺរ៉ុបបានជួបពិភាក្សាជាមួយរដ្ឋមន្រ្តីការបរទេស និងរដ្ឋមន្រ្តីផ្នែកថាមពលអ៊ីស្រាអែល កាលពីថ្ងៃ ចន្ទ និងត្រូវជួបនាយករដ្ឋមន្រ្តីអ៊ីស្រាអែលនៅថ្ងៃអង្គារ។ តាមអ្នកនាំពាក្យរបស់រដ្ឋមន្រ្តីថាមពលអ៊ីស្រាអែល ប្រធានគណៈកម្មការអឺរ៉ុបបាននិយាយប្រាប់ភាគីអ៊ីស្រាអែល ម្តងហើយម្តងទៀតថា អឺរ៉ុបត្រូវការប្រភពផ្គត់ផ្គង់ថាមពលអ៊ីស្រាអែល។
សហភាពអឺរ៉ុប និងអ៊ីស្រាអែលបានចរចាគ្នា រាប់ខែមកហើយ ដើម្បីឈានទៅបង្កើតកិច្ចព្រមព្រៀងមួយស្តីពីការនាំចេញហ្គាស ឧស្ម័នអ៊ីស្រាអែលទៅទឹកដីអឺរ៉ុបដោយត្រូវឆ្លងកាត់ប្រទេសអេហ្ស៊ីប។ អ្នកនាំពាក្យរបស់ប្រធានគណៈកម្មការអឺរ៉ុបវិញ បាននិយាយប្រាប់អ្នកកាសែត កាលបីថ្ងៃ អង្គារថា សហប្រតិបត្តិការផ្នែកថាមពលជាមួយអ៊ីស្រាអែល និងប្រទេសដៃគូផ្សេងទៀត ក្នុងតំបន់ នឹងត្រូវគេប្រកាសឲ្យដឹង នៅប៉ុន្មានថ្ងៃខាងមុខ មុននឹងបញ្ជាក់ថា នៅបន្ទាប់ពីអ៊ីស្រាអែល ប្រធានគណៈកម្មការអឺរ៉ុបនឹងធ្វើដំណើរទៅកាន់ប្រទេសអេហ្ស៊ីប។
នៅក្រោយរកឃើញជង្រុកប្រេងដ៏ធំមហាសាលនៅក្នុងតំបន់របស់ខ្លួននៅសមុទ្រមេឌីទែរ៉ាណេ ប្រមាណ ១០០០ ពាន់លានម៉ែត្រគូប កាលពីឆ្នាំ ២០១០ អ៊ីស្រាអែលបានចាប់ផ្តើម បូមនិងផលិតឧស្ម័នរបស់ខ្លួន។ ប៉ុន្តែ ការងាកទៅពឹងអាស្រ័យប្រភពថាមពលរបស់អ៊ីស្រាអែល មិនមែនគ្មានឧបសគ្គនោះទេ។ ទី១ អ៊ីស្រាអែល គ្មានបំពង់បង្ហូរឧស្ម័នផ្ទាល់ ទៅកាន់ទឹកដីអឺរ៉ុប។ ទី២ អ៊ីស្រាអែលនៅកំពុងជាប់ជម្លោះ ដណ្តើមតំបន់ជង្រុកប្រេង នៅសមុទ្រមេឌីទែរ៉ាណេ ជាមួយលីបង់ ប្រទេសជិតខាង។
យ៉ាងណាក៏ដោយ អ៊ីស្រាអែលនៅតែ អាចធានាផ្គត់ផ្គង់ឧស្ម័នឲ្យអឺរ៉ុប តាមរយៈជម្រើស៣យ៉ាង។ ទី១ អ៊ីស្រាអែលអាចបង្ហូរឧស្ម័នទៅអេហ្ស៊ីប មុននឹងបំប្លែងវាឲ្យទៅជាឧស្ម័នធម្មជាតិពង្រាវ ដើម្បីគេអាចដឹកជញ្ជូនតាមកប៉ាល់ទៅទីផ្សារអឺរ៉ុប។ ទី២ អ៊ីស្រាអែលអាចសាងសង់បំពង់បង្ហូរឧស្ម័នទៅតួកគី ដែលនឹងអាចលក់បន្តចែកចាយចូលទៅអឺរ៉ុបខាងកើត។ ទី៣ គឺគម្រោងសាងសង់បំពង់បង្ហូរប្រេង ដោយផ្ទាល់ពីអ៊ីស្រាអែលចូលទៅអឺរ៉ុបខាងត្បូង ដោយឆ្លងកាត់ស្ហ៊ីប និងក្រិក។ ប៉ុន្តែ គម្រោងទី៣ ដែលមានឈ្មោះថា EstMed ដែលមានតម្លៃ ៦ពាន់លានអឺរ៉ូ ត្រូវការពេលវេលាយូរ ដើម្បីអាចលេចចេញរូបរាង ពោលគឺមិនអាចឆ្លើយតបទាន់ពេលវេលាទៅនឹងតម្រូវការរបស់អឺរ៉ុប ដែលចង់ឈប់ពឹងអាស្រ័យលើប្រភពថាមពលរុស្ស៊ីឲ្យបានកាន់តែឆាប់ នៅមុនឆ្នាំ ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ