រុស្ស៊ីតវ៉ា រឿងលីទុយអានី រឹតបន្តឹងការដឹកទំនិញឆ្លងកាត់ ឆ្ពោះទៅកាន់ដីរុស្ស៊ីតំបន់កាលីនីងហ្ក្រាដ
ក្រសួងការបរទេសរុស្ស៊ី បានធ្វើការតវ៉ាជំទាស់ ទៅនឹងប្រទេសលីទុយអានី ដែលបានសម្រេច រឹតបន្តឹងការដឹកទំនិញតាមរថភ្លើងឆ្លងកាត់ប្រទេសនេះ ឆ្ពោះទៅកាន់ដែនដីរុស្ស៊ី នៅតំបន់កាលីនីងហ្ក្រាដ។ លីទុយអានី ដែលជាសមាជិកអឺរ៉ុប និងអូតង់ផងនោះ បានអះអាងថា ខ្លួនធ្វើនេះដោយអនុលោមទៅតាមវិធានការទណ្ឌកម្ម របស់សហភាពអឺរ៉ុបដាក់ទៅលើរុស្ស៊ី។ តែយ៉ាងណា ភាគីរុស្ស៊ីបានគំរាមថា នឹងចាត់វិធានការសងសិកវិញ បើលីទុយអានី មិនព្រមដកចេញនូវបម្រាមនេះ។
ចុះផ្សាយនៅថ្ងៃ៖
ស្តាប់ - ០២:៣១
រដ្ឋមន្ត្រីក្រសួងការបរទេសលីទុយអានី បានបញ្ជាក់ប្រាប់អ្នកយកព័ត៌មានបារាំង AFP ថាខ្លួនបានចាប់ផ្តើមអនុវត្តការដាក់កំហិត ហាមឃាត់ការដឹកជញ្ជូនទំនិញ ដែកថែប និងលោហៈធាតុផ្សេងទៀត ដែលរុស្ស៊ីដឹកតាមផ្លូវដែក ឆ្លងកាត់ប្រទេសខ្លួន ឆ្ពោះទៅកាន់ដែនដី កាលីនីងហ្ក្រាដ ចាប់ពីថ្ងៃទី ១៧មិថុនា។ ការហាមឃាត់នេះ គឺដោយអនុលោម ទៅតាមវិធានការទណ្ឌកម្មរបស់សហភាពអឺរ៉ុប ហើយខ្លួនបានជូនដំណឹងនេះ ទៅកាន់ភាគីរុស្ស៊ី ឲ្យបានដឹងហើយ។
នៅថ្ងៃចន្ទ ទី២០មិថុនា ភាគីរុស្ស៊ីបានប្រតិកម្មតវ៉ា។ ក្រសួងការបរទេសរុស្ស៊ី បានចោទវិធានការហាមឃាត់របស់លីទុយអានី ថាជាវិធានការរករឿង ប្រឆាំងនឹងរុស្ស៊ី។ មន្ត្រីទូតលីទុយអានីប្រចាំនៅក្រុងម៉ូស្គូ ត្រូវបានក្រសួងការបរទេសរុស្ស៊ី កោះហៅឲ្យចូលជួប ពន្យល់ពីបញ្ហានេះ។ លោក Dmitri Peskov អ្នកនាំពាក្យវិមានក្រឹមឡាំង បានលើកឡើងថា បញ្ហានេះ ជារឿងមិនអាចទទួលយកបានជាដាច់ខាត ហើយរុស្ស៊ីនឹងចាត់វិធានការសងសិកវិញ ប្រសិនបើលីទុយអានី មិនបើកឲ្យទំនិញរុស្ស៊ីឆ្លងកាត់តាមផ្លូវដែក ឆ្ពោះទៅកាន់តំបន់កាលីនីងហ្ក្រាដ។ ក្រសួងការបរទេសរុស្ស៊ីបានអះអាងទៀតថា ការហាមឃាត់ទំនិញរុស្ស៊ីមិនឲ្យឆ្លងកាត់ដែនដីអឺរ៉ុប ឆ្ពោះទៅកាន់តំបន់កាលីនីងហ្ក្រាដ គឺវាជាការបំពានទៅនឹងកិច្ចព្រមព្រៀង រវាងរុស្ស៊ីនិងសហភាពអឺរ៉ុប ចុះនៅឆ្នាំ២០០២។
ដោយឡែក អភិបាលតំបន់កាលីនីងហ្ក្រាដ បានអះអាងថា គេនឹងចាប់ផ្តើមបញ្ជូនទំនិញតាមផ្លូវសមុទ្រវិញ ប្រសិនបើលីទុយអានីនៅតែមិនព្រមដកចេញបម្រាម។ ប្រភពដដែលនេះ អះអាងថា ទំនិញយ៉ាងហោច ពី៤០ ទៅ៥០% ដែលត្រូវបានប៉ះពាល់ មិនអាចដឹកតាមផ្លូវដែកបាន ក្នុងនោះមានធ្យូងថ្ម ទំនិញលោហៈធាតុ សម្ភារៈសំណង់ និងទំនិញបច្ចេកវិទ្យាទំនើបមួយចំនួន។
គួរបញ្ជាក់ថា តំបន់កាលីនីងហ្ក្រាដ គឺជាដែនដីសហភាពសូវៀតបានវាយដណ្តើមបាន នៅឆ្នាំ១៩៤៥។ ក្រោយការដួលរលំនៃសហភាពសូវៀត ប្រទេសក្បែរនោះបានប្រកាសឯករាជ ទុកឲ្យដែនដីកាលីនីងហ្ក្រាដ នៅដាច់តែម្នាក់ឯងជាប់សមុទ្របាល់ទិក និងព័ទ្ធដោយប៉ូឡូញ និងលីទុយអានី។ តំបន់នេះ មានសារៈសំខាន់យុទ្ធសាស្ត្រណាស់ សម្រាប់រុស្ស៊ី ព្រោះជាមូលដ្ឋានជួរមុខ របស់កងទ័ពរុស្ស៊ី នៅកណ្តាលប្រទេសសមាជិកអឺរ៉ុប និងអូតង់តែម្តង។ ជានិច្ចជាកាល តំបន់កាលីនីងហ្ក្រាដនេះ តែងតែជាចំណុចរសើបបង្កការថ្នាំងថ្នាក់ រវាងលោកខាងលិច ជាមួយនឹងរុស្ស៊ី។ គឺនៅកាលីនីងហ្ក្រាដនេះហើយ ដែលរុស្ស៊ីបានដាក់បញ្ឈរ ប្រព័ន្ធបាញ់មីស៊ីល Iskander ដែលមានសមត្ថភាពពាក់ក្បាលគ្រាប់នុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ