ប្រមុខដឹកនាំប្រទេសសមាជិកសហភាពអឺរ៉ុបប្រជុំសម្រេចលើបេក្ខភាពអ៊ុយក្រែន
នៅក្នុងកិច្ចប្រជុំនៅទីក្រុងព្រុចសែល នៅថ្ងៃព្រហស្បតិ៍នេះ ប្រទេសសមាជិកសហភាពអឺរ៉ុប ទាំង ២៧ប្រទេស នឹងពិនិត្យ និងសម្រេចលើការទទួលយកអ៊ុយក្រែនជាបេក្ខភាពសមាជិកសហភាពអឺរ៉ុបជាផ្លូវការ។ ក្លាយជាបេក្ខភាពជាផ្លូវការ គឺជាដំណាក់កាលដ៏សំខាន់មួយ ក៏ប៉ុន្តែ អ៊ុយក្រែននៅតែត្រូវការឆ្លងកាត់ដំណើការនីតិវិធីវែងឆ្ងាយតទៅទៀត ទើបអាចចូលជាសមាជិកសហភាពអឺរ៉ុបបាន។
ចុះផ្សាយនៅថ្ងៃ៖
ក្រោយពីមានសេចក្តីសម្រេចពីប្រធានគណៈកម្មការអឺរ៉ុប កាលពីសប្តាហ៍មុន ដែលគាំទ្របេក្ខភាពផ្លូវការរបស់អ៊ុយក្រែន គឺក្រុមប្រឹក្សាអឺរ៉ុប ពោលគឺ មេដឹកនាំប្រទេសសមាជិកទាំង ២៧ ដែលជាអ្នកពិនិត្យ និងសម្រេចចុងក្រោយថា តើព្រមទទួលយកអ៊ុយក្រែនជាបេក្ខជនជាផ្លូវការដែរឬក៏យ៉ាងណា?
បារាំង ដែលបច្ចុប្បន្នជាប្រធានផ្លាស់វេនរបស់សហភាពអឺរ៉ុប បានឲ្យដឹងថា ក្នុងចំណោមប្រទេសជាសមាជិកទាំង ២៧ គេសង្កេតឃើញមានកុងសង់ស៊ីសជាទូទៅ គាំទ្របេក្ខភាពរបស់អ៊ុយក្រែន។ ដូច្នេះ ការអនុម័តទទួលយកអ៊ុយក្រែនជាបេក្ខជនផ្លូវការ នៅថ្ងៃព្រហស្បតិ៍នេះ ទំនងជាមិនមានអ្វីដែលត្រូវចោទជាបញ្ហានោះទេ។
ក៏ប៉ុន្តែ ក្នុងពេលជាមួយគ្នា បារាំង ក៏ដូចជា ប្រទេសសមាជិកផ្សេងទៀត ក៏បានលើកឡើងផងដែរថា សហភាពអឺរ៉ុបមិនមាននីតិវិធីទទួលសមាជិកតាមផ្លូវកាត់នោះទេ។ ដូច្នេះ ក្រោយពីបានក្លាយជាបេក្ខជនផ្លូវការ អ៊ុយក្រែនប្រាកដជានឹងត្រូវឆ្លងកាត់នីតិវិធីជាច្រើនទៀត ជាពិសេស គឺការចរចា និងពិនិត្យទៅលើកំណែទម្រង់សំខាន់ៗមួយចំនួន ដែលជាលក្ខខណ្ឌចាំបាច់ ដើម្បីអាចក្លាយជាសមាជិកសហភាពអឺរ៉ុប។ ដំណើរការចរចា ដែលអាចនឹងត្រូវចំណាយពេលជាច្រើនឆ្នាំ ឬរហូតដល់ទសវត្សរ៍ក៏អាចថាបាន។
ទោះជាយ៉ាងណា ការទទួលបានឋានៈជាបេក្ខជនផ្លូវការនៅពេលនេះ ក៏អាចរាប់ថាជាដំណាក់កាលដ៏សំខាន់មួយដែរ សម្រាប់អ៊ុយក្រែន។ វាជាចំណុចចាប់ផ្តើមនៃនីតិវិធី ដើម្បីចាប់បើកការចរចាលើសមាជិកភាពអ៊ុយក្រែន ហើយវាជានិមិត្តរូបដ៏សំខាន់មួយ នៅក្នុងពេលដែលអ៊ុយក្រែនកំពុងស្ថិតក្នុងសង្រ្គាមជាមួយរុស្ស៊ី។
ត្រឹមតែអាចក្លាយជាបេក្ខជនផ្លូវការ នៅក្នុងរយៈពេលដ៏ខ្លីត្រឹមប៉ុន្មានខែបែបនេះ ក៏អាចរាប់ថាជារឿងប្រវត្តិសាស្រ្តមួយដែរ សម្រាប់អ៊ុយក្រែន ក្នុងពេលដែលប្រទេសជាច្រើនផ្សេងទៀត ក្រោយពីដាក់ពាក្យសុំចូលជាសមាជិកសហភាពអឺរ៉ុប ត្រូវរង់ចាំរហូតដល់ទៅរាប់ឆ្នាំឯណោះ ទម្រាំតែបានទទួលសិទ្ធិត្រឹមជាបេក្ខជនផ្លូវការ ហើយអាចចាប់ផ្តើមបើកការចរចាពិនិត្យសមាជិកភាពរបស់ខ្លួនបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ