តុលាការព្រហ្មទណ្ឌអន្តរជាតិស្នើឲ្យបន្តការស៊ើបអង្កេតលើសង្រ្គាមប្រឆាំងគ្រឿងញៀននៅហ្វីលីពីន
នៅថ្ងៃសុក្រ ទី២៤ មិថុនា រដ្ឋអាជ្ញានៃតុលាការព្រហ្មទណ្ឌអន្តរជាតិក្រុងឡាអេ ICC លោកការីម ខាន់បានស្នើឲ្យបើកការស៊ើបអង្កេតឡើងវិញលើសង្រ្គាមប្រឆាំងគ្រឿងញៀននៅក្នុងប្រទេសហ្វីលីពីន។ សង្រ្គាមមួយនេះបានបណ្តាលឲ្យមានមនុស្សស្លាប់ជាច្រើនពាន់នាក់ និងដែល ICC ចង់ដឹងថា តើមានការរំលោភសិទ្ធិមនុស្ស និងមានបទឧក្រិដ្ឋកម្មប្រឆាំងមនុស្សជាតិជាយថាហេតុនៅក្នុងសង្រ្គាមប្រឆាំងគ្រឿងញៀននោះដែរ ឬទេ?។ គួរបញ្ជាក់ថា សង្រ្គាមប្រឆាំងគ្រឿងញៀនមួយនេះត្រូវបានផ្អាកក្នុងខែវិច្ឆិកា ឆ្នាំ ២០២១ តាមសំណូមពររបស់រដ្ឋាភិបាលក្រុងម៉ានីល។
ចុះផ្សាយនៅថ្ងៃ៖
ស្តាប់ - ០២:២២
ក្រោយពីបានព្យួរការស៊ើបអង្កេតអស់រយៈពេល៧ខែ រដ្ឋអាជ្ញានៃតុលាការព្រហ្មទណ្ឌអន្តរជាតិក្រុងឡាអេ ICC លោកការីម ខាន់បានថ្លែងថា សំណើសុំពន្យារពេលលើកការស៊ើបអង្កេតរបស់រដ្ឋាភិបាលហ្វីលីពីនមិនត្រឹមត្រូវ និងគ្មានភស្តុតាង។ តាមលោកការីម ខាន់ ការស៊ើបអង្កេតត្រូវចាប់ផ្តើមជាថ្មីឲ្យបានលឿនបំផុត។ គួរបញ្ជាក់ថា ICC បានយល់ព្រមព្យួរការស៊ើបអង្កេតរបស់ខ្លួនក្នុងខែវិចិ្ឆកា ឆ្នាំ ២០២១ តាមសំណើរបស់ឯកអគ្គរដ្ឋទូតហ្វីលីពីនប្រចាំប្រទេសហូឡង់។ នៅក្នុងលិខិតផ្ញើទៅឲ្យ ICC កាលណោះ ឯកអគ្គរដ្ឋទូតហ្វីលីពីនបានពន្យល់ថា រដ្ឋាភិបាលហ្វីលីពីនកំពុងស៊ើបអង្កេតលើឧក្រិដ្ឋកម្មប្រឆាំងមនុស្សជាតិជាយថាហេតុដែលអាចបានកើតមាននៅក្នុងសង្រ្គាមប្រឆាំងគ្រឿងញៀន។
តែរដ្ឋអាជ្ញា ICC លោកការីម ខាន់បានថ្លែងក្នុងថ្ងៃសុក្រ ទី២៤ មិថុនាថា រដ្ឋាភិបាលហ្វីលីពីនមិនបានផ្តល់ឯកសារដែលបញ្ជាក់ពីការស៊ើបអង្កេតកំពុងធ្វើ ឬបិទបញ្ចប់ ហើយក៏មិនបានផ្តល់ព័ត៌មានលំអិតអ្វីទាក់ទងនឹងវិធានការស៊ើបអង្កេតដែរ។ លោកការីម ខាន់បានបន្ថែមថា បើរដ្ឋអំណាចហ្វីលីពីនមិនធ្វើអ្វីទាំងអស់ តុលាការព្រហ្មទណ្ឌអន្តរជាតិត្រូវតែចូលខ្លួនអន្តរាគមន៍។ សូមរម្លឹកថា ក្រុមចៅក្រម ICC បានយល់ព្រមកាលពីខែកញ្ញា ឆ្នាំ ២០២១ ឲ្យបើកការស៊ើបអង្កេតលើសង្រ្គាមប្រឆាំងគ្រឿងញៀនរបស់ប្រធានាធិបតីហ្វីលីពីនលោកឌុយទែរតេ។ សង្រ្គាមដែលបានបណ្តាលឲ្យមានមនុស្សជាច្រើនពាន់នាក់បាត់បង់ជីវិត។
តាមតួលេខផ្លូវការចុងក្រោយរបស់រដ្ឋអំណាចហ្វីលីពីន មានមនុស្សយ៉ាងតិច ៦ ១៨១នាក់ត្រូវបានសម្លាប់នៅក្នុងប្រតិបត្តិការបង្រ្កាបគ្រឿងញៀនជាង ២០០ ០០០ដងតាំងពីខែកក្កដា ឆ្នាំ ២០១៦។ តែតាមតួលេខរបស់ ICC មានស្លាប់ចន្លោះ ១២ ០០០នាក់ និង ៣០ ០០០នាក់។ អ្វីជាការកត់សម្គាល់ សំណើឲ្យបើកការស៊ើបអង្កេតឡើងវិញរបស់រដ្ឋអាជ្ញា ICC លោកការីម ខាន់ពេលនេះបានធ្វើឡើង ប៉ុន្មានថ្ងៃមុនការចាកចេញពីតំណែងប្រធានាធិតីរបស់លោកឌុយទែរតេនៅថ្ងៃទី៣០ មិថុនាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ