ICCអនុញ្ញាតឲ្យបើកការស៊ើបអង្កេតលើយុទ្ធនាការបង្រ្កាបគ្រឿងញៀននៅហ្វីលីពីន
តុលាការព្រហ្មទណ្ឌអន្តរជាតិ (ICC) នៅថ្ងៃពុធ ១៥ កញ្ញាម្សិលមិញ បានសម្រេចអនុញ្ញាតឲ្យបើកការស៊ើបអង្កេតពេញលេញមួយ លើយុទ្ធនាការបង្រ្កាបគ្រឿងញៀននៅហ្វីលីពីន របស់លោកឌុយទែរតេ។ ស្ថាប័នអន្តរជាតិមួយនេះ បានលើកឡើងថា ការបង្រ្កាបគ្រឿងញៀននៅហ្វីលីពីន មានទម្រង់សដៀងគ្នាទៅនឹងការវាយប្រហារដោយខុសច្បាប់ និងជាប្រព័ន្ធលើជនស៊ីវិល។ ប៉ុន្តែភ្លាមមួយរំពេច លោកប្រធានាធិបតីហ្វីលីពីន ឌុយទែរតេ បានប្រកាសបដិសេធ មិនសហការជាមួយតុលាការព្រហ្មទណ្ឌអន្តរជាតិឡើយ។
ចុះផ្សាយនៅថ្ងៃ៖
ស្តាប់ - ០២:១៨
សេចក្តីសម្រេចថ្មីរបស់តុលាការព្រហ្មទណ្ឌអន្តរជាតិនេះត្រូវបានប្រកាសឡើងដោយសារចៅក្រមតុលាការយល់ឃើញថាមានមូលដ្ឋានសមហេតុផលមួយក្នុងការជឿថាឧក្រិដ្ឋកម្មប្រឆាំងមនុស្សជាតិ ត្រូវបានប្រព្រឹត្តនៅក្រោមស្លាកនៃយុទ្ធនាការបង្ក្រាបគ្រឿងញៀនដែលបណ្តាលឲ្យមនុស្សរាប់ពាន់នាក់ស្លាប់នៅហ្វីលីពីន។
ចៅក្រមតុលាការព្រហ្មទណ្ឌអន្តរជាតិបានលើកឡើងថា សង្គ្រាមប្រឆាំងគ្រឿងញៀននៅហ្វីលីពីនត្រូវបានគេមើលឃើញថាមិនមែនជាប្រតិបត្តិការអនុវត្តដោយស្របច្បាប់នោះទ និងថាការបង្ក្រាបនេះអាចជាឧក្រិដ្ឋកម្មប្រឆាំងមនុស្សជាតិ។
ពីខាងទីក្រុងម៉ានីលវិញ លោកឌុយទែរតេ ថានឹងមិនសហការជាមួយស្ថាប័នអន្តរជាតិនេះឡើយ ទាក់ទិនករណីស៊ើបអង្កេតលើការបង្រ្កាបគ្រឿងញៀននៅហ្វីលីពីន។ មេធាវីរបស់លោក ឌុយទែរតេ បាននិយាយនៅថ្ងៃព្រហស្បតិ៍ ទី១៦ កញ្ញានេះថា សាលាក្តីនេះគ្មានអំណាចផ្លូវការអ្វីដើម្បីធ្វើការសម្រេចចិត្តនិងវិនិច្ឆ័យតាមផ្លូវច្បាប់នៅហ្វីលីពីនឡើយ។ ដូច្នោះរដ្ឋាភិបាលក្រុងម៉ានីលនឹងមិនអនុញ្ញាតឲ្យសមាជិកតុលាការព្រហ្មទណ្ឌអន្តរជាតិណាម្នាក់ចូលទៅប្រមូលយកព័ត៌មាននិងភស្តុតាងនៅក្នុងប្រទេសហ្វីលីពីននោះទេ។
គួររំឭកជូនថា ប្រទេសហ្វីលីពីនបានដកសមាជិកភាពរបស់ខ្លួនចេញពីតុលាការព្រហ្មទណ្ឌអន្តរជាតិកាលពីខែមីនា ឆ្នាំ ២០១៩ ក្រោយតុលាការដែលមានមូលដ្ឋាននៅទីក្រុងឡាអេនេះ ចាប់ផ្តើមបើកការស៊ើបអង្កេតបឋម លើលោកឌុយទែរតេ ពាក់ព័ន្ធយុទ្ធនាការបោសសំអាតការជួញដូរគ្រឿងញៀននៅក្នុងស្រុក។
មានមនុស្សយ៉ាងហោច ៦ ១៨១ នាក់ត្រូវបានសម្លាប់នៅក្នុងប្រតិបត្តិការប្រឆាំងគ្រឿងញៀនជាង ២សែនប្រតិបត្តិការរាប់ចាប់តាំងពីខែកក្កដា ឆ្នាំ ២០១៦ មក។ នេះបើយោងតាមទិន្នន័យផ្លូវការចុងក្រោយដែលចេញផ្សាយដោយប្រទេសហ្វីលីពីននៅខែកក្កដា ឆ្នាំ ២០២១នេះ។
ប៉ុន្តែក្រុមអង្គការការពារសិទ្ធិមនុស្សបានគូសបញ្ជាក់ថា ចំនួនអ្នកស្លាប់ពិតជាក់ស្តែង អាចមានច្រើនជាងនេះរហូតដល់ទៅ ៣ ឬ ៤ដងឯណោះ។ ចំណែករដ្ឋអាជ្ញាតុលាការព្រហ្មទណ្ឌអន្តរជាតិវិញ បានប៉ាន់ប្រមាណថាមនុស្សដែលត្រូវបានគេសម្លាប់អាចមានចំនួនចន្លោះពី ១២ ០០០ ទៅ ៣០ ០០០ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ