ក្រុមប្រទេស G7 ដំឡើងសំឡេងដាក់ចិន
ក្រុមប្រទេស G7 បានបិទបញ្ចប់ជំនួបកំពូលរបស់ខ្លួន នៅថ្ងៃអង្គារនេះ ជាមួយនឹងការថ្លែងរិះគន់ធ្ងន់ៗទៅលើចិន ជាពិសេស ទាក់ទងនឹងកង្វះតម្លាភាពក្នុងការដោះដូរពាណិជ្ជកម្ម ក៏ដូចជាបញ្ហារំលោភសិទ្ធិមនុស្ស។ អាល្លឺម៉ង់ ដែលជាម្ចាស់ផ្ទះជំនួបកំពូល G7 នេះក៏បានព្រមានផងដែរ កុំឲ្យចិនជួយរុស្ស៊ីគេចពីទណ្ឌកម្ម ដែលប្រទេសលោកខាងលិចដាក់ ក្រោយពីមានសង្រ្គាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងសេចក្តីថ្លែងការណ៍ក្រោយជំនួបកំពូល ក្រុមប្រទេស G7 បានរិះគន់អន្តរាគមន៍របស់រដ្ឋាភិបាលចិននៅក្នុងទីផ្សារ ជាអន្តរាគមន៍ដែល G7 មើលឃើញថា ត្រូវបានធ្វើឡើងដោយគ្មានតម្លាភាព ហើយដែលនាំឲ្យប៉ះពាល់ទៅដល់ដំណើរការទីផ្សារសេរី។ ប្រទេសមហាអំណាចឧស្សាហកម្មទាំង ៧ រួមជាមួយនឹងសហភាពអឺរ៉ុប ក៏បានបង្ហាញនូវក្តីព្រួយបារម្ភផងដែរ ចំពោះស្ថានភាពសិទ្ធិមនុស្សនៅចិន ជាពិសេស នៅទីបេ និងស៊ីនជាំង ដែលពលកម្មដោយបង្ខំ កំពុងជាបញ្ហាចោទចម្បង នៅក្នុងពេលបច្ចុប្បន្ននេះ។
គួររំឭកឡើងវិញថា ការរិះគន់បែបនេះធ្លាប់ត្រូវបានសហរដ្ឋអាមេរិកធ្វើឡើងជារឿយៗរួចមកហើយដែរ ក៏ប៉ុន្តែ សម្រាប់ប្រទេសផ្សេងទៀតក្នុងក្រុម G7 ជាពិសេស អាល្លឺម៉ង់ ដែលមានចិនជាដៃគូពាណិជ្ជកម្មដ៏ធំលំដាប់ទីមួយ ច្រើនតែមានការប្រយ័ត្នប្រយែងច្រើន នៅក្នុងការរិះគន់ចិន ដោយសារតែខ្លាចរងការសងសឹកពីចិន ហើយដែលនាំឲ្យបាត់បង់ទីផ្សារធ្វើឲ្យប៉ះពាល់ទៅដល់កំណើនសេដ្ឋកិច្ចរបស់ខ្លួនឯងទៅវិញ។
ការណ៍ដែលអាល្លឺម៉ង់ និងប្រទេសផ្សេងទៀត មូលមាត់គ្នាជាមួយអាមេរិក ចេញសេចក្តីថ្លែងការណ៍រួមក្នុងក្របខណ្ឌ G7 រិះគន់ចិនខ្លាំងៗនៅពេលនេះ កើតឡើងស្របពេលដែលបក្សសម្ព័ន្ធអូតង់ នៅក្នុងជំនួបកំពូលនៅទីក្រុងម៉ាឌ្រីដ ក៏គ្រោងផងដែរថានឹងដៅឈ្មោះចិន រួមគ្នាជាមួយនឹងរុស្ស៊ីថាជាបញ្ហាប្រឈមខាងផ្នែកសន្តិសុខដ៏ចម្បងមួយ សម្រាប់អូតង់។
ថ្លែងនៅចំពោះមុខអ្នកសារព័ត៌មាន ក្រោយបិទជំនួបកំពូល G7 លោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ ដែលជាម្ចាស់ផ្ទះជំនួបកំពូល បានលើកឡើងថា ក្រុមប្រទេស G7 ទទូចឲ្យចិន ធ្វើយ៉ាងណាចៀសវាងកុំជួយរុស្ស៊ីឲ្យគេចពីទណ្ឌកម្មដែលប្រទេសលោកខាងលិចបានដាក់ នៅក្រោយពេលដែលរុស្ស៊ីចូលឈ្លានពានអ៊ុយក្រែន។
ទោះជាយ៉ាងណា លោកប្រមុខរដ្ឋាភិបាលអាល្លឺម៉ង់ក៏បានកត់សម្គាល់ផងដែរថា កិច្ចសហប្រតិបត្តិការជាមួយចិន នៅតែជារឿងមួយចាំបាច់ ដោយពិបាកនឹងចៀសរួច ជាពិសេស នៅក្នុងសំណុំរឿងអន្តរជាតិសំខាន់ៗ រួមមានជាអាទិ៍ បញ្ហាអាកាសធាតុ ឬក៏វិបត្តិស្បៀងអាហារជាដើម ដែលសុទ្ធសឹងជាបញ្ហាចាំបាច់ និងបន្ទាន់ ហើយដែលទាមទារឲ្យមានដំណោះស្រាយជាលក្ខណៈសកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ