ខួប២០ឆ្នាំ តុលាការព្រហ្មទណ្ឌអន្តរជាតិ នៅតែប្រឈមនឹងការទទួលស្គាល់ជាសកល
ថ្ងៃទី១កក្កដា ជាថ្ងៃគម្រប់ខួប ២០ឆ្នាំ នៃការបង្កើតតុលាការព្រហ្មទណ្ឌអន្តរជាតិ។ ទោះបីជា ២ទសវត្សរ៍មកហើយក្តី តែតុលាការព្រហ្មទណ្ឌអន្តរជាតិ ដែលមានមូលដ្ឋាននៅក្រុងឡាអេ នេះ នៅតែប្រឈមនឹងការទទួលស្គាល់ជាសកល និងការច្រាលចោលដែនសមត្ថកិច្ចយុត្តាធិការ។ ទោះជាម្តេចក្តី នៅមុនថ្ងៃខួប២០ឆ្នាំ តុលាការព្រហ្មទណ្ឌអន្តរជាតិ បានចេញដីកាចាប់ឃាត់ខ្លួន ចំពោះអ្នកទទួលខុសត្រូវជាន់ឈ្មោះបីនាក់ ជាជនជាតិ រុស្ស៊ី និង ហ្ស័កហ្ស៊ី។
ចុះផ្សាយនៅថ្ងៃ៖
ស្តាប់ - ០២:២៦
ថ្មីៗនេះ តុលាការព្រហ្មទណ្ឌអន្តរជាតិ មានមូលដ្ឋាននៅប្រទេសហូឡង់ បានចេញដីកាចាប់ខ្លួន អ្នកទទួលខុសត្រូវជាន់ខ្ពស់ ជាតិ រុស្ស៊ី និង ហ្ស័កហ្ស៊ី មាន បុរសខ្លាំងបីនាក់ គឺម្នាក់ជារដ្ឋមន្ត្រីនៅតំបន់ស្វ័យតផ្តាច់ខ្លួន ម្នាក់ទៀតជា អ្នកនយោបាយជាន់ខ្ពស់ហ្ស័កស៊ីគាំទ្ររុស្ស៊ី និងម្នាក់ទៀត មន្ត្រីនគរបាលធំ។ នេះជាលើកទី១ ហើយដែល តុលាការព្រហ្មទណ្ឌអន្តរជាតិ តម្រង់ផ្ទាំងស៊ីបទៅលើ ជនជាតិស្បែកស ដែលកន្លងមក គេសង្កេតឃើញថា គឺច្រើនតែជា ពួកឧទ្ទាមនិងមេដឹកនាំផ្តាច់ការនៅអាហ្វ្រិក ជាផ្ទាំងស៊ីប។
តុលាការព្រហ្មទណ្ឌអន្តរជាតិ ចាប់កំណើតឡើងតាមរយៈសន្ធិសញ្ញា ចុះឆ្នាំ១៩៩៨ និងចាប់ផ្តើមបើកទ្វារទទួលសមាជិកនៅថ្ងៃទី១ កក្កដាឆ្នាំ២០០២។ សព្វថ្ងៃ មានរដ្ឋសមាជិកចំនួន ១២៣ ប៉ុន្តែ អ្វីដែលជាបញ្ហាចំណោទធំ គឺ ក្នុងចំណោមប្រទេសមហាអំណាចធំៗទាំងប្រាំ ដែលជាសមាជិកអចិន្ត្រៃយ៍របស់អង្គការសហប្រជាជាតិ គឺមានប្រទេសតែពីរប៉ុណ្ណោះ ដែលយល់ព្រមចូលជាសមាជិក និងព្រមទទួលយកដែនយុត្តាធិការតុលាការនេះ។ នោះគឺ បារាំងនិងអង់គ្លេស។ ចិនគឺចង់នៅឲ្យឆ្ងាយពីតុលាការព្រហ្មទណ្ឌអន្តរជាតិ។ សហរដ្ឋអាមេរិក វិញ រកផ្លូវពង្វាងជានិច្ច ហើយសម្ងំយកផលចំណេញ បើតុលាការនេះធ្វើទុក្ខបុកម្នេញសត្រូវរបស់ខ្លួន។ រីឯ រុស្ស៊ី ចង់តែធ្វើឲ្យតុលាការនេះ បែកបាក់ផ្ទៃក្នុង។ នេះបើតាមការវិភាគរបស់សារព័ត៌មានបារាំង។
តុលាការព្រហ្មទណ្ឌអន្តរជាតិ បើកការស៊ើបអង្កេតនិងកាត់ក្តីចំពោះសំណុំរឿងឧក្រិដ្ឋកម្មធ្ងន់ធ្ងរ តួយ៉ាងអំពើប្រល័យពូជសាសន៍ ឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្ស ឧក្រិដ្ឋកម្មឈ្លានពាន ជាដើម។ តុលាការនេះ បើកការស៊ើបអង្កេតចំពោះប្រទេសចំនួន១៦ តួយ៉ាង ចំពោះករណីសម្លាប់រង្គាលពួករ៉ូហីងយ៉ា នៅភូមា, សង្គ្រាមប្រឆាំងគ្រឿងញៀននៅហ្វីលីពីន, ជម្លោះតាលីបង់, ពួកអង្គការដ្ឋអ៊ីស្លាមនៅអាហ្វាហ្គានីស្ថាន និងជម្លោះនៅឧបទ្វីបវេណេស៊ុយអេឡា ជាអាទិ៍។ ក៏ប៉ុន្តែ តុលាការព្រហ្មទណ្ឌអន្តរជាតិ លំបាកនឹងបើកការស៊ើបអង្កេតព្រហ្មទណ្ឌចំពោះសង្គ្រាមនៅស៊ីរី និងនៅយ៉េមែន ព្រោះប្រទេសទាំងពីរ ពុំបានផ្តល់សត្យាប័នចំពោះលក្ខន្តិកៈទីក្រុងរ៉ូម ដើម្បីទទួលយកដែនយុត្តាធិការរបស់តុលាការទេ។
ក្នុងឱកាសខួប២០ឆ្នាំ នៃ តុលាការព្រហ្មទណ្ឌអន្តរជាតិ លោក រដ្ឋអាជ្ញា Karim Khan ជាមេធាវីអង់គ្លេសផង បានលើកឡើងថា សង្គ្រាមឈ្លានពានរុស្ស៊ីលើអ៊ុយក្រែន ចាប់ផ្តើមពីថ្ងៃទី២៤កុម្ភៈ បានធ្វើឲ្យពិភពលោក ដឹងពីសារៈសំខាន់នៃតួនាទីនិងដែនយុត្តាធការរបស់តុលាការអន្តរជាតិ ដែលបើតាម រដ្ឋអាជ្ញាតុលាការ គឺវាដល់ពេលហើយដែលគេត្រូវទទួលយកដែនយុត្តាធការរបស់តុលាការអន្តរជាតិ ជាសកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ