អូស្ត្រាលី-បារាំង សន្យាផ្តើម«កសាងទំនុកចិត្ត»ឡើងវិញ
ថ្នាក់ដឹកនាំបារាំងនិងអូស្ត្រាលី បានអះអាងព្រមគ្នាថាមានចេតនាចង់«កសាងទំនុកចិត្ត»ឲ្យគ្នាឡើងវិញ បន្ទាប់ពីប្រទេសទាំងពីរ បានជួបពើបប្រទះរឿងរកាំរកូសខ្លាំង ក្រោយពេលដែល អូស្ត្រាលី ជាឯកតោភាគី លុបចោលកិច្ចសន្យាទិញនាវាមុជទឹកបារាំង។ ការអះអាងជួសជុលខ្សែចំណងការទូតដែលដាច់រហែកនេះ បានប្រព្រឹត្តទៅ នៅក្រុងប៉ារីស ជាទីដែលនាយករដ្ឋមន្ត្រីអូស្ត្រាលីនិងភរិយា បានអញ្ជើញទៅដោយផ្ទាល់ ដើម្បីសំណេះសំណាលជាមួយលោកប្រមុខរដ្ឋបារាំង ម៉ាក្រុង នៅវិមានអេលីហ្សេ។
ចុះផ្សាយនៅថ្ងៃ៖
ស្តាប់ - ០១:៣៩
មុននឹងមកចាប់ដៃគ្នាជាថ្មីនៅរដ្ឋធានី បារីស, ប្រមុខថ្នាក់ដឹកនាំប្រទេសទាំងពីរ បានស្កាត់ជួបគ្នានៅក្នុងជំនួបកំពូលអង្គការអូតង់ នៅក្រុងម៉ាឌ្រីត ប្រទេសអេស្ប៉ាញ ដែលជាសញ្ញាជាក់ច្បាស់ពីចំណាប់ផ្តើមទៅរកការជួសជុលភ្ជាប់កាណាល់ទាក់ទងទ្វេភាគីឡើងវិញ។ នាយករដ្ឋមន្ត្រីអូស្ត្រាលី អង់តូនី អាល់បានីស៊ី (Anthony Albanese) បានបោះជំហានមុន ដោយបានលើកឡើងពី«ទំនុកចិត្ត ការគោរពគ្នា និងសេចក្តីស្មោះត្រង់»។
ពីចំណែកខ្លួន ប្រធានាធិបតីបារាំង អេម៉ានុយអែល ម៉ាក្រុង (Emmanuel Macron) មានប្រសាសន៍សបញ្ជាក់សុឆន្ទៈថា ក្រោយពីឆ្លងកាត់ដំណាក់កាលដ៏លំបាកតឹងតែងរួចមក ប្រទេសទាំងពីរ នឹងស្ថាបនាទំនាក់ទំនងដោយឈរលើទំនុកចិត្ត និងជាចំណងទាក់ទងដែលឈរលើការគោរពគ្នាទៅវិញទៅមក។
តាំងតែពីពេលជាន់ដីបារាំង កាលណាភ្លាម នាយករដ្ឋមន្ត្រីអូស្ត្រាលី បានសង្កត់ថាបារាំងមិនត្រឹមតែជាប្រទេស ធំ ខ្លាំង ប៉ុណ្ណោះទេ តែក៏ជាមហាអំណាចមិនអាចប្រកែកបាន នៅក្នុងតំបន់ឥណ្ឌូបាស៊ីហ្វីកនិងនៅលើពិភពលោក។ លោក អង់់តូនី អាល់បានីស៊ី បញ្ជាក់ទៀតថា ការពង្រឹងកម្លាំងកម្លាំងបារាំងនៅឥណ្ឌូប៉ាស៊ីហ្វិក គឺមានសារៈសំខាន់ណាស់ ដើម្បីប្រឈមតទល់មុខនឹងការលិចត្រដេតឡើងកាន់តែខ្លាំងនៃឥទ្ធិពលមហាយក្សចិន។
រីឯចំណែកប្រធានាធិបតីបារាំង លោក ម៉ាក្រុង បានចាក់បណ្តោយថា បារាំងយើងគឺជាតួអង្គសំខាន់នៅក្នុងតំបន់នេះ ព្រោះយើងមានពលរដ្ឋបារាំង ប្រមាណជាងមួយលាននាក់កំពុងរស់នៅ ហើយនិង មានដាក់ពង្រាយទាហានបារាំង ជាង៨ពាន់នាក់ ថែមទៀត។
នៅខែកញ្ញា ឆ្នាំមុន អូស្ត្រាលី ក្នុងអាណត្តិនាយករដ្ឋមន្ត្រីចាស់ គឺបានលុបចោលកិច្ចការសន្យាទិញនាវាមុជទឹកបារាំង ចំនួន១២គ្រឿង ដែលធ្វើឲ្យបារាំងខឹងជាខ្លាំង រហូតដល់មានជម្លោះផ្លូវទូត ទៀតផង។ ប៉ុន្តែ នៅខែឧសភាឆ្នាំនេះ ពេលដែល អូស្ត្រាលី មាននាយករដ្ឋមន្ត្រីថ្មី គឺលោក អង់តូនី អាល់បានីស៊ី បានសូមអនុញ្ញាតបារាំង ដើម្បីចាប់ផ្តើមបើកទំព័រទាក់ទងគ្នា ជាថ្មី និងបានបញ្ចូនសញ្ញាជាវិជ្ជមានជាច្រើនជាបន្តបន្ទាប់ មកកាន់ទីក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ