សង្គ្រាមអ៊ុយក្រែន ៖ អតិផរណាអាមេរិកឡើងដល់កំពូល ទស្សនវិស័យអឺរ៉ុបកាន់តែអាប់អួរ
អាមេរិកបន្តជួបវិបត្តិអតិផរណាកាន់តែខ្លាំងៗ។ តម្លៃទំនិញបានឡើងថ្លៃ៩,១%ក្នុងរយៈពេលមួយឆ្នាំ។ ជាកំរិតដែលអាមរិកពុំធ្លាប់ជួបប្រទះទេ តាំងពីឆ្នាំ១៩៨១មក។ ចំណែកនៅអឺរ៉ុប ក៏មិនប្រសើរ។ គណៈកម្មការអឺរ៉ុប បានប្រកាសនៅថ្ងៃព្រហស្បតិ៍ ទម្លាក់ការព្យាករ កំណើនសេដ្ឋកិច្ចអឺរ៉ុប សម្រាប់ឆ្នាំនេះ និងឆ្នាំក្រោយ។ មូលហេតុចម្បងគឺបណ្តាលមកសង្គ្រាមនៅអ៊ុយក្រែន។
ចុះផ្សាយនៅថ្ងៃ៖
កាលពីខែឧសភា គណៈកម្មការអឺរ៉ុបសំលឹងឃើញថា កំណើនសេដ្ឋកិច្ចតំបន់អឺរ៉ូមានកំរិត២,៧%នៅឆ្នាំ២០២២ និង២,៣%នៅឆ្នាំ ២០២៣ ប៉ុន្តែនៅថ្ងៃទី១៤កក្កដានេះគណៈកម្មការបានបញ្ចុះការព្យាករវិញ ថា តំបន់អឺរ៉ូនឹងមានកំណើនសេដ្ឋកិច្ច២,៦%នៅឆ្នាំនេះ និងត្រឹមតែ១,៤%ប៉ុណ្ណោះនៅឆ្នាំ២០២៣។ ទស្សនវិស័យសេដ្ឋកិច្ចតំបន់អឺរ៉ូ អួរអាប់ខ្លាំងនៅឆ្នាំខាងមុខ ព្រោះតែសង្គ្រាមនៅអ៊ុយក្រែន បានធ្វើឱ្យប៉ះពាល់យ៉ាងខ្លាំងដល់ផ្នែកថាមពល ពោលគឺនឹងធ្វើឱ្យតម្លៃប្រេងឡើងថ្លៃខ្លាំង ដែលចំហាយឥទ្ធិពលនឹងជះខ្លាំងនៅឆ្នាំក្រោយ។
ចំណែកអតិផរណា ក៏នឹងឡើងខ្លាំងដល់ទៅ ៧,៦% បើគិតសម្រាប់រយៈពេលមួយឆ្នាំ២០២២ ហើយនឹងធ្លាក់ចុះវិញ២,៣%នៅឆ្នាំក្រោយ មិនមែនធ្លាក់ចុះ៤% ដូចការព្យាករកាលពីពីរខែមុនទេ។ គណៈកម្មការអឺរ៉ុបបានព្រមានបន្ថែមទៀតថា អតិផរណានៅអឺរ៉ុបអាចនឹងឡើងខ្ពស់លើសនេះទៀត ប្រសិនបើតម្លៃឧស្ម័នឡើងថ្លៃ នៅពេលរុស្ស៊ីកាត់ផ្តាច់ទាំងស្រុងមិនបញ្ជូនមកឱ្យអឺរ៉ុប។ នៅពេលនោះការព្យាករសេដ្ឋកិច្ច ក៏ត្រូវចុះទៅតាមនោះដែរ។
ប៉ុន្តែគណៈកម្មការអឺរ៉ុបនៅមានសុទិដ្ឋនិយម ជឿថាតំបន់អឺរ៉ូនឹងមិនធ្លាក់ក្នុងវិបត្តិសេដ្ឋកិច្ចដើរថយក្រោយទេ។ អឺរ៉ុបនឹងស្គាល់ភាពប្រសើរឡើងប្រសិនបើតម្លៃប្រេង និងវត្ថុធាតុដើម បន្តធ្លាក់ថ្លៃវិញ។
នៅសហរដ្ឋអាមេរិកក៏ដូចគ្នា។ អាមេរិកកំពុង ឆ្លងកាត់វិបត្តិអតិផរណាយ៉ាងធ្ងន់ធ្ងរ ជាលំដាប់ពីមួយខែទៅមួយខែ។ តម្លៃទំនិញ គ្រប់វិស័យ មានជាអាទិ៍ ផ្ទះសម្បែង ប្រេង ស្បៀងអាហារ និងវត្ថុចាំបាច់ក្នុងជីវភាពប្រចាំ បានឡើងថ្លៃយ៉ាងខ្លាំង នៅក្នុងខែមិថុនា២០២២នេះ។ ជាលើកទីមួយ គិតចាប់តាំងពីឆ្នាំ១៩៨១មក តម្លៃទំនិញបានឡើងថ្លៃ១០% ឯតម្លៃប្រេងបានឡើងថ្លៃ៤១,៥% ក្នុងមួយឆ្នាំ។ សម្រាប់លោកប្រធានាធិបតីអាមេរិក ចូ បៃដិន បរិបទអន្តរជាតិ និយាយឱ្យចំគឺសង្គ្រាមនៅអ៊ុយក្រែន ជាដើមហេតុនាំឱ្យតម្លៃប្រេងនិងធញ្ញជាតិឡើងថ្លៃ។ កំពុងស្ថិតនៅតំបន់ដើមបូព៌ា លោកបៃដិន កំពុងសាកល្បងបញ្ចុះបញ្ចូលអារ៉ាប៊ីសាអូឌីត ប្រទេសនាំចេញប្រេងលេខមួយពិភពលោក ឱ្យព្រមផលិតប្រេងច្រើនជាងមុនដើម្បីបញ្ចុះតម្លៃប្រេង ក្រែងអាចបន្ធូរបន្ថយវិបត្តិអតិផរណាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ