នៅអឺរ៉ុប ប្រទេសជាច្រើន កំពុងតែរងគ្រោះដោយភ្លើងឆេះព្រៃ
នៅអឺរ៉ុប ក្នុងមួយខែមកនេះ រលកកម្តៅក្តៅខ្លាំង មានដល់ទៅ២លើក ដែលបានបង្កឲ្យមានហេតុភេទ អាក្រក់ជាច្រើន។ សីតុណ្ហភាពខ្ពស់ និងភ្លើងឆេះព្រៃ កំពុងតែគ្របដណ្តប់នៅអឺរ៉ុប ចាប់តាំងពីប្រទេសប័រទុយហ្កាល់ បារាំង អេស្ប៉ាញ និងអង់គ្លេស។ អ្នកជំនាញលើកឡើងថា នេះគ្រាន់តែជាមួយចំណែកតូចមួយនៃផលវិបាកនៃការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០២:២៧
នៅប័រទុយហ្កាល់ រលកកម្តៅក្តៅខ្លាំងមួយសប្តាហ៍មកហើយ និងបានបង្កើតឲ្យភ្លើងឆេះព្រៃបន្តកន្ទុយគ្នា។ ភ្នាក់ងារពន្លត់អគ្គិភ័យ បួនដប់ក្រុម បានចែកជើងគ្នាគ្រប់គ្រងស្ថានការណ៍ ហើយគេប្រមូលភ្នាក់ងារពន្លត់ភ្លើង ដល់ទៅជាង៩០០នាក់។ នៅក្នុងហេតុការណ៍ពន្លត់ភ្លើងនេះ យ៉ាងហោចមានមនុស្សស្លាប់ពីរនាក់ ក្នុងនោះ ម្នាក់ជាអ្នកបើកយន្តហោះដឹកទឹកនិងឧស្ម័នដើម្បីពន្លត់ភ្លើង។ នេះបើតាមដំណឹងរបស់ទីភ្នាក់ងារព័ត៌មាន AFP។ គិតត្រឹមថ្ងៃទី១៥កក្កដា នៅប័រទុយហ្កាល់ ព្រះអគ្គីបានលេបត្របាក់ព្រៃឈើក្នុងផ្ទៃដី៣ម៉ឺនហិកតា។
ចំណែកនៅស្រុកបារាំង ប៉ែកនីរតី គឺមានភ្លើងឆេះពីរកើតឡើង រាលដាលប្រមាណលើផ្ទៃដី ជិត ៨ពាន់ហិកតា។ ពីថ្ងៃអង្គារ ភ្លើងឆេះនៅខាងត្បូងខេត្តប័រដូរ, បារាំងប្រមូលភ្នាក់ងារពន្លត់អគ្គិភ័យ ជាង១ពាន់ ទៅជួយពន្លត់ភ្លើង ហើយជម្លៀសប្រជាជនជាង១ម៉ឺន១ពាន់នាក់ ចេញពីតំបន់គ្រោះថ្នាក់។ នៅថ្ងៃព្រហស្បតិ៍ ភ្លើងឆេះនៅ Avignon រាល់ដាលលើផ្ទៃដី ១ពាន់២រយហិកតា។
នៅអេស្ប៉ាញ ភ្លើងចេះព្រៃកើតមានជាច្រើនពាន់ហិកតារួចមកហើយ ហើយរលកកម្តៅ នៅតែបន្តកើនឡើងជាង៤០អង្សា និងកន្លែងខ្លះ ជិត៤៤អង្សា។ លោកនាយករដ្ឋមន្ត្រី Pedro Sanchez ប្រកាសឲ្យប្រុងប្រយ័ត្ន និងត្រៀមជម្លៀសប្រជាជននៅក្នុងសង្កាត់មួយចំនួន ជាបន្ទាន់។
នៅអង់គ្លេសវិញ ជាលើកទី១ហើយ ដែលអង់គ្លេសជួបរលកកម្តៅក្តៅខ្លាំង រហូតដល់ប្រកាសអាសន្នចំណុចក្រហម។ អ្នកជំនាញខាងអាកាសធាតុ Nikos Christidis មានប្រសាសន៍ថា គេមិនដែលនឹកស្មានដល់សោះ ឈានមកដល់ដំណាក់កាលនេះ ប៉ុន្តែ ទីបំផុត អង់គ្លេសត្រូវប្រឈមនឹងអាកាសធាតុក្តៅខ្លាំងលើស៤០អង្សា។ កាលពីឆ្នាំ២០១៩ កម្តៅក្តៅបំផុត ត្រឹមតែជាង៣៨អង្សា តែពេលនេះ ដល់ទៅ៤០អង្សា។
អ្នកជំនាញរបស់អង្គការសហប្រជាជាតិ បានទាញសញ្ញាអាសន្ន ឲ្យគេប្រយ័ត្នពីគុណភាពខ្យល់ បន្ទាប់ពីនិងអំឡុងពេល ឆេះព្រៃនេះ និងបន្តថា ហេតុការណ៍នៅពេលនេះ គឺគ្រាន់តែជាមួយចំណែកតូចនៃផលវិបាកនៃការប្រែប្រួលអាកាសធាតុ។ ពោលគឺមាន បណ្តាសាធម្មជាតិ ផ្សេងទៀតនឹងកើតឡើង ប្រសិនបើមនុស្សលោក មិនប្តូរឥរិយាបថ ក្នុងការបំផ្លាញធម្មជាតិ ទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ