លោកពូទីនប្រាប់ឲ្យគេតស៊ូយកឈ្នះលើការលំបាកដែលបង្កឡើងដោយ ទណ្ឌកម្មសេដ្ឋកិច្ច
រុស្ស៊ីកំពុងធ្លាក់ខ្លួន រងគ្រោះដោយសារទណ្ឌកម្មសេដ្ឋកិច្ចរបស់ក្រុមប្រទេសលោកខាងលិច។ គឺប្រធានាធិបតីរុស្ស៊ី លោកវ្លាឌីមៀរ ពូទីនផ្ទាល់ដែលជាអ្នកប្រកាសផ្ទាល់មាត់។ នៅក្នុងកិច្ចប្រជុំតាមវីដេអូ ដែលត្រូវចាក់ផ្សាយដោយទូរទស្សន៍ជាតិ រុស្ស៊ី កាលពីថ្ងៃចន្ទទី ១៨ កក្កដា លោកពូទីនបាននិយាយប្រាប់ឲ្យគេតស៊ូ ជំនះការលំបាកដ៏ធំធេង ដែលបន្សល់ដែលបង្កឡើងដោយទណ្ឌកម្មសេដ្ឋកិច្ចរបស់ក្រុមប្រទេសលោកខាងលិច។ នៅថ្ងៃចន្ទ ប្រមុខការបរទេសអឺរ៉ុបបានអះអាងថា ទណ្ឌកម្មសេដ្ឋកិច្ចលើរុស្ស៊ី ដែលបានធ្វើសង្រ្គាមឈ្លានពានអ៊ុយក្រែន កំពុងហុចផលជាបណ្តើរៗហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
ខណៈពេលដែលរដ្ឋមន្រ្តីការបរទេសអឺរ៉ុបត្រូវពិភាក្សាពីការដាក់ទណ្ឌកម្មថ្មីបន្ថែមលើរុស្ស៊ី នៅទីក្រុងព្រុចស៊ែល កាលពីថ្ងៃចន្ទ ប្រមុខការបរទេសអឺរ៉ុប លោក ចូសែហ្វ បូរ៉ែល បានទាត់ចោលកាលើកឡើងរបស់ថ្នាក់ដឹកនាំអឺរ៉ុបមួយចំនួនដែលថា ទណ្ឌកម្មអឺរ៉ុបទៅលើរុស្ស៊ី ដោយសារសង្រ្គាមឈ្លានពានអ៊ុយក្រែន គឺជាកំហុសឆ្គង ជាការយល់ច្រលំដ៏ធំមួយ។
មេដឹកនាំអឺរ៉ុបដែលប្រមុខការបរទេសអឺរ៉ុបចង់និយាយសំដៅ គឺនាយករដ្ឋមន្រ្តីហុងគ្រី លោកវិចទ័រ អរបាន ដែលបានបរិហាររិះគន់នយោបាយដាក់ទណ្ឌកម្មទៅលើរុស្ស៊ី ថា កំពុងធ្វើឲ្យប៉ះពាល់ដល់សេដ្ឋកិច្ចអឺរ៉ុប ច្រើនជាងសេដ្ឋកិច្ចរុស្ស៊ី។ សម្រាប់ប្រមុខរដ្ឋាភិបាលហុងគ្រី ដែលជាមនុស្សស្និទ្ធនឹងលោកប្រធានាធិបតីពូទីន ការដាក់ទណ្ឌកម្មសេដ្ឋកិច្ចរបស់អឺរ៉ុប ទៅលើរុស្ស៊ី តាមរយៈការឈប់ទិញនាំចូលប្រេងពីរុស្ស៊ី គឺប្រៀបបីដូចជាអឺរ៉ុបកំពុងបាញ់បំផ្លាញសួតរបស់ខ្លួនឯងយ៉ាងដូច្នេះដែរ។ អឺរ៉ុបចេញវិធានការដាក់ទណ្ឌកម្មដើម្បីឲ្យរុស្ស៊ីឈឺ ប៉ុន្តែ គឺអឺរ៉ុបខ្លួនឯងទេ ដែលឈឺចាប់ជាងរុស្ស៊ី។
រដ្ឋមន្រ្តីការបរទេសលុចសំបួរវិញ បានទាត់ចោលគំនិតដែលទាមទារឲ្យគេដកចោលទណ្ឌកម្មសេដ្ឋកិច្ចពីរុស្ស៊ី។ ប្រមុខការបរទេសអឺរ៉ុប និងមេដឹកនាំអឺរ៉ុបមួយចំនួនវាយតម្លៃថា ទណ្ឌកម្មកំពុងបំផ្លាញសេដ្ឋកិច្ចរុស្ស៊ី ជាបណ្តើរៗ និងថា អឺរ៉ុបនឹងបង្កើនការដាក់ទណ្ឌកម្ម បើសិនលោកពូទីនមិនព្រមដកទ័ពរុស្ស៊ីចេញពីអ៊ុយក្រែន។
ទណ្ឌកម្មសេដ្ឋកិច្ចរបស់ប្រទេសលោកខាងលិចបានបង្កផលវិបាកដ៏ធំធេង ព្រោះវាបានផ្តាច់រុស្ស៊ីមិនឲ្យប្រើបច្ចេកវិទ្យារបស់ប្រទេសលោកខាងលិច ដែលរុស្ស៊ីធ្លាប់តែពឹងផ្អែកខ្លាំងរហូតមក។ នេះជាប្រសាសន៍របស់ប្រមុខរដ្ឋរុស្ស៊ី ដែលបានអំពាវនាវឲ្យ តស៊ូ ជំនះលើការលំបាកដ៏មហិមា ដែលបង្កឡើងដោយការដាក់ទណ្ឌកម្មរបស់ប្រទេសលោកខាងលិច។ នៅក្នុងកិច្ចប្រជុំតាមវីដេអូ ដែលទូរទស្សន៍រុស្ស៊ីចាក់ផ្សាយកាលពីថ្ងៃចន្ទ ប្រធានាធិបតីរុស្ស៊ីបានប្រាប់ឲ្យគេប្រឹងប្រែងស្វែងរកដំណោះស្រាយសម្រាប់បញ្ហាប្រឈមដ៏ធំរបស់រុស្ស៊ី តាមរយៈការប្រើប្រាស់បច្ចេកវិទ្យាក្នុងស្រុក និងអភិវឌ្ឍនវានុវត្តន៍របស់ក្រុមហ៊ុនជាតិ។
ដោយសារទណ្ឌកម្មលើរុស្ស៊ី ដែលចូលធ្វើសង្រ្គាមឈ្លានពានអ៊ុយក្រែន ក្រុមហ៊ុនបច្ចេកវិទ្យាធំៗ ដូចជា Microsoft Apple Google Adobe ឬCiscoបានចាកចេញពីទឹកដីរុស្ស៊ី ដែលជាហេតុធ្វើឲ្យអតិថិជនដូចជាក្រុមហ៊ុន និងស្ថាប័នរុស្ស៊ី លែងបានប្រើប្រាស់ ទទួលសេវាតទៅទៀត។ តាមប្រធានាធិបតីរុស្ស៊ី ទណ្ឌកម្មរបស់លោកខាងលិចបានប៉ះពាល់ផងដែរ ដល់ក្រុមហ៊ុនបច្ចេកវិទ្យារុស្ស៊ី ដូចជាYandex និងOzon ដែលធ្លាប់រកបានប្រាក់ចំណូលនៅទីផ្សារអន្តរជាតិ ឬក៏ ធ្លាប់ធ្វើការជាមួយស្ថាប័នហិរញ្ញវត្ថុបរទេស។ សម្រាប់ប្រធានាធិបតីរុស្ស៊ី នៅចំពោះមុខការប្រឈមដ៏ធំសម្បើម វាចាំបាច់ណាស់ ដែលរុស្ស៊ីត្រូវអភិវឌ្ឍឲ្យបានឆាប់បំផុត នូវយន្តការនានា នៅក្នុងប្រព័ន្ធហិរញ្ញវត្ថុរុស្ស៊ី ដើម្បីជួយឲ្យក្រុមហ៊ុនថ្មីថ្មោងអាចរីកចម្រើន ទៅមុខ។
ការអំពាវនាវរបស់ប្រធានាធិបតីរុស្ស៊ីអាចមិនសូវមានប្រសិទ្ធិភាព ព្រោះថា ដោយសារទណ្ឌកម្មសេដ្ឋកិច្ច រុស្ស៊ី បានបាត់បង់ធនធានមនុស្ស ដ៏ច្រើនសន្ធឹកសន្ធាប់ ជាពិសេស នៅក្រោយការរត់ចំណាកស្រុករបស់ជនជាតិរុស្ស៊ីរាប់ម៉ឺននាក់ ដែលធ្លាប់បម្រើការក្នុងផ្នែកបច្ចេកវិទ្យា។ លោកពូទីន បាននិយាយហើយថា រុស្ស៊ីនៅខ្វះធនធានមនុស្សខាងផ្នែកបច្ចេកវិទ្យា ប្រមាណ ១លាននាក់ នៅឆ្នាំ ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ