ធនាគារកណ្តាលអឺរ៉ុប សម្រេចចិត្តដ៏កម្រ ដំឡើងអត្រាការប្រាក់ លើប្រាក់កម្ចី
នៅថ្ងៃព្រហស្បតិ៍ ទី២១កក្កដា ធនាគារកណ្តាលអឺរ៉ុប បានសម្រេចដំឡើងអត្រាការប្រាក់ លើប្រាក់កម្ចី។ នេះគឺជាការសម្រេចចិត្តដ៏កម្របំផុត និងជាលើកទី១ នៅក្នុងរយៈពេលជាង១ទសវត្សរ៍មកនេះ។ ធនាគារកណ្តាលអឺរ៉ុប ដែលមានមូលដ្ឋាននៅប្រទេសអាល្លឹម៉ង់ បានពន្យល់ថា ការធ្វើដូច្នេះគឺដើម្បីទប់ទល់នឹងវិបត្តិអតិផរណាទំនិញ។
ចុះផ្សាយនៅថ្ងៃ៖
ស្តាប់ - ០២:១៩
ធនាគារកណ្តាលអឺរ៉ុប បានពន្យល់ថា ប៉ុន្មានថ្ងៃចុងក្រោយនេះ អតិផរណាទំនិញ គឺគ្មានការស្រកស្រុត ហើយចេះតែឡើងខ្ពស់ទៅៗ។ ទិដ្ឋិភាពទំនិញឡើងថ្លៃ លុយចុះថោក នេះ កើតមានគួរឲ្យកត់សម្គាល់នៅក្នុងប្រទេសតំបន់ចាយប្រាក់អឺរ៉ូ និងដែលប្រាក់អឺរ៉ូចុះថោកស្ទើរតែស្មើនឹងប្រាក់ដុល្លារ នាពេលថ្មីៗនេះ។ បើគិតពីខែមុន ក្នុងប្រទេសតំបន់ចាយប្រាក់អឺរ៉ូ គឺអតិផរណាទំនិញ បានបោះពួយហក់ឡើងខ្ពស់រហូតដល់៨,៦%។
បើតាមធនាគារកណ្តាលអឺរ៉ុប គឺមានហេតុផលច្រើនយ៉ាងដើម្បីពន្យល់រឿងនេះ។ មូលហេតុដែលគេដឹងគ្រប់គ្នា គឺកូវីដ១៩ដែលអូសបន្លាយ ហើយជំងឺនេះក៏កំពុងតែរើបរើឡើងវិញ នៅតំបន់ខ្លះ។ មួយទៀត គឺព្រោះតែវិបត្តិថាមពលនិងឧស្ម័ន ដែលដចេញពីសង្គ្រាមរុស្ស៊ីឈ្លានពានអ៊ុយក្រែន។ ទន្ទឹមនឹងគ្នានេះ ការបិទផ្អាកបង្ហូរឧស្ម័នរបស់ក្រុមហ៊ុនឧស្ម័នរុស្ស៊ី Gazprom ដែលឈប់បង្ហូរឧស្ម័នតាមបំពង់ Nord Stream ១ រយៈពេល១០ថ្ងៃ ពីពេលថ្មីៗនេះ ក៏ជាចំណែកមួយ ជំរុញឲ្យទំនិញឡើងថ្លៃខ្ពស់ យ៉ាងឆាប់រហ័សមួយរំពេច ហើយនិងផ្តល់ភាពស្រពិចស្រពិលមិនប្រាកដប្រជាចំពោះទីផ្សារទំនិញនិងតម្លៃឧស្ម័ន។
មូលហេតុធំមួយទៀត គឺការលាចុះពីតំណែងនាយករដ្ឋមន្រ្តីអ៊ីតាលី របស់លោក ម៉ារីយ៉ូ ដ្រាហ្គី នៅថ្ងៃព្រហស្បតិ៍។ រឿងនេះប៉ះពាល់ដល់ទីផ្សារភាគហ៊ុនផង និងជះឥទ្ធិពលដល់ទីផ្សារហិរញ្ញវត្ថុនៅអឺរ៉ុបមិនតិចទេ ក៏ព្រោះតែលោក ម៉ារីយ៉ូ ដ្រាហ្គី ធ្លាប់កាន់តំណែងជាប្រធានធនាគារកណ្តាលអឺរ៉ុប កាលពីបួនដប់ឆ្នាំមុន។ លោកគឺជាតួអង្គដ៏សំខាន់និងជានិមិត្តរូបមួយនៃស្ថិរភាពទីផ្សារហិរញ្ញវត្ថុ ប៉ុន្តែនៅពេលដែលលោកលាលែងចុះពីកៅអីប្រមុខរដ្ឋាភិបាលអ៊ីតាលី ក៏ធ្វើឲ្យមានភាពជ្រួលច្របល់។ ពិសេសគឺការលាលែងពីតំណែងភ្លាមៗពេក ក៏បានបង្កើនអត្រាការខ្ចីប្រាក់របស់អ៊ីតាលី នៅលើទីផ្សារដែរ។
ហេតុដូច្នេះហើយ ទើបធនាគារកណ្តាលអឺរ៉ុប បានសម្រេចចិត្តដ៏កម្រ ដំឡើងអត្រាការប្រាក់ លើប្រាក់កម្ចី ក៏ដើម្បីជួយពន្យឺតអតិផរណាទំនិញ និងបានពន្យល់ទៀតថា រតនាគារជាតិសហរដ្ឋអាមេរិក ក៏ធ្លាប់បានធ្វើ និងកំពុងបន្តធ្វើរបៀបបែបនេះដែរ ចាប់តាំងពីខែមីនាមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ