អ៊ុយក្រែនចោទប្រកាន់រុស្ស៊ីថាបានបាញ់មីស៊ីលបំផ្លាញកន្លែងស្តុកស្រូវសាលី នៅកំពង់ផែអូដេសា
អ៊ុយក្រែនបានចោទប្រកាន់រុស្ស៊ីកាលពីថ្ងៃសៅរ៍ម្សិលមិញថា បានបាញ់មីស៊ីលបណ្តែតសំដៅកំពង់ផែ អូដេសា ដែលជាទីតាំងស្តុកស្រូវសាលីសំខាន់បំផុតរបស់អ៊ុយក្រែន។ ភាគីអ៊ុយក្រែនចាត់ទុកទង្វើរបស់រុស្ស៊ីថា ជាការស្តោះទឹកមាត់ ដាក់មុខអង្គការសហប្រជាជាតិ និងតួកគី ព្រោះថា វាកើតឡើងនៅមួយថ្ងៃក្រោយ រុស្ស៊ីបានចុះហត្ថលេខាលើកិច្ចព្រមព្រៀង ស្តីពីការបើកផ្លូវ សម្រាប់ការនាំចេញស្រូវសាលីអ៊ុយក្រែនតាមច្រកសមុទ្រខ្មៅ ដែលនៅក្នុងនោះមានផងដែរ ពីកំពង់ផែអូដេសា។ រុស្ស៊ីវិញ បានប្រាប់ក្រសួងការពារជាតិតួកគីថា រុស្ស៊ីគ្មានជាប់ពាក់ព័ន្ធនឹងការបាញ់មីស៊ីលបំផ្លាញកំពង់ផែអូដេសា នោះទេ។
ចុះផ្សាយនៅថ្ងៃ៖
ស្តាប់ - ០២:២៩
កិច្ចព្រមព្រៀងរុស្ស៊ី អ៊ុយក្រែនស្តីពីការបើកច្រកសម្រាប់នាំចេញស្រូវសាលីអ៊ុយក្រែន ចូលជាធរមាន មិនបានមួយថ្ងៃផង ភាគីអ៊ុយក្រែនបានចោទប្រកាន់រុស្ស៊ីថា បានបាញ់មីស៊ីលបណ្តែតសំដៅកំពង់ផែអូដេសា ដែលជាទីតាំងស្តុកស្រូវសាលីរបស់អ៊ុយក្រែន។
នៅលើបណ្តាញតេឡេក្រាម ទីបញ្ជាការដ្ឋានក្រុមប្រតិបត្តិការខាងត្បូងរបស់កងទ័ពអ៊ុយក្រែនបានសរសេរថា នៅព្រឹកថ្ងៃសៅរ៍ មីស៊ីលបណ្តែតរបស់រុស្ស៊ី បានធ្លាក់លើកំពង់ផែអូដេសា ចំណែកមីស៊ីលរុស្ស៊ី ពីរទៀត ត្រូវប្រព័ន្ធការពារដែនអាកាសអ៊ុយក្រែនបាញ់ស្ទាក់បំផ្លាញបានមុន។
ភ្លាមៗ ក្រសួងការបរទេសអ៊ុយក្រែនបានទូរស័ព្ទជូនដំណឹងអង្គការសហប្រជាជាតិ និងប្រទេសតួកគី ដែលជាអ្នកជួយផ្ចុងផ្តើម ជំរុញ ឲ្យមានការចុះហត្ថលេខាលើកិច្ចព្រមព្រៀងស្តីពីការនាំចេញស្រូវសាលីអ៊ុយក្រែន។ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គូទែរស៍ បាននិយាយថ្កោលទោស ការវាយប្រហារទៅលើកំពង់ផែអូដេសា។ នេះបើតាមអ្នកនាំពាក្យ លោកFarhan Haq។
នៅក្នុងសេចក្តីថ្លែងការណ៍ នៅថ្ងៃសៅរ៍ អ្នកនាំពាក្យរបស់អគ្គលេខាធិការអង្គការសហប្រជាជាតិបានសង្កត់ធ្ងន់ថា ស្រូវសាលីអ៊ុយក្រែនគឺជាតម្រូវការចាំបាច់បំផុតដើម្បីសម្រាលវិបត្តិខ្វះស្បៀង និងការឈឺចាប់ ភាពអត់ឃ្លានរបស់ប្រជាជនរាប់លាននៅក្នុងពិភពលោក។ ដូច្នេះ ភាគីហត្ថលេខី តួកគី រុស្ស៊ី និងអ៊ុយក្រែន ត្រូវគោរពអនុវត្ត ជាបន្ទាន់។
រដ្ឋមន្រ្តីការពារជាតិតួកគីវិញ ដែលជាភាគីហត្ថលេខីមួយដែរនៃកិច្ចព្រមព្រៀង បានសំដែងក្តីបារម្ភ ដែលឃើញឧប្បត្តិហេតុកើតឡើង នៅតែមួយថ្ងៃក្រោយការចុះហត្ថលេខាលើកិច្ចព្រមព្រៀង។ ទៅតាមកិច្ចព្រមព្រៀង ដែលចុះហត្ថលេខាដោយរុស្ស៊ី តួកគី អ៊ុយក្រែន និងអង្គការសហប្រជាជាតិ រុស្ស៊ី និងអ៊ុយក្រែនយល់ព្រមអនុវត្តបទឈប់បាញ់ នៅសមុទ្រខ្មៅដើម្បីធានាសុវត្ថិភាព សម្រាប់ចរាចរណ៍ដឹកជញ្ជូនស្រូវសាលីអ៊ុយក្រែន ២៥លានតោនដែលនៅជាប់គាំងនៅកំពង់ផែ ដោយសារសង្រ្គាមរុស្ស៊ីឈ្លានពានអ៊ុយក្រែន។
តាមរដ្ឋមន្រ្តីការពារតួកគី សមភាគីរុស្ស៊ី ដែលលោកបានទាក់ទង បាននិយាយថា រុស្ស៊ី គ្មានជាប់ពាក់ព័ន្ធនឹងការវាយប្រហារលើកំពង់ផែអូដេសា កាលពីថ្ងៃសៅរ៍ម្សិលមិញនោះទេ។ នៅរសៀលថ្ងៃសៅរ៍ កងទ័ពអ៊ុយក្រែនបាននិយាយថា ការវាយប្រហារមីស៊ីលរបស់រុស្ស៊ីមិនបានបង្កឲ្យមានការខូចខាតធំដំនៅកំពង់ផែអូដេសា ពោលគឺគ្រាប់មីស៊ីលរុស្ស៊ីមិនបានបំផ្លាញ ចំទីតាំងស្តុកស្រូវសាលីអ៊ុយក្រែន នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ