សហភាពអាហ្វ្រិកអបអរសាទរកិច្ចព្រមព្រៀងអ៊ុយក្រែន រុស្ស៊ី ស្តីពីការនាំចេញស្រូវសាលី
អាហ្វ្រិកដែលពឹងផ្អែកខ្លាំងលើការនាំចូលស្រូវសាលីអ៊ុយក្រែន និងរុស្ស៊ី បានសំដែងក្តីត្រេកអរ ដែលឃើញ រុស្ស៊ី និងអ៊ុយក្រែន ចុះហត្ថលេខាលើកិច្ចព្រមព្រៀងស្តីពីការបណ្តោះចេញស្រូវសាលី អ៊ុយក្រែន ដែលជាប់គាំងដោយសារសង្រ្គាម។ នៅក្នុងសេចក្តីថ្លែងការណ៍របស់ខ្លួន នៅថ្ងៃសៅរ៍នេះ សហភាពអាហ្វ្រិកនិយាយចាត់ទុកកិច្ចព្រមព្រៀង រុស្ស៊ី និងអ៊ុយក្រែន ថា ជាការឆ្លើយតបទៅនឹងការទាមទាររបស់មេដឹកនាំសហភាពអាហ្វ្រិក នៅក្នុងអំឡុងជំនួបជាមួយប្រធានាធិបតីរុស្ស៊ី លោកពូទីន កាលពីដើមខែមិថុនាកន្លងទៅ។
ចុះផ្សាយនៅថ្ងៃ៖
ស្តាប់ - ០២:៤០
អាហ្វ្រិកដែលមានពាក់កណ្តាលស្រូវសាលីរបស់ខ្លួន នាំចូលផ្ទាល់មកពីរុស្ស៊ី និងអ៊ុយក្រែន អបអរស្វាគមកិច្ចព្រមព្រៀងដែលប្រទេសគូជម្លោះទាំងពីរបានចុះហត្ថលេខា កាលពីថ្ងៃសុក្រនៅទីក្រុងអ៊ីស្តង់ប៊ូល ប្រទេសតួកគី។ សម្រាប់សហភាពអាហ្វ្រិក កិច្ចព្រមព្រៀងស្តីពីការបើកផ្លូវសម្រាប់នាំចេញស្រូវសាលីអ៊ុយក្រែន គឺជាទិសដៅចង់បានរបស់មេដឹកនាំសហភាពអាហ្វ្រិក លោកMacky Sall នៅក្នុងជំនួបជាមួយលោកប្រធានាធិបតីពូទីន នៅទីក្រុងសុតឈី។ នេះបើតាមសេចក្តីថ្លែងការណ៍របស់សហភាពអាហ្វ្រិក នៅថ្ងៃសៅរ៍ ទី ២៣កក្កដា។
នៅក្នុងសារទ្វីត លោកប្រធានាធិបតីសេណេហ្កាល់ Macky Sall បានសរសេរថ្លែងអំណរគុណ លោកប្រធានាធិបតីពូទីន លោកប្រធានាធិបតី ហ្សេឡេនស្គី និងប្រធានាធិបតីអ៊ែរដូហ្កាន ដែលប្រឹងប្រែងជំរុញឲ្យមានកិច្ចព្រមព្រៀង ស្តីពីស្រូវសាលីអ៊ុយក្រែន។
សង្រ្គាមរុស្ស៊ីឈ្លានពានអ៊ុយក្រែនដែលបានបង្អាក់ការនាំចេញស្រូវសាលីរបស់អ៊ុយក្រែនបានបង្កើតឲ្យមានវិបត្តិខ្វះស្បៀង ទំនិញឡើងថ្លៃ នៅក្នុងពិភពលោក ជាពិសេស នៅបណ្តាប្រទេសនៅអាហ្វ្រិក ដូចជានៅតំបន់ស្នែងអាហ្វ្រិក ដែលកំពុងជួបគ្រោះទុរ្ភិក្សដោយសារភាពរាំងស្ងួត និងគ្រោះទឹកជំនន់ ៥ឆ្នាំជាប់គ្នា។
នៅថ្ងៃសុក្រ អង្គការដែលធ្វើការទៅតំបន់អាហ្វ្រិក ឈ្មោះ គណៈកម្មាធិការសង្រ្គោះអន្តរជាតិ បានចេញសេចក្តីថ្លែងការណ៍អបអរ និងចាត់ទុកកិច្ចព្រមព្រៀងអ៊ុយក្រែន និងរុស្ស៊ី ថា ជាដំណាក់កាលសម្រាប់ឈានទៅដោះស្រាយវិបត្តិស្បៀងក្នុងពិភពលោក។
តាមប្រធាន គណៈកម្មាធិការសង្រ្គោះអន្តរជាតិ ការបញ្ចេញស្រូវសាលីអ៊ុយក្រែននឹងជួយសម្រាល កាត់បន្ថយគ្រោះអត់ឃ្លានរបស់ប្រជាជនជាង ១៨លាននាក់ នៅអាហ្វ្រិកខាងកើត ដែលនៅក្នុងនោះ ៣លាននាក់កំពុងស្ថិតក្នុងលក្ខខណ្ឌដាច់អាហារធ្ងន់ធ្ងរ។
កម្មវិធីស្បៀងអាហារពិភពលោកធ្លាប់បានបង្ហាញថា មនុស្សជាង៤៧លាននាក់បន្ថែមទៀត នៅក្នុងពិភពលោកធ្លាក់ខ្លួនប្រឈមនឹងគ្រោះអត់ឃ្លាន ចាប់តាំងពីការផ្ទុះសង្រ្គាមអ៊ុយក្រែន។
សម្រាប់ប្រធានាធិបតី អាហ្រ្វិកខាងត្បូង លោក ស៊ីរីល រ៉ាម៉ាហ្វូសា វិបត្តិស្រូវសាលីអ៊ុយក្រែនលើកនេះ ក៏អាចជាសារដាស់ស្មារតីប្រជាជនអាហ្វ្រិកឲ្យភ្ញាក់ដឹងខ្លួន ថា ត្រូវតែប្រែក្លាយខ្លួនជាអ្នកផលិតស្រូវសាលី និងជីគីមី ដោយខ្លួនឯង ដោយលែងពឹងអាស្រ័យលើការនាំចូលមកពីប្រទេសអឺរ៉ុបតទៅទៀត។ ឡើងថ្លែងនៅក្បែរប្រធានាធិបតីអាហ្វ្រិកខាងត្បូង នៅទីក្រុងPretoria លោកអាឡាសាន អួតារ៉ា ប្រធានាធិបតី កូឌីវ័រ ឯណោះវិញ បញ្ជាក់ថា នៅក្នុងកិច្ចសន្ទនាតាមទូរស័ព្ទជាមួយប្រធានាធិបតីអ៊ុយក្រែន នៅដើមសប្តាហ៍នេះ លោកបានទាមទារថា អាហ្វ្រិកគួរតែជាទិសដៅអាទិភាព សម្រាប់ការនាំចេញស្រូវសាលីដំបូងគេរបស់អ៊ុយក្រែន បន្ទាប់ពីជាប់គាំងជាង៥ខែដោយសារសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ