រុស្ស៊ីប្រែសំដី ទទួលស្គាល់ការបាញ់មីស៊ីលលើក្រុងកំពង់ផែអូដេសាអ៊ុយក្រែន
បន្ទាប់ពីបានបដិសេធភ្លាមប្រាប់ភាគីតួកគីថាគ្មានពាក់ព័ន្ធនឹងការវាយប្រហារលើក្រុងកំពង់ផែអូដេសារបស់អ៊ុយក្រែន នៅថ្ងៃអាទិត្យទី ២៤កក្កដានេះ រុស្ស៊ីបានប្រែសំដី ដោយអះអាងថា ការបាញ់មីស៊ីលលើក្រុងកំពង់ផែអូដេសារបស់អ៊ុយក្រែន កាលពីម្សិលមិញ គ្មានពាក់ព័ន្ធនឹងស្រូវសាលីទេ តែមីស៊ីលដ៏ទំនើបរបស់រុស្ស៊ីបានបំផ្លាញនាវាយោធាអ៊ុយក្រែននិងមីស៊ីលដែលសហរដ្ឋអាមេរិកបញ្ជូនមកឱ្យអ៊ុយក្រែនប្រើនៅតំបន់អូដេសា។
ចុះផ្សាយនៅថ្ងៃ៖
ស្តាប់ - ០១:៥៩
តបទៅនឹងពាក្យចោទប្រកាន់របស់លោកប្រធានាធិបតីអ៊ុយក្រែន ហ្សេឡេនស្គី ថាមូស្គូតែងលេបសំដីខ្លួនឯងជាស្វ័យប្រវត្តិ ហើយការវាយប្រហារដោយមីស៊ីលរបស់រុស្ស៊ីលើក្រុងកំពង់ផែអូដេសា បានបំផ្លាញលទ្ធភាពចរចានិងលទ្ធភាពស្រុះស្រួលគ្នា អ្នកនាំពាក្យក្រសួងការបរទេសរុស្ស៊ី បានឆ្លើយតាំងពីព្រឹកព្រលឹមថ្ងៃអាទិត្យ តាមប្រព័ន្ធសង្គមតេឡេក្រាម ថា មីស៊ីល Kalibr បានបំផ្លាញរចនាសម្ព័ន្ធរបស់កំពង់ផែក្រុងអូដេសា ចំតាមទិសដៅច្បាស់ណាស់។ ពីរបីម៉ោងបន្ទាប់មកទៀត ក្រសួងការពារជាតិ ដែលធ្លាប់បដិសេធកាលពីម្សិល ក៏បានចេញសេចក្តីថ្លែងការណ៍អះអាងដែរថា មីស៊ីលរយៈឆ្ងាយ ដ៏ទំនើបនិងត្រង់បំផុត ដែលបានបាញ់ចេញពីសមុទ្ទ បានបំផ្លាញនាវាយោធាអ៊ុយក្រែន ចតស្ងៀមនៅកំពង់ផែ និងឃ្លាំងស្តុកមីស៊ីលដែលអាមេរិកផ្តល់ឱ្យអ៊ុយក្រែន។
ដូច្នេះតាមបច្ចេកទេស រុស្ស៊ីអាចមិនបានរំលោភកិច្ចព្រមព្រៀងមែន ប៉ុន្តែសាររបស់ក្រសួងការពារជាតិនិងការបរទេសរុស្ស៊ី គ្មានផ្តល់ភស្តុតាងបញ្ជាក់ពីអ្វីខ្លួនបាននិយាយទេ។ ភ្នាក់ងារសារព័ត៌មានបារាំង ក៏មិនអាចផ្ទៀងផ្ទាត់ដោយឯករាជ្យថាការវាយប្រហាររុស្ស៊ី ប៉ះពាល់ ឬមិនពាល់ឃ្លាំងស្តុកស្រូវសាលីដែរ។ ស្ថានភាពហាក់ស្រពិចស្រពិលណាស់។
យ៉ាងណាក៏ដោយ ក៏សម្រាប់អ៊ុយក្រែន ការនាំចេញនៅអាចប្រព្រឹត្តទៅបាន បើគិតតាមបែបបច្ចេកទេស។ បើតាមក្រសួងរចនាសម្ព័ន្ធអ៊ុយក្រែន ទោះកំពង់ផែរងការខូតខាត តែអាជ្ញាធរមូលដ្ឋាននៅតែបន្តរៀបចំវេចខ្ចប់សម្រាប់ធ្វើការនាំចេញ។ ប្រភព ដដែលបានអះអាងថា អ៊ុយក្រែនកំពុងផ្ចង់ការងាររៀបចំនាំចេញតាមច្រកកំពង់ផែពីរផ្សេងទៀត គឺកំពង់ផែTchornomorsk និង Yuzhneដែលធ្លាប់ធានារ៉ាប់រងការនាំចេញអ៊ុយក្រែនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ