របាយការណ៍បង្ហាញកំពស់ទឹកសមុទ្រនៅអង់គ្លេស ឡើងកាន់តែលឿន
កំពស់ទឹកសមុទ្រនៅអង់គ្លេសកើនឡើងខ្ពស់ ក្នុងល្បឿនមួយដ៏លឿន បើប្រៀបធៀបនឹងសតវត្សរ៍ទី២០។ តាមរបាយការណ៍ប្រចាំឆ្នាំដែលការិយាល័យឧតុនិយមជាតិអង់គ្លេស ចេញផ្សាយ កាលពីថ្ងៃព្រហស្បតិ៍ទី ២៨កក្កដា ការកើនឡើងលឿននៃកំពស់ទឹកសមុទ្រកំពុងគំរាមកំហែង តំបន់នៅតាមឆ្នេរសមុទ្រ។ សម្រាប់អ្នកជំនាញឧតុនិយមអង់គ្លេស ជាមួយកំពស់ទឹកសមុទ្រកើនឡើង ខ្យល់ព្យុះកាន់តែសាហាវអាចវាយបោកបក់ បង្កការខូចខាតកាន់តែធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០១:៥៦
ដោយផ្អែកលើការសង្កេតអាកាសធាតុ និងព្រឹត្តិការណ៍ឧតុនិយមនៅឆ្នាំ ២០២១ ការសិក្សារបស់ការិយាល័យឧតុនិយមជាតិអង់គ្លេសកត់សំគាល់ឃើញ ផលប៉ះពាល់នៃការឡើងកំដៅ ទៅលើអាកាសធាតុ នៅប្រទេសអង់គ្លេស។
នៅប៉ុន្មានទសវត្សរ៍ចុងក្រោយនេះ អង់គ្លេសមានអាកាសធាតុក្តៅជាងមុន សើមជាងមុន និងសំបូរថ្ងៃច្រើនជាងមុន បើប្រៀបធៀបនឹងដើមសតវត្សរ៍ទី២០។ របាយការណ៍ចេញផ្សាយ នៅក្រោយអង់គ្លេសទើបជួបរលកកំដៅខ្លាំង កាលពីសប្តាហ៍មុន នៅពេលឧបករណ៍ ទែរម៉ូម៉ែត្របង្ហាញ លេខ ៤០,៣អង្សា។
តាមរបាយការណ៍សង្ខេប ការប្រែប្រួលអាកាសធាតុមិនត្រឹមជាបញ្ហាសម្រាប់អនាគត ប៉ុន្តែ ឥទ្ធិពលរបស់វាកំពុងជះអាក្រក់រួចទៅហើយទៅលើជីវភាពរស់នៅរបស់ប្រជាជនអង់គ្លេសសព្វថ្ងៃ។
អ្នកជំនាញឧតុនិយមបានកត់សំគាល់ក្នុងរបាយការណ៍ដែរថា កំពស់ទឹកសមុទ្រ នៅបីទសវត្សរ៍ចុងក្រោយនេះ បានកើនលឿន ទ្វេដង នៅតាមកន្លែងខ្លះ បើប្រៀបធៀបនឹងដើមឆ្នាំ ១៩០០។ ចាប់តាំងពីឆ្នាំ ១៩០០ កំពស់ទឹកសមុទ្រនៅអង់គ្លេសកើនឡើង ១៦,៥សង់ទីម៉ែត្រ ពោលគឺប្រមាណ ពី ៣ទៅ ៥,២មីលីម៉ែត្រក្នុងមួយឆ្នាំ។ ជាកំណើនទ្វេដង បើប្រៀបធៀបនឹងដើមសតវត្សរ៍ទី ២០ ដែលកំពស់ទឹកសមុទ្រកើនឡើងប្រមាណ ១,៥មីលីម៉ែត្រក្នុងមួយឆ្នាំ។ មូលហេតុដែលធ្វើឲ្យកំពស់ទឹកសមុទ្រកើនឡើង គឺច្បាស់ណាស់ ការរលាយដុំទឹកកក នៅតំបន់Groenland និងនៅតំបន់អង់តាក់ទិក។
ប្រទេសកោះអង់គ្លេសកំពុងប្រឈមរួចហើយនឹងការសឹករេចរិលតំបន់ឆ្នេរ ដោយសារការវាយបោកបក់របស់ខ្យល់ព្យុះ និងរលកយក្ស។ ថ្មីៗនេះ របាយការណ៍របស់ទីភ្នាក់ងារបរិស្ថានអង់គ្លេសបានវាយតម្លៃថា ប្រជាជនម្នាក់ ក្នុងចំណោម៦នាក់ ត្រូវប្រឈមនឹងគ្រោះទឹកជំនន់ ដោយសារទឹកភ្លៀង ឬដោយសារការឡើងកំពស់ទឹកសមុទ្រ ចំណែក ប្រជាជនអង់គ្លេស១លាននាក់ ត្រូវប៉ះពាល់ដោយផ្ទាល់ដោយសារការឡើងកំពស់ទឹកសមុទ្រ ពីពេលនេះ រហូតដល់ចុងសតវត្សរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ