អឺរ៉ុបមានកំណើនសេដ្ឋកិច្ចល្អ តែប្រឈមខ្លាំងនឹងវិបត្តិសេដ្ឋកិច្ចដើរថយក្រោយ
ដោយសារសន្ទុះក្នុងវិស័យទេសចរណ៍ សេដ្ឋកិច្ចអឺរ៉ុបបានស្គាល់ភាពរឹងមាំខ្លាំង នៅត្រីមាសទីពីរ នៃឆ្នាំ២០២២។ ជាកំណើនសេដ្ឋកិច្ចល្អ និងខ្លាំងជាងការរំពឹងទុកទៅទៀត។ ប៉ុន្តែ ក្នុងបរិបទនៃវិបត្តិអតិផរណាបង្កឡើងដោយសង្គ្រាមនៅអ៊ុយក្រែន អាល្លឺម៉ង់ដែលជាក្បាលម៉ាស៊ីនដឹកនាំអឺរ៉ុប មានកំណើនសេដ្ឋកិច្ចសូន្យ ហើយអាចនឹងអូសទាញអឺរ៉ុបឱ្យធ្លាក់ក្នុងវិបត្តិសេដ្ឋកិច្ចដើរថយក្រោយបាន នៅខែខាងមុខ។
ចុះផ្សាយនៅថ្ងៃ៖
ស្តាប់ - ០២:១៨
ខុសពីការគិតស្មាន នៅត្រីមាសទីពីរនៃឆ្នាំនេះ តំបន់ចាយប្រាក់អឺរ៉ូទាំង១៩ប្រទេស បានស្គាល់កំណើនសេដ្ឋកិច្ច ០,៧% ពោលគឺមានកំណើនលឿនជាងកាលពីត្រីមាសទីមួយទៅទៀត និង០,៦% បើនិយាយអំពីសហភាពអឺរ៉ុបទាំងមូល។ នេះបើតាមទិន្នន័យផ្តល់ដោយវិទ្យាស្ថានស្ថិតិអឺរ៉ុប ចេញផ្សាយនៅថ្ងៃសុក្រទី ២៩កក្កដា២០២២។ ការលើកវិធានការប្រឆាំងនឹងជំងឺរាតត្បាតកូវីដ១៩ ជាកត្តាជំរុញឱ្យសេវាទេសចរណ៍ស្ទុះឡើងខ្លាំង ហើយអូសទាញសេដ្ឋកិច្ចឱ្យបានប្រសើរឡើង។ ប៉ុន្តែសេដ្ឋវិទូបានព្រមានថាវិស័យឧស្សាហកម្មចាប់ទ្រឹងហើយ ដូច្នេះវិបត្តិសេដ្ឋកិច្ចដើរថយក្រោយអាចរសាត់មកដល់ក្នុងពេលឆាប់ៗនេះដែរ។ ជាក់ស្តែង ប្រទេសរំពឹងលើវិស័យសេវាកម្ម ដូចយ៉ាងអេស្ប៉ាញស្គាល់កំណើនខ្លាំងជាងគេ (១,១%) បន្ទាប់មកគឺអ៊ីតាលី (១%) និងបារាំង (០,៥%) ប៉ុន្តែអាល្លឺម៉ង់សូន្យ ព្រោះ ជាប្រទេសឧស្សាហកម្មបំផុតប្រចាំតំបន់ និងរំពឹងខ្លាំងលើការនាំចូលឧស្ម័នរុស្ស៊ី។
កំណើនផលិតផលសរុបក្នុងស្រុកខ្លាំងជាងការព្រាងទុក មិនអាចប្តូរផ្លាស់អ្វីបានទេ។ វិបត្តិថាមពលកាន់តែធ្ងន់ធ្ងរ វិបត្តិអតិផរណាទំនិញឡើងថ្លៃឥតឈប់ និងអត្រាការប្រាក់ខ្ពស់ អាចនឹងច្រានតំបន់អឺរ៉ូឱ្យធ្លាក់ក្នុងវិបត្តិសេដ្ឋកិច្ចដើរថយក្រោយ យ៉ាងយូរត្រឹមចុងឆ្នាំនេះ។ នេះបើតាមពាក្យព្រមានរបស់លោកAndrew Kenningham អ្នកជំនាញសេដ្ឋកិច្ចនិងជា ប្រធានCapital Economics អឺរ៉ុប។ លោកស្រី Christine Lagarde នាយិកាធនាគារអឺរ៉ុបក៏យល់ឃើញដូចគ្នា ថានយោបាយរូបិយបណ្ណប្រឆាំងនឹងវិបត្តិអតិផរណារបស់ធនាគារអឺរ៉ុប អាចនឹងបន្ទុចបង្អាក់សេដ្ឋកិច្ចអឺរ៉ុប ហើយអឺរ៉ុបអាចជួបវិបត្តិសេដ្ឋកិច្ចដើរថយក្រោយនៅត្រីមាសក្រោយ និងក្រោយបន្ទាប់ទៀត។
ត្រីមាសខាងមុខជាអនាគតមិនជាក់លាក់។ គ្រប់សន្ទទស្សន៍សុទ្ធតែចង្អុលទិសអវិជ្ជមានហើយ ៖ ការចាយវាយរបស់ពលរដ្ឋបារាំងបានធ្លាក់ចុះពីរត្រីមាសជាប់គ្នា អតិផរណាឡើងខ្ពស់ជាលំដាប់ពីមួយខែទៅមួយខែ- តាមបច្ចេកទេស សហរដ្ឋអាមេរិកបានធ្លាក់ក្នុងវិបត្តិសេដ្ឋកិច្ចដើរថយក្រោយ- សេដ្ឋកិច្ចចិនក៏ទុចងក់ ដោយមានកំណើន ត្រឹមតែ០,៤%ប៉ុណ្ណោះ នៅត្រីមាសទីពីរឆ្នាំនេះ ពោលគឺជាតួលេខដ៏អាក្រក់បំផុត តាំងពីផ្ទុះវិបត្តិកូវីដមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ