អាល្លឺម៉ង់៖ ប្រឈមនឹងវិបត្តិខ្វះថាមពល លោកអូឡាហ្វ ស្ហុលស៍បើកផ្លូវឲ្យបន្តដំណើរការរោងចក្រអគ្គិសនីនុយក្លេអ៊ែរ
រដ្ឋាភិបាលអាល្លឺម៉ង់អាចនឹងសម្រេច អនុញ្ញាតឲ្យរោងចក្រអគ្គិសនីនុយក្លេអ៊ែរ ចំនួន៣ស្ថានីយ៍ចុងក្រោយ ដែលត្រូវបិទនៅចុងឆ្នាំនេះ អាចបន្តដំណើរការតទៅទៀតបាន។ នេះគឺជាលើកឡើង របស់លោក អូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ កាលពីរសៀលថ្ងៃពុធទី៣សីហា។ ការលើកឡើង ក្នុងន័យបើកផ្លូវឲ្យបន្តប្រើថាមពលអគ្គិសនីនុយក្លេអ៊ែរនេះ គឺដោយសារតែអាល្លឺម៉ង់ កំពុងតែប្រឈមនឹងបញ្ហាខ្វះថាមពលប្រើប្រាស់ បន្ទាប់ពីរុស្ស៊ីបានកាត់បន្ថយការផ្គត់ផ្គង់ឧស្ម័ន។
ចុះផ្សាយនៅថ្ងៃ៖
ស្តាប់ - ០២:១៥
ការបន្តប្រើប្រាស់ថាមពលអគ្គិសនីបានមកពីនុយក្លេអ៊ែរ លែងជារឿងដែលថ្នាក់ដឹកនាំអាល្លឺម៉ង់ ខ្លាចមិនហ៊ានលើកមកនិយាយទៀតហើយ។ សង្គ្រាមនៅអ៊ុយក្រែន ដែលបានបង្កឲ្យមានវិបត្តិថាមពល បានធ្វើឲ្យផុសផុលនូវការជជែកដេញដោល ក្នុងចំណោមថ្នាក់ដឹកនាំនយោបាយអាល្លឺម៉ង់ ទាក់ទិននឹងការរិះរកប្រភពថាមពលផ្សេងទៀត។
លោកប្រមុខរដ្ឋាភិបាលអាល្លឺម៉ង់ អូឡាហ្វ ស្ហុលស៍ បានបញ្ជាក់កាលពីរសៀលថ្ងៃពុធ ថារដ្ឋាភិបាលអាចនឹងសម្រេច អនុញ្ញាតឲ្យរោងចក្រនុយក្លេអ៊ែរទាំង៣ អាចបន្តដំណើរការផលិតអគ្គិសនីតទៅទៀត។ លោកបានបន្ថែមថា ក្នុងកាលៈទេសៈពេលនេះ បើទោះបីរោងចក្រអគ្គិសនីនុយក្លេអ៊ែរទាំង៣នោះ មានចំណែកផលិតអគ្គិសនីបន្តិចបន្តួចក្តី តែការបញ្ឈប់ដំណើរការរបស់វា វាគឺជារឿងមួយមិនសមហេតុផលទេ ព្រោះថាទោះយ៉ាងណា វាក៏បាចផលិតថាមពលអគ្គិសនីបានមួយចំនួនតូចដែរ។
សូមបញ្ជាក់ថា បច្ចុប្បន្ននេះ មានសល់ស្ថានីយផលិតអគ្គិសនីដើរដោយថាមពលនុយក្លេអ៊ែរ ចំនួន៣ស្ថានីយ៍ ដែលនៅដំណើរការនៅអាល្លឺម៉ង់។ តាមការគ្រោងទុក ក្នុងគម្រោងចាកចេញពីថាមពលនុយក្លេអ៊ែរទាំងស្រុង ដែលរដ្ឋាភិបាលរបស់លោកស្រីមែរកិលបានសម្រេច គឺរោងចក្រទាំង៣ចុងក្រោយនេះ នឹងត្រូវបិទទ្វារឈប់ដំណើរការនៅដំណាច់ឆ្នាំ២០២២នេះ។
ប្រឈមនឹងបញ្ហាខ្វះថាមពលប្រើប្រាស់ ដោយសារតែរុស្ស៊ីកាត់បន្ថយយ៉ាងគំហុក នូវទំហំឧស្ម័នដែលផ្គត់ផ្គង់មកឲ្យអឺរ៉ុប រដ្ឋាភិបាលអាល្លឺម៉ង់បានពិចារណាឲ្យរោងចក្រទាំងនេះ បន្តដំណើរការបណ្តោះអាសន្នសិន។ រោងចក្រទាំង៣នេះ អាចផលិតចរន្តអគ្គិសនីបានចំនួន៦% នៃការផលិតចរន្តអគ្គិសនីទាំងអស់របស់អាល្លឺម៉ង់។ គម្រោងវិធានការនេះ ក៏បានបង្កើតឲ្យមានការខ្វែងគំនិតគ្នាដែរ នៅក្នុងរដ្ឋាភិបាលចម្រុះអាល្លឺម៉ង់ ដែលមានក្រុមគណបក្សបរិស្ថាននិយមចូលរួមដែរ។
យ៉ាងណាក៏ដោយ លោកអូឡាហ្វ ស្ហុលស៍ បានអះអាងថា រដ្ឋាភិបាលនឹងសម្រេចនៅសប្តាហ៍ក្រោយ បន្ទាប់ពីបានទទួលលទ្ធផលត្រួតពិនិត្យ ពីក្រុមអ្នកជំនាញ ទាក់ទិននឹងសុវត្ថភាពសន្តិសុខ ថាតើរោងចក្រនុយក្លេអ៊ែរទាំង៣នេះ អាចបន្តដំណើរបានដែរឬទេ ហើយក្នុងរយៈពេលប៉ុន្មាន។ លោកអូឡាហ្វ ស្ហុលស៍ បញ្ជាក់ថា អាល្លឺម៉ង់ត្រូវតែប្រឹងប្រែងចូលរួមសាមគ្គីជាមួយប្រទេសអឺរ៉ុបដ៏ទៃទៀត ដែលជួបបញ្ហាខ្វះថាមពលប្រើទាំងអស់គ្នា ហើយកំពុងរិះរកប្រភពថាមពលផ្សេងទៀតក្រៅពីរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ