រុស្ស៊ីថាត្រៀមខ្លួនក្នុងការចរចាប្តូរអ្នកទោស បន្ទាប់ពីបានកាត់ក្តីអោយកីឡាការិនីអាមេរិកជាប់ពន្ធនាគារ
ប្រទេសរុស្ស៊ីបានប្រកាសកាលពីថ្ងៃសុក្រមិ្សលមិញ ថាបានរៀបចំខ្លួនរួចរាល់ ក្នុងការចរចាជាមួយប្រធានាធិបតីអាមេរិច ក្នុងការផ្លាស់ប្តូរអ្នកទោស បន្ទាប់ពីតារាជើងឯកបាល់បោះអាមេរិក Brittney Griner ត្រូវបានកាត់ទោសដោយតុលាការរុស្ស៊ីអោយជាប់ទោសពីថ្ងៃព្រហស្បតិ ពីបទកាន់កាប់និង រត់ពន្ធគ្រឿងញៀន ។
ចុះផ្សាយនៅថ្ងៃ៖
ស្តាប់ - ០១:៣៤
រដ្ឋមន្ត្រីការបរទេសរុស្ស៊ី បានបញ្ជាក់ពីថ្ងៃសុក្រនេះ ក្នុងសន្និសីទកាសែតនៅប្រទេសកម្ពុជាថា ប្រទេសរបស់លោកបានបើកចំហទទួលយកការចរចាអំពីបញ្ហានេះ ប៉ុន្តែនឹងធ្វើទៅតាមយន្តការណាមួយដែលបានកំណត់ និងយល់ព្រមដោយប្រធានាធិបតីទាំងពីរតែប៉ុណ្ណោះ។
ម្ចាស់ជើងឯកបាល់បោះ NBA និងម្ចាស់មេដាយមាស អូឡាំពិក២សម័យនេះ ត្រូវបានគេចាប់ខ្លួននៅក្នុងខែកុម្ភៈ នៅឯអាកាសយានដ្ឋានទីក្រុងមូស្គូ បន្ទាប់ពីបានរកឃើញថា គាត់បានយកបារីអេឡិចត្រូនិចដែលមានផ្ទុកប្រេងកញ្ឆាមកតាមខ្លួន។
តារាបាល់បោះមួយរូបនេះ បានយល់ព្រមទទួលខុសត្រូវទាំងស្រុងលើបទល្មើសនេះ ប៉ុន្តែគាត់នៅតែអះអាងថា គាត់ពុំមានចេតនាបំពាន ឬប្រើប្រាស់គ្រឿងញៀនខុសច្បាប់នៅក្នុងប្រទេសរុស្ស៊ីនោះឡើយ ។
នៅក្នុងសេចក្តីថ្លែងការណ៍ចុងក្រោយរបស់គាត់ មុនការប្រកាសសាលក្រមរបស់តុលាការ គាត់បានបញ្ជាក់ថានេះពិតជាកំហុសដោយអចេតនាមួយ ដែលគាត់បានធ្វើឡើងក្នុងស្ថានភាពប្រញាប់ប្រញាល់ ពេលធើ្វដំណើរវិលត្រលប់ពីអាមេរិកទៅ រកក្រុមរបស់គាត់នៅប្រទេសរុស្ស៊ីវិញ។
ជាក់ស្តែងកីឡាការិនី មួយរូបនេះមាន សំបុត្រថ្នាំត្រឹមត្រូវពីគ្រូពេទ្យអាមេរិក ប៉ុន្តែថ្នាំកញ្ឆានេះ ត្រូវបានហាមឃាត់ការប្រើប្រាស់ជាឱសថនៅប្រទេសរុស្ស៊ី។
ការផ្តន្ទាទោសដល់កីឡាការិនីជើងឯកនេះ ត្រូវបានចាត់ទុកថា ជារឿងមួយដែល មិនអាចទទួលយកបានដោយ ប្រធានាធិបតីសហរដ្ឋអាមេរិកលោកJoe Biden។ លោកក៏បានធានាផងដែរថា ក្រុមការងារនៅទីក្រុងវ៉ាស៊ីនតោននឹងខិតខំយ៉ាងខ្លាំង ដើម្បីទទួលបានការដោះលែងរបស់កីឡាការិនីបាល់បោះមួយរូបនេះ។
ក្នុងការចរចានេះដែរ ប្រទេសរុស្ស៊ី ប្រហែលជាចង់ធើ្វការដោះដូរ យកអ្នកទោសដ៏សំខាន់ម្នាក់ ដែលជាឈ្មួញអាវុធរុស្ស៊ី កំពុងជាប់ទោស២៥ឆ្នាំនៅប្រទេសអាមេរិក ប៉ុន្តែមកដល់ពេលនេះមិនទាន់មានការបញ្ជាក់ជាផ្លូវការនៅឡើយទេថាអាមេរិកយល់ព្រមទៅលើការផ្លាស់ប្តូរនេះ។
គួរបញ្ជាក់ថាតាំងពីមានការវាយលុកនៅអ៊ុយក្រែនមក រុស្ស៊ីនិង អាមេរិកបានសម្រេចដោះដូរ អ្នកទោសជាមួយគ្នាម្តងរួចមកហើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ